ប្រទេសអាស៊ានមួយទៀតរកឃើញករណីដំបូង ជំងឺអុតស្វា

អ្នកនាំពាក្យក្រសួងសុខាភិបាលឥណ្ឌូណេស៊ី លោក Mohammad Syahril បាននិយាយកាលពីថ្ងៃសៅរ៍ថា “ពេលនេះឥណ្ឌូណេស៊ីបានរកឃើញករណីដំបូងនៃជំងឺអុតស្វា ហើយអ្នកជំងឺគឺជាបុរសអាយុ ២៧ ឆ្នាំរស់នៅក្នុងទីក្រុងហ្សាកាតា បន្ទាប់ពីទទួលការធ្វើតេស្តម៉ាស៊ីនធំ PCR កាលពីថ្ងៃសុក្រ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Syahril បាននិយាយថា ថ្មីៗនេះ អ្នកជំងឺបានធ្វើដំណើរទៅក្រៅប្រទេស ហើយបានចេញរោគសញ្ញាស្រាលៗដូចជា គ្រុនក្តៅ កន្ទួល ។ លោកបានបន្ថែមថា ស្ថានភាពរបស់អ្នកជំងឺគឺល្អប្រសើរ ហើយមិនឈឺធ្ងន់ធ្ងរនោះទេ ដែលជាហេតុធ្វើឲ្យអាជ្ញាធរសុខាភិបាលឥណ្ឌូណេស៊ី សម្រេចចិត្តមិនព្យាបាលគាត់នៅក្នុងបន្ទប់ដាច់ដោយឡែក ប៉ុន្តែបានស្នើឲ្យអ្នកជំងឺរស់នៅដាច់ដោយឡែកនៅផ្ទះ ។

អ្នកនាំពាក្យរូបនេះបាននិយាយថា អាជ្ញាធរកំពុងកំណត់មនុស្សដែលមានទំនាក់ទំនងជាមួយអ្នកឆ្លង ដើម្បីទប់ស្កាត់ការរីករាលដាលនៃមេរោគនេះ បន្ទាប់ពីមានករណីសង្ស័យកើតជំងឺអុតស្វាចំនួន ២៣ ត្រូវបានធ្វើតេស្តតាម PCR ប៉ុន្តែ ២២ ករណីបានធ្វើតេស្តអវិជ្ជមាន ។

មេរោគ​ជំងឺ​ស្វា​មិន​ងាយ​ឆ្លង​ទេ ហើយ​ជា​ធម្មតាវា​ឆ្លង​តាម​រយៈ​ការ​ទំនាក់ទំនង​ជិត​ស្និទ្ធ រួម​ទាំង​ទំនាក់ទំនង​ផ្លូវ​ភេទ​ជាមួយ​អ្នក​ឆ្លង ។ មេរោគអាចចូលទៅក្នុងខ្លួនមនុស្សតាមរយៈស្បែកដែលប្រេះ ផ្លូវដង្ហើម ភ្នែក ច្រមុះ មាត់ និងតាមរយៈសារធាតុរាវក្នុងរាងកាយជាដើម ។ វាមានដើមកំណើតនៅក្នុងសត្វដូចជាសត្វកកេរ និងសត្វព្រូន ហើយកើតឡើងនៅតំបន់ដាច់ស្រយាលនៃអាហ្វ្រិកកណ្តាល និងខាងលិច ។

យោងតាមអង្គការសុខភាពពិភពលោក (WHO) បានឲ្យដឹងថា ករណីជំងឺអុតស្វាជាង ៣៥,០០០ ករណីត្រូវបានរាយការណ៍នៅទូទាំងពិភពលោកក្នុងប្រទេស និងដែនដីជាង ៩០ ហើយរហូតមកដល់ពេលនេះមានមនុស្សស្លាប់ចំនួន ១២ នាក់ ដោយសារជំងឺនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ផ្ទុះរថយន្តសម្លាប់កូនស្រីមនុស្សជំនិតរបស់លោក ពូទីន (មានវីដេអូ)