ក្រសួងសុខាភិបាលពង្រឹងការផ្តល់សេវាជំងឺមិនឆ្លង និងប្រព័ន្ធកត់ត្រាទិន្នន័យវេជ្ជសាស្រ្ត ខេត្តកំពត

លោក យូ ពិសី អនុរដ្ឋលេខាធិកាក្រសួងសុខាភិបាល បានអញ្ជើញដឹកនាំក្រុមការងារ ចុះពិនិត្យវឌ្ឍនភាព និងដឹកនាំកិច្ចប្រជុំដើម្បីពង្រឹងគុណភាពការផ្តល់សេវាជំងឺមិនឆ្លង និងវាយតម្លៃដំណើរការប្រព័ន្ធកត់ត្រាទិន្នន័យ វេជ្ជសាស្រ្តអេឡិចត្រូនិក (EMR) នៅខេត្តកំពត។ នេះបើតាមការផ្ដល់ព័ត៌មានពី ក្រសួងសុខាភិបាល នៅថ្ងៃនេះ។

ក្នុងជំនួបនៅមន្ទីរសុខាភិបាលខេត្តកំពតថ្មីៗនេះ លោក យូ ពិសី បានមានមតិបង្ហាញពីគោលបំណង នៃបេសកម្មដើម្បីពង្រឹងគុណភាពការផ្តល់សេវាជំងឺមិនឆ្លង និងជាពិសេសដើម្បីពិនិត្យវាយតម្លៃលើដំណើរការសាកល្បងប្រព័ន្ធកត់ត្រាទិន្នន័យ វេជ្ជសាស្រ្តអេឡិចត្រូនិក (EMR) សម្រាប់ជំងឺមិនឆ្លង ដែលបានអនុវត្តសាកល្បងកន្លងមកនៅក្នុងខេត្តកំពត ដើម្បីពិនិត្យរកបញ្ហានៅក្នុងដំណើរការប្រព័ន្ធ EMR នេះ ហើយធ្វើការកែលំអរសម្រាប់ការត្រៀមអនុវត្តនៅតាមបណ្តាខេត្តផ្សេងៗទៀតឱ្យមានភាពប្រសើរឡើង។

សមាសភាពក្រុមការងារចូលរួមក្នុងនោះរួមមាន លោកស្រីសាស្រ្តាចារ្យជំនួយ ស៊ុយ សុវណ្ណធីតា អគ្គនាយករងបច្ចេកទេសសុខាភិបាលទទួលបន្ទុកគម្រោងលើកកម្ពស់គុណភាព និងសមធម៌សុខាភិបាល ជំហានទី២ មន្រ្តីនាយកដ្ឋានការពារសុខភាព នាយកដ្ឋានថវិកា នៃក្រសួងសុខាភិបាល អង្គភាពបញ្ជាក់ការចំណាយ និងតំណាងធនាគារពិភពលោក។ ក្រុមការងារបានចែកជា ៣ ក្រុម ដើម្បីចុះពិនិត្យដំណើរការសេវាជំងឺមិនឆ្លងនិងប្រព័ន្ធកត់ត្រា EMR ដោយចាប់ផ្តើមចុះធ្វើការពិនិត្យវាយតម្លៃពីថ្ងៃទី១៧ ខែកក្កដា ឆ្នាំ២០២៤ និងបញ្ចប់នៅថ្ងៃទី១៩ ខែកក្កដា ឆ្នាំ២០២៤ ដោយបានចុះពិនិត្យទៅលើ ៣០ មណ្ឌលសុខភាព និង ៣ មន្ទីរពេទ្យបង្អែក ក្នុងស្រុកប្រតិបត្តិកំពត ស្រុកប្រតិបត្តិឈូក និងកំពង់ត្រាច។

ក្រោយការចុះប្រមូលព័ត៌មានអំពីដំណើរការសេវាជំងឺមិនឆ្លង និងការប្រើប្រាស់ប្រព័ន្ធ EMR នៅក្នុងខេត្តកំពតរួច ក្រុមការងារនឹងចុះពិនិត្យបន្តទៀតនៅក្នុងខេត្តបាត់ដំបង និងជាចុងក្រោយបន្ទាប់ពីប្រមូលនូវធាតុចូលទាំងអស់នេះ ក្រុមការងារនឹងធ្វើការប្រជុំបូកសរុបវាយតម្លៃលទ្ធផលស្វែងរកដំណោះស្រាយទៅនឹងបព្ហាប្រឈមដែលកើតមាននិងជូនព័ត៌មានត្រលប់ជូនថ្នាក់ដឹកនាំ។

គួរបញ្ជាក់ថា កិច្ចការងារពង្រឹងនេះ អនុវត្តឡើងដោយបានទទួលការអនុញ្ញាតពី សាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងតាមការណែនាំរបស់ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាពនិងសមធម៌សុខាភិបាល ជំហានទី២៕