សុខភាព
គ្រូពេទ្យណែនាំដល់ស្ត្រីមានផ្ទៃពោះ ត្រូវយកចិត្តទុកដាក់លើសុខភាពមាត់ធ្មេញឱ្យបានល្អ
គ្រូពេទ្យជំនាញនៅមន្ទីរពេទ្យកាល់ម៉ែត បានណែនាំដល់ស្ត្រីមានផ្ទៃពោះតាមរយៈទំព័រហ្វសប៊ុកមន្ទីរពេទ្យកាល់ម៉ែត ត្រូវយកចិត្តទុកដាក់ខ្ពស់ចំពោះបញ្ហាសុខភាពមាត់ធ្មេញ ឱ្យបានល្អចៀសវាងបង្កជាមេរោគផ្សេងៗសម្រាប់ម្តាយ និងទារក ដែលអាចរំខានដល់ការរីកលូតលាស់របស់ទារកក្នុងផ្ទៃម្តាយដូចគ្នា។

ប្រភពខាងលើ លើកឡើងថា អំឡុងពេលស្ត្រីមានផ្ទៃពោះ ធ្វើឱ្យនៅក្នុងមាត់មានការប្រែប្រួលដូចជា ងាយក្នុងការរលាកអញ្ចាញធ្មេញ និងឈាមតាមជើងធ្មេញ។ ងាយហើម និងដុះលូតវែងនៅអញ្ចាញធ្មេញ (Pregnancy Epulis Formation) ហើយក៏កើតមានពងបែកក្នុងមាត់ជាញឹកញាប់ (Recurrent Aphthae) ផងដែរ។
បើក្រឡេកមើលពីការព្យាបាលធ្មេញវិញ សម្រាប់ស្ត្រីមានផ្ទៃពោះដែលចង់សម្អាតធ្មេញ ឬប៉ះធ្មេញ មិនមានការប៉ះពាល់ និងការព្រួយបារម្ភឡើយ។ ប៉ុន្តែ បើជាការដកធ្មេញ ការព្យាបាលធ្មេញ ឬការវះកាត់ក្នុងមាត់ ត្រូវមានការប្រឹក្សាជាមួយទន្តបណ្ឌិត និងទាមទារនូវការពិនិត្យតាមដាន និងការយកចិត្តទុកដាក់ខ្ពស់ពីគ្រូពេទ្យ។ ចំណែក ការងារមួយចំនួនដែលធ្វើឱ្យសោភណភាពប្រសើរ ដូចជា ពត់តម្រង់ធ្មេញ គួររង់ចាំក្រោយសម្រាលរួច។ ជាទូទៅ ខែដែលមានសុវត្ថិភាពខ្ពស់ចំពោះអ្នកជំងឺដែលមានផ្ទៃពោះ គឺត្រីមាសទី២ (ខែទី៤ ទី៥ និងទី៦) ចំពោះការព្យាបាលធ្មេញ។

ប្រសិនបើស្ត្រីមានផ្ទៃពោះឈឺធ្មេញនៅក្នុងត្រីមាសទី១ ឬត្រីមាសទី៣ គួរធ្វើដូចម្តេច? ត្រង់ចំណុចនេះ គ្រូពេទ្យណែនាំឱ្យប្រឹក្សាជាមួយទន្តបណ្ឌិតជំនាញ ដើម្បីរកវិធីសាស្ត្រជួយក្នុងការបំបាត់ការឈឺចាប់។ ហាមប្រើប្រាស់ថ្នាំដោយខ្លួនឯង ដោយមិនមានវេជ្ជបញ្ជា ព្រោះអាចបង្កគ្រោះថ្នាក់ដល់ម្តាយ និងកូនក្នុងផ្ទៃបាន។ ក្នុងករណីមានការរលាកស្រួចស្រាវដែលត្រូវធ្វើការព្យាបាលបន្ទាន់ដូចជា ការករខ្ទុះពីធ្មេញនាំអោយហើមមុខមាត់ ត្រូវមានការប្រឹក្សាពីគ្រូពេទ្យផ្នែកសម្ភព និងសហការជាមួយទន្តបណ្ឌិតយ៉ាងជិតស្និទ្ធក្នុងការជួយរកដំណោះស្រាយ សុវត្ថិភាពជូនអ្នកជំងឺ។
ជាមួយគ្នានេះ ចំពោះការថតកាំរស្មី X-ray សម្រាប់ព្យាបាលធ្មេញ គួរចៀសវាង អំឡុងពេលពពោះត្រីមាសទី១ ព្រោះអាចប៉ះពាល់ដល់ទារក ហើយប្រសិនត្រូវថត ខាងគ្រូពេទ្យនឹងមានអាវសំណការពារ ដែលផ្តល់សុវត្ថិភាពដល់ទារកក្នុងផ្ទៃ។ បន្ថែមពីនេះ គ្រូពេទ្យហាមមិនឱ្យមានការប្រើប្រាស់ថ្នាំសះប្រភេទ Tetracycline នៅពេលស្ត្រីមានផ្ទៃពោះនោះទេ គឺធ្វើឱ្យកូនកើតមកមានពណ៌ធ្មេញក្រម៉ៅខ្លាំង ត្រូវចៀសវាងថ្នាំប្រភេទនេះ។

គ្រូពេទ្យ បានណែនាំឱ្យស្ត្រីមានផ្ទៃពោះគ្រប់រូប ធ្វើអនាម័យមាត់ធ្មេញជាប្រចាំ និងណាត់ជួបជាមួយទន្តបណ្ឌិតរៀងរាល់៦ខែម្តង ដើម្បីពិនិត្យសុខភាពមាត់ធ្មេញឱ្យបានល្អអំឡុងពេលមានផ្ទៃពោះ៕

-
ព័ត៌មានជាតិ១ សប្តាហ៍ ago
កម្ពុជានឹងមិនដកថយឬឈរជើងដោយគ្មានអាវុធនៅចំណុចប៉ះទង្គិចគ្នាទេ
-
ព័ត៌មានជាតិ៦ ថ្ងៃ ago
នាយករដ្ឋមន្ត្រីថាអាវុធដែលដាក់ទៅត្រៀមមិនមែនមានតែប៉ុន្មានដែលឱ្យឃើញលើបណ្ដាញសង្គមទេ
-
សេចក្ដីជូនដំណឹង៦ ថ្ងៃ ago
ការបើកឱ្យទស្សនាលើកដំបូងបង្អស់នូវសាលារៀនអន្តរជាតិ អាយុកាល ៣៥០ឆ្នាំ មកពីចក្រភពអង់គ្លេស
-
នយោបាយ៦ ថ្ងៃ ago
ព្រឹត្តិការណ៍ថ្ងៃ២៨ ឧសភា សម្ដេចធិបតីបញ្ជារួចហើយបើថៃមិនថយ «វ៉ៃ»
-
ព័ត៌មានជាតិ១០ ម៉ោង ago
ក្រុមប្រឹក្សាសន្ដិសុខធ្លាប់ព្រមានដកថៃចេញពីអង្គការសហប្រជាជាតិក្រោយពីមិនទទួលស្គាល់សេចក្ដីសម្រេចរបស់ ICJ
-
នយោបាយ១ ថ្ងៃ ago
កម្ពុជានឹងមិនចរចាជាមួយថៃរឿងព្រំដែន៤កន្លែងដែលប្ដឹងទៅ ICJ ទេ
-
ព័ត៌មានជាតិ១ សប្តាហ៍ ago
វិទ្យាល័យព្រះសីហនុ ក្នុងខេត្តកំពង់ចាម ត្រូវបានទទួលស្គាល់គុណភាពអប់រំកម្រិតអន្តរជាតិ
-
ព័ត៌មានជាតិ៥ ថ្ងៃ ago
កម្ពុជា បន្តមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់ ខណៈកម្ដៅ៣៧°C