ដឹងប្រយោជន៍ពីល្ពៅខ្មែរ ជួយដល់សុខភាពច្រើនអនេក ជាពិសេសអ្នកជំងឺទឹកនោមផ្អែម និងមហារីក

ដោយសារតែបច្ចប្បន្ននេះផ្លៃល្ពៅរបស់បងប្អូនកសិករខ្មែរកំពុងត្រូវប៉ានដោយបានដាក់លក់នៅលើទីផ្សារ ជាពិសេសនៅតាមផ្សារទំនើបនានាក្នុងប្រទេសកម្ពុជា ដូច្នេះបន្លែមួយប្រភេទនេះកំពុងក្លាយជានិន្នាការ​មួយក្រោមស្លាកថា «គាំទ្រផលិតផលក្នុងស្រុក ដូចថែសេដ្ឋកិច្ចជាតិឲ្យរុងរឿង»។

ទន្ទឹមនឹងការជួយដល់កសិករខ្មែរ សម្រាប់អ្នកដែលនិយមទទួលទានល្ពៅជាប្រចាំប្រាកដជាដឹងហើយថា ផ្លែល្ពៅមានអត្ថប្រយោជន៍ជាច្រើនដល់សុខភាព និងអាហារូបត្ថម្ភជួយទ្រទ្រង់រាងកាយ។ ជាពិសេស បន្លែពណ៌លឿងមួយនេះបានក្លាយគ្រឿងផ្សំ​សុខភាព​ដ៏មានតម្លៃជាញឹកញាប់ ដែលតែងតែមាននៅក្នុងអាហារអ្នកស្រលាញ់សុខភាព។

ខាង​ក្រោម​នេះ​ជាអត្ថប្រយោជន៍អាហារូបត្ថម្ភរបស់ល្ពៅ​ដែលអ្នកគួរដឹង៖ 

សម្បូរវីតាមីន៖

វីតាមីន A៖ សម្បូរទៅដោយសារធាតុ Beta-carotene ដែលរាងកាយបំប្លែងទៅជាវីតាមីន A មានសារៈសំខាន់សម្រាប់ចក្ខុវិស័យ ភាពស៊ាំ និងសុខភាពស្បែក។

វីតាមីន C៖ គាំទ្រមុខងារប្រព័ន្ធភាពស៊ាំ ការផលិតកូឡាជែន និងដើរតួជាសារធាតុប្រឆាំងអុកស៊ីតកម្ម។

វីតាមីន E : ការពារកោសិកាពីការខូចខាត និងគាំទ្រដល់សុខភាពស្បែក និងភ្នែក។

សារធាតុរ៉ែ៖

មានផ្ទុកប៉ូតាស្យូម ម៉ាញ៉េស្យូម និងជាតិដែក ដែលជួយដល់សុខភាពបេះដូង មុខងារសាច់ដុំ និងការដឹកជញ្ជូនអុកស៊ីសែន។

កាឡូរីទាប៖

ល្អបំផុតសម្រាប់ការគ្រប់គ្រងទម្ងន់ – ល្ពៅឆ្អិន១ ពែង មានត្រឹមតែ ៥០ កាឡូរីប៉ុណ្ណោះ។

ជាតិសរសៃខ្ពស់៖

ជំនួយដល់សុខភាពរំលាយអាហារ ជួយគ្រប់គ្រងជាតិស្ករក្នុងឈាម និងលើកកម្ពស់ការឆ្អែត (មានអារម្មណ៍ឆ្អែតបានយូរមិនឆាប់ឃ្លាន)។

អត្ថប្រយោជន៍សុខភាព

បង្កើនភាពស៊ាំ៖ សារជាតិ Beta-carotene និងវីតាមីន A និង C ជួយពង្រឹងប្រព័ន្ធភាពស៊ាំដល់រាងកាយ។

លើកកម្ពស់សុខភាពភ្នែកនិងចិញ្ចឹម និងថែរក្សាភ្នែក៖ សម្បូរទៅដោយសារធាតុ carotenoids (ដូចជា lutein និង zeaxanthin) ដែលជួយការពារភ្នែកពីការខូចខាតដែលទាក់ទងនឹងអាយុ។

សុខភាពបេះដូង៖ សារធាតុប៉ូតាស្យូម និងជាតិសរសៃជួយដល់សម្ពាធឈាម និងកម្រិតកូឡេស្តេរ៉ុលដែលមានសុខភាពល្អ។

លក្ខណៈសម្បត្តិប្រឆាំងអុកស៊ីតកម្ម៖ ជួយកាត់បន្ថយភាពតានតឹងអុកស៊ីតកម្ម និងការរលាក កាត់បន្ថយហានិភ័យនៃជំងឺរ៉ាំរ៉ៃ និងកាត់បន្ថយហានិភ័យនៃជំងឺមហារីក។ ការថយចុះកម្រិតជាតិស្ករក្នុងឈាម គ្រប់គ្រងកម្រិតជាតិស្ករក្នុងឈាម ការពារជំងឺទឹកនោមផ្អែម។

ជំនួយដល់សុខភាពស្បែក៖ វីតាមីន A, C និង E រួមចំណែកដល់ស្បែកដែលមានសុខភាពល្អ ដោយការលើកកម្ពស់ការផលិតកូឡាជែន និងការពារប្រឆាំងនឹងការបំផ្លាញពីពន្លឺព្រះអាទិត្យ។

មិនតែប៉ុណ្ណោះ សូម្បីតែគ្រាប់ល្ពៅ ក៏មានមានជីវជាតិខ្ពស់ផងដែរ វាផ្ទុកនូវប្រូតេអ៊ីនខ្ពស់ ខ្លាញ់ល្អ ម៉ាញ៉េស្យូម ស័ង្កសី និងសារធាតុប្រឆាំងអុកស៊ីតកម្ម។ អាច​ជួយ​ដល់​សុខភាព​ក្រពេញ​ប្រូស្តាត សុខភាព​បេះដូង និង​ការ​គេង​លក់​ស្រួល​ជាង​មុន (ដោយសារ​សារធាតុ tryptophan)។

ជាពិសេស គ្រាប់ល្ពៅក៏ល្អសម្រាប់​បំបាត់ភាព​តានតឹង ខណៈដែល​ប្រេងល្ពៅក៏ជួយបំប៉នសរសៃប្រសាទ ឬសូម្បីតែការ​ទទួលទានផ្លែ​ល្ពៅក៏អាចជួយគ្រប់គ្រងកម្រិតជាតិស្ករក្នុងឈាមឲ្យ​​ស្ថិតក្នុងកម្រិតធម្មតាផងដែរ។ ដូច្នេះហើយ សូម​ព្យាយាម​ញ៉ាំ​ល្ពៅ​ពី​ផ្នែក​ផ្សេងៗដើម្បីជាប្រយោជន៍ជារួមដល់រាងកាយទាំងមូល។

ជាងនេះថែមទៀត សម្រាប់​អ្នក​ចង់​​​ចង់​ញ៉ាំ​ល្ពៅ​ដើម្បី​សម្រក​ទម្ងន់ បន្ថយ​កម្រិតជាតិស្ករក្នុង​ឈាម សូមកុំទទួលទាន​ល្ពៅ​ដោយការយកទៅធ្វើបង្អែមឬកែច្នៃដាក់សារធាតុលាយបញ្ចូលគ្នា។ ដោយសារតែវាជាបង្អែម​ដែល​មាន​ជាតិ​ស្ករ​ខ្ពស់ វាត្រូវ​បានគេណែនាំឲ្យ​ស្ងោរ ឬ​ចំហុយ ហើយ​ញ៉ាំ​ជាមួយ​បន្លែ និង​ផ្លែឈើ​ផ្សេងៗ ឬ​ធ្វើ​ស៊ុប​ល្ពៅ​ក៏អាចជួយដល់សុខភាពបានយ៉ាងច្រើន៕

អត្ថបទ៖ សាង ស្រីល័ក្ខ

ចុចអាន៖អ្នកជំនាញចេញការព្រមាន ក្រោយស្ត្រី​ចិនម្នាក់​ចូល​សង្គ្រោះ​បន្ទាន់ ដោយសារ​ផ្លែគូលេន