អាហារ ៥ ប្រភេទ ត្រូវចៀសវាងអំឡុងពេលបំបៅដោះកូន

ការស្រាវជ្រាវបានបង្ហាញថាអាហារដែលម្ដាយទទួលទានមានឥទ្ធិពលទៅលើទឹកដោះពិតប្រាកដមែន ។ ដូចនេះម៉ាក់ៗត្រូវជៀសវាងអាហារទាំង ៥ ខាងក្រោមដើម្បីការពារកុំឲ្យមានផលរំខានដល់កូនតូច ៖

១. ត្រីមានជាតិបារតខ្ពស់

ត្រី និងគ្រឿងសមុទ្រខ្លះមានកម្រិតជាតិបារតខ្ពស់ អាចប៉ះពាល់ដល់ប្រព័ន្ធសរសៃប្រសាទកណ្តាលរបស់ទារកជាអចិន្ត្រៃយ៍ ។ ជាលទ្ធផល ពួកគេអាចមានការយឺតយ៉ាវ ឬចុះខ្សោយនៅក្នុងការយល់ដឹង ការប្រើប្រាស់ដៃ ការនិយាយ និងការរៀនភាសាជាដើម។ ហេតុនេះហើយ ម៉ាក់ៗគួរតែជៀសវាងត្រីដែលមានជាតិបារតខ្ពស់ដូចជា ត្រីឆ្លាម ត្រីដាវ និងត្រីធូណាភ្នែកធំ ។

២. ថ្នាំបុរាណ

ថ្នាំបុរាណជាច្រើនមិនដែរឆ្លងកាត់ការពិសោធន៍ចំពោះស្ត្រីមានផ្ទៃពោះទេ ថែមទៀតមិនមានការទទួលស្គាល់ពីរដ្ឋបាល​ចំណីអាហារ​និង​ឪ​ស​ថទៀតផង ។ មុនពេលប្រើប្រាស់ថ្នាំអ្វីក៏ដោយត្រូវមានការត្រួតពិនិត្យពីគ្រូពេទ្យជំនាញជាមុនសិនសឹមប្រើប្រាស់ ។

៣​. ជាតិអាល់កុល

យោងតាមមជ្ឈមណ្ឌលគ្រប់គ្រង និងការពារជំងឺ (CDC) ការផ្ដាច់គ្រឿងស្រវឹងគឺជា ជម្រើសដែលមានសុវត្ថិភាពបំផុត អំឡុងពេលបំបៅដោះ ។ ការស្រាវជ្រាវបង្ហាញថា បរិមាណជាតិអាល់កុលក្នុងទឹកដោះម្តាយកើនឡើងដល់ ៣០-៦០ នាទីបន្ទាប់ពីកែវចុងក្រោយ ។ លើសពីនេះទៀត ជាតិអាល់កុលអាចស្ថិតនៅក្នុងប្រព័ន្ធរាងកាយរហូតដល់ ២-៣ ម៉ោងឯណោះ ឬយូរជាងធម្មតាបើសិនសេពច្រើន ។ 

៤. កាហ្វេអ៉ីន

កាហ្វេ, សូដា, តែ, សូកូឡា សុទ្ធតែជាប្រភពអាហារផ្ទុកកាហ្វេអ៉ីន ។ រាល់ពេលម៉ាក់ៗទទួលទាន ជាតិកាហ្វេអ៉ីនខ្លះនឹងរត់ទៅនៅនឹងទឹកដោះ ។ ជាក់ស្ដែង កាហ្វេអ៉ីនផ្ដល់ផលប៉ះពាល់ជាខ្លាំងដល់ទារកដោយសារទារកមិនអាចបំបែក និងរំលាយជាតិកាហ្វេអ៉ីនបានល្អដូចមនុស្សធំឡើយ ។ 

៥. អាហារកែច្នៃ

ការស្រាវជ្រាវថ្មីៗរកឃើញថា របបអាហារម្ដាយមានឥទ្ធិពលទៅលើរបបអាហារកូននាពេលអនាគត ។ ណាមួយអាហារកែច្នៃសម្បូរទៅដោយ ជាតិស្ករ កាឡូរីខ្ពស់ ខ្លាញ់អាក្រក់ និងមិនសម្បូរសារធាតុចិញ្ចឹមធ្វើឲ្យប៉ះពាល់ដល់សុខភាពរាងកាយរបស់មនុស្ស ៕

ប្រែសម្រួលដោយ ៖ វារី

ចុចអាន ៖ ស្ត្រី​គ្រប់រូប​គួ​រយល់ដឹង​ពី​ការ​បំបៅកូន​ ដោយ​ទឹកដោះ​ម្តាយ​