KPT+

កំពូលមនុស្ស ៥ ប្រភេទ អាចជាមិត្តទ្រុស្តមិត្ត ឃើញទីណាគួរចៀសឆ្ងាយភ្លាមៗ

បានផុស

៣ years មុន

នៅ

ថ្ងៃចន្ទ ២៨ កុម្ភៈ ២០២២

ដោយ

បញ្ហារឿងមិត្តទ្រុស្តមិត្ត មិនថាស្រុកទេសជឿនលឿនយ៉ាងណា វានៅតែមានមកជាហូរហែរឥតលោះសម័យកាលណាមួយឡើយ។

យ៉ាងណាមិញ ក្នុងនេះក៏មានប្រិយមិត្តកម្ពុជាថ្មី តែងចង់ដឹងពីមិត្តទ្រុស្តមិត្តឲ្យកាន់តែច្បាស់ ដើម្បីត្រៀមខ្លួនប្រុងប្រយ័ត្ននូវជំពូកមិត្តប្រភេទនេះ កុំឲ្យមកកៀកខ្លួន នាំអាសាបង់ខាតចិត្តជាមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១ ចាំទ្រគ្រប់ទង្វើដែលយើងធ្វើ

សាកល្បងសង្កេតមើលមនុស្សដែលចូលមករាប់អានអ្នកសិនមើល ថាតើគេមានសកម្មភាពនេះ បង្ហាញឲ្យឃើញដែរទេ។ ហេតុអ្វីយើងខ្ញុំហ៊ានថាដូច្នោះ ដោយសារជំពូកនេះ និយមអែបអបមិត្តជាទម្លាប់មកជាយូរលង់ ដើម្បីទាមទារចំណាប់អារម្មណ៍។ ប្រភេទមនុស្សក្រុមនេះ អាចថាខ្វះក្ដីស្រលាញ់ ព្រោះជាតិមុនសាងបាបកម្មច្រើន (នេះបើគិតតាមជំនឿនៃសាសនា) ហើយជាតិនេះបន្តសាងបាបលើសដើម ព្រោះគ្មានសេចក្ដីល្អ ចេញពីក្នុងចិត្តដូចគេឯង។

២ ពូកែបញ្ចុកបន្សី ទិញរបស់ផ្គាប់ចិត្តហូរហែ

នេះមិនមែនមានន័យថា មនុស្សដែលជូនអំណោយឲ្យយើង សុទ្ធតែជាប្រភេទមិត្តទ្រុស្តមិត្ត ឬល្អក្រៅស្អុយក្នុងនោះទេ។ ក្នុងនោះក៏មានមិត្តល្អៗ ដែលយើងគួរស្រវាគេទុកជាមិត្តអវសានផងដែរ។ ដោយឡែកសម្រាប់ប្រភេទមិត្តពូកែបញ្ចុកបន្សី ទិញរបស់ផ្គាប់ចិត្តយើងហូរហែ នោះអត់ពិបាកមើលទេ (ខ្លាចតែយើងនេះ ដឹងតែធ្វើមិនដឹង)។ មនុស្សនេះ ចូលចិត្តប្រើខ្សែភ្នែកក្រឡេបក្រឡាប់ សម្លឹងរាងកាយយើងពីចុងជើងដល់សក់ក្បាលដោយស្ងៀមស្ងាត់ បន្ទាប់គេនោះ នឹងចូលមើលទិន្នន័យផ្ទាល់ខ្លួនយើង ដើម្បីងាយស្រួលយកចំណុចនោះ មកទាក់ទាញយើងវិញ។

៣ មួយថ្ងៃៗមានបញ្ហាបង្ករឿងមិនចេះចប់ដល់គ្រួសារ

ជឿឬអត់ថា មនុស្សខ្លះចូលចិត្តនាំបញ្ហាក្ដៅទ្រូង បែបស្ងប់ស្ងាត់ មិនឲ្យមនុស្សផ្សេងមើលគេដឹង។ យើងខ្ញុំអាចបង្ហាញជូនបានថា ពពួកជំពូកប្រភេទនេះ មិនសូវជាគោរពឪពុកម្ដាយទេ ចូលចិត្តនិយាយដើមលោកទាំងពីរ ឬប្រៀបធៀបឪពុកម្ដាយខ្លួនជាមួយគេអ្នកមានដទៃ។ នេះក៏ព្រោះតែ ឪពុកម្ដាយខ្លួនពុំមានលទ្ធភាពទិញរបស់ប្រេនៗ ឬសម្ភារៈនិយមឲ្យដូចគេ។

៤ ដើរចាក់ចេកចាក់ស្ករឲ្យគេឈ្លោះគ្នា

គេទម្លាប់បង្កើតបញ្ហា ទាក់ទាញចំណាប់អារម្មណ៍ ឲ្យអ្នកផ្សេងចូលចិត្ត បើអ្នកនោះចាក់មិនបាន គេនឹងទៅចាក់អ្នកផ្សេងឲ្យស្អប់យើងក៏មាន។ អ្នកត្រូវឆ្លាតវៃ សង្កេតមនុស្សប្រភេទនេះឲ្យមែនទែន ព្រោះពួកគេពូកែសម្ដែងថា ខ្លួនជាជនរងគ្រោះណាស់។ ប្រសិនបើយើងស្អប់ខឹងអ្នកណាម្នាក់ គេនឹងដឹងភ្លាម ហើយទៅនិយាយតែឈ្មោះបុគ្គលយើងស្អប់ ធ្វើយ៉ាងណា គឺឲ្យយើងក្ដៅចិត្ត ស្អប់បុគ្គលនោះលើសដើម។ នេះគេហៅថា ខ្ចីដៃយើងប្រើ ដោយមិនប្រឡាក់ឈាមសូម្បីមួយដំណក់សោះ។

៥ មានពិរុទ្ធគួរឲ្យសង្ស័យច្រើន

ធ្លាប់ជួបកំពូលមិត្តប្រភេទនេះដែរទេ? ក្នុងមួយជីវិតរបស់អ្នក យើងខ្ញុំជឿថា ប្រាកដជាបានជួបមិនខានឡើយ។ ទោះយ៉ាងណា ជាមិត្តត្រូវស្មោះត្រង់នឹងគ្នា មានបញ្ហាត្រូវរកដំណោះស្រាយ មិនមែនលាក់លៀម ធ្វើខ្លួនដូចជនសង្ស័យនោះទេ។ មិត្តខ្លះចូលមកទាញផលប្រយោជន៍ពីយើង ដើម្បីចង់ដឹងថាយើងនេះត្រូវធាតុជាមួយពួកគេឬអត់។បើត្រូវធាតុគេនឹងយកយើងជានុយធំប្រសិនបើយើងជាមនុស្សឆោតទៀតគឺទៅតាមហ្គេមដែលគេរៀបចំហើយ។

ទោះយ៉ាងណា យើងខ្ញុំសូំជូនពរឲ្យប្រិយមិត្តកម្ពុជាថ្មី កុំឲ្យជួបមនុស្សប្រភេទនេះក្នុងជីវិតឲ្យសោះ។ ប្រសិនបើបានជួបហើយ ចូរចងចាំទុក ហើយកត់ចំណាំមនុស្សប្រភេទនេះ មិនបាច់ទៅខឹងស្អប់គេ ដែលគេធ្វើឲ្យយើងខកចិត្ត ខឹងខ្លួនឯងដែលរំពឹងខ្ពស់ពេក ពីប្រភេទមនុស្សមិនសក្ដិសម ។ ជាពិសេសចូរចងចាំថា មនុស្សបាតដៃខ្នងដៃ ទោះចំណេញ១០០ល្អី សឹងកុំរកស៊ីចូលឲ្យសោះ៕

អត្ថបទ៖ សន្តិភាព

ចុចអាន៖នៅឲ្យឆ្ងាយពីមនុស្សអវិជ្ជមាន បើមិនចង់ជួបវិបត្តិ ៦យ៉ាងនេះ

ចុចអាន៖មនុស្សអវិជ្ជមាន សម្គាល់តាមចរិតរិះគន់និងវិភាគស្វែងរកតែកំហុសអ្នកដទៃ