អ្នកញ៉ាំសាច់ បើឆ្លងកូវីដហើយ ប្រឈមនឹងការវិវត្តទៅរកភាពធ្ងន់ធ្ងរជាងអ្នកញ៉ាំបួស ឆ្ងាយណាស់

ការស្រាវជ្រាវថ្មីមួយបានបង្ហាញថា ការញ៉ាំអាហារបួសឬអ្នកដែលបន្ថែមត្រីនិងគ្រឿងសមុទ្រទៅក្នុងរបបអាហារបួស អាចកាត់បន្ថយហានិភ័យនៃការវិវត្តទៅជាជំងឺកូវីដ-១៩ ធ្ងន់ធ្ងរ បើប្រៀបធៀបទៅនឹងមនុស្សដែលញ៉ាំសាច់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របបអាហារបួសដែលមានបន្លែ បានកាត់បន្ថយហានិភ័យនៃការវិវត្តជំងឺកូវីដ ពីកម្រិតមធ្យមទៅធ្ងន់ធ្ងររហូតដល់ទៅ ៧៣ភាគរយ ហើយរបបអាហារដែលបន្ថែមត្រីនិងគ្រឿងសមុទ្រចូល មានអត្រាថយចុះហានិភ័យ៥៩ភាគរយ។

ដោយផ្អែកលើការស្ទង់មតិរបស់វេជ្ជបណ្ឌិតជួរមុខនិងគិលានុបដ្ឋាយិកាចំនួន ២,៨៨៤នាក់ដែលបានឆ្លងវីរុសនេះនៅចន្លោះខែកក្កដាដល់ខែកញ្ញាឆ្នាំ២០២០ ក្រុមមកពីសាលាសុខភាពសាធារណៈ Johns Hopkins Bloomberg ក្នុងទីក្រុង Baltimore រដ្ឋ Maryland បានពិនិត្យមើលទៅលើរបបអាហារនិងភាពធ្ងន់ធ្ងររបស់ជំងឺកូវីដ-១៩។

ការស្ទង់មតិនេះបានសួរអំពីរបបអាហារ ប្រវត្តិវេជ្ជសាស្រ្តនិងករណីនៃជំងឺកូវីដ-១៩ ហើយវាបានបង្ហាញពីទំនាក់ទំនងគួរឲ្យកត់សម្គាល់ រវាងការចៀសវាងញ៉ាំសាច់និងការកាត់បន្ថយហានិភ័យនៃជំងឺកូវីដ-១៩ធ្ងន់ធ្ងរ។

យ៉ាងណាក្តី ពួកគេមិនអាចនិយាយថាហេតុអ្វីបានជាបញ្ហានេះកើតឡើងនោះទេ ប៉ុន្តែគេសង្ស័យថា វាអាចបណ្តាលមកពីការកើនឡើងនូវវីតាមីន សារធាតុចិញ្ចឹមនិងសារធាតុរ៉ែនៅក្នុងរបបអាហារបន្លែដែលមានសារៈសំខាន់សម្រាប់ប្រព័ន្ធភាពស៊ាំ មានសុខភាពល្អ៕

ប្រែសម្រួល៖ Vann Vann

ប្រភព៖ Daily Mail