នារី​វះកាត់​កែសម្ផស្ស​បង្កើន​ភាពទាក់ទាញ​ មិន​បារម្ភ​ផលប៉ះពាល់

បច្ចុប្បន្នការវះកាត់កែសម្ភស្ស​មិនមែនជាបញ្ហាធំដំអ្វីនោះទេ ដោយមានសឹងតែ​គ្រប់ប្រទេសទៅហើយ ចំពោះការវះកាត់កែសម្ផស្ស មិនអាចផ្សាស់ប្ដូរផ្ទៃមុខបានទាំងស្រុងក៏ពិតមែន តែអាចជួយបង្កើនសោភណ័ភាពខុសពីធម្មជាតិ និងទទួលបានការទាក់ទាញជាងមុន។

តារាចម្រៀងស្រីវ័យ ៣២ ឆ្នាំកញ្ញា ដួង សុភា បានបង្ហើបឱ្យដឹងថា ​នាងសម្រេចចិត្តវះកាត់កែសម្ផស្សនៅលើផ្ទៃមុខ ដូចជាច្រមុះ មាត់ ត្របកភ្នែក និងថ្គាម ដោយសារចង់បានភាពស្រស់ស្អាតជាងមុន ដោយត្រូវចំណាយប្រមាណ ២ ៥០០ ដុល្លារ។ ហើយថា អំឡុងពេលនៃការវះកាត់កែសម្រស់នោះគឺមិនមានភាពឈឺចាប់អ្វីទេ ព្រោះគេ​បានចាក់ថ្នាំស្ពឹក ឈឺបន្តិចបន្ទួចតែប៉ុណ្ណោះ ខណៈក្រោយពីវះកាត់​ពេទ្យតម្រូវឱ្យតមគ្រឿង​សមុទ្រ ដូចជាបង្គា ក្ដាម និងសាច់គោ សាច់មាន់។

កញ្ញា ដួង សុភា បានរៀបរាប់ថា ដំបូងឡើយ នាងមានអារម្មណ៍ភ័យខ្លាចចំពោះការវះកាត់ ប៉ុន្តែ​កញ្ញា​បានគិតថា វាអាចទៅតាមកន្លែងនីមួយៗដែលគ្មានជំនាញពិត ដូចនេះ​ទាមទារ​ឲ្យសម្រេច​ចិត្តឲ្យច្បាស់ជាមុនសិន ថាត្រូវជ្រើសរើសយកគ្លីនិកមួយដែរល្អ ប្រសិនបើយើងនៅក្មេងគួរកុំធ្វើ ព្រោះវាប៉ះពាល់ខ្លំាងប្រសិនជ្រើសរើសមិនបានល្អងាយរងការខាតបង់នៅថ្ងៃមុខ។

តារាសម្ដែងភាពយន្តមួយរូបទៀតគឺកញ្ញា ដាលីន ណា ​ដែលធ្លាប់បានវះកាត់​កែសម្រស់មុននឹង​អាចទទួលបានភាពស្រស់ស្អាតដូចសព្វថ្ងៃនេះ។

តារាស្រីរូបនេះប្រាប់ថា ​នាងមិនបានវះកាត់​កែទៅលើអ្វីច្រើននោះទេ ដោយពីធម្មជាតិរបស់ខ្លួនក៏មិនអាក្រក់ដែលមិនអាចទទួលបាននោះដែរ ហេតុដូចនេះ នាងគ្រាន់តែបានកែទៅលើតែខ្ទង់ច្រមុះបន្តិចទេ។

នាងបានធ្វើវា២ដង ព្រោះមុនដំបូងមិនទទួលបានដូចអ្វីដែលចង់បាន ហើយចំពោះការចំណាយ​អស់ប្រមាណត្រឹម ១ ០០០ ដុល្លារ ដោយជ្រើសរើសយកគ្លីនិកមួយដែលល្អ មានស្តង់ដារ​បច្ចេកទេសត្រឹមត្រូវចៀសវាងមានបញ្ហាទៅថ្ងៃមុខ៕

ឌឿនចាន់ ថារី​