នាវាចម្បាំង ជប៉ុន ទៅអាមេរិកដើម្បីបំពាក់មីស៊ីល Tomahawk ដែលអាចបាញ់ចូលជ្រៅក្នុងដីចិននិងកូរ៉េខាងជើង

នាវាចម្បាំង JS Chokai របស់ប្រទេសជប៉ុន បានចេញដំណើរទៅកាន់សហរដ្ឋអាមេរិកហើយ ដើម្បីបំពាក់មីស៊ីល Tomahawk ស្របពេលដែលស្ថានការណ៍ក្នុងតំបន់និងការប្រកួតប្រជែងសព្វាវុធនៅអាស៊ីប៉ាស៊ីហ្វិក កំពុងក្តៅគគុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ CNN នៅថ្ងៃពុធទី១ខែតុលាឆ្នាំ២០២៥, នាវានេះបានចាកចេញពីមូលដ្ឋាន Yokosuka កាលពីចុងសប្តាហ៍ ដោយនឹងត្រូវធ្វើដំណើរចម្ងាយ ​១០ ១០០គីឡូម៉ែត្រ ឆ្ពោះទៅកាន់មូលដ្ឋានទ័ពអាមេរិក​នៅទីក្រុង San Diego រដ្ឋកាលីហ្វ័រញ៉ា។

យ៉ាងណា នាវានេះនឹងបន្តនៅមូលដ្ឋានអាមេរិក រយៈពេល១ឆ្នាំសិន ដើម្បីធ្វើទំនើបកម្មនិងហ្វឹកហ្វឺនសម្រាប់ការប្រើប្រព័ន្ធមីស៊ីល Tomahawk ខណៈការសាលល្បងបាញ់គ្រាប់ពិត គ្រោងធ្វើឡើងនៅរដូវក្តៅឆ្នាំ២០២៦។

JS Chokai បានក្លាយជានាវាចម្បាំងជប៉ុនដំបូងបង្អស់ដែលធ្វើដំណើរទៅអាមេរិកដើម្បីបំពាក់មីស៊ីល Tomahawk ហើយកាលណា គ្រប់យ៉ាងធ្វើរួចរាល់ហើយនោះ វានឹងមានសមត្ថភាពវាយប្រហារបានចម្ងាយ១ ៦០០គីឡូម៉ែត្រ អាចបាញ់ចូលជ្រៅក្នុងដីចិនឬកូរ៉េខាងជើងបាន។

សូមជម្រាបថា រឿងនេះកើតឡើងបន្ទាប់ពីជប៉ុន សម្រេចកិច្ចព្រមព្រៀងទិញមីស៊ីល Tomahawk ៤០០ គ្រាប់ក្នុងទំហំទឹកប្រាក់១.៧ពាន់លានដុល្លារពីសហរដ្ឋអាមេរិក។

ការទិញមីស៊ីលវាយប្រហារដីគោករយៈចម្ងាយឆ្ងាយទាំងនេះ គឺជារបត់គោលនយោបាយការពារជាតិដ៏សំខាន់របស់ប្រទេសជប៉ុន ដែលពីមុនមិនធ្លាប់ដាក់បញ្ចូលអាវុធវាយលុកប្រភេទនេះទេ។

យ៉ាងណាក្តី សកម្មភាពនេះត្រូវបានគេមើលឃើញយ៉ាងច្បាស់ថា គឺជាការឆ្លើយតបទៅនឹងបរិយាកាសសន្តិសុខកាន់តែឡើងកម្តៅខ្លាំងទៅៗ ដែលបង្កឡើងដោយទីក្រុងប៉េកាំងនិងព្យុងយ៉ាង៕

អត្ថបទ៖ សុខ សុវណ្ណ

ចុចអាន៖ ក្រសួងការពារជាតិអាមេរិក៖ នាវាចម្បាំងកងទ័ពអាមេរិកអាចនឹងចូលចតនៅមូលដ្ឋានសមុទ្ររាមចុងឆ្នាំនេះ