ចម្លែកណាស់! ជនជាតិភាគតិចចិន អាចការជាមួយគ្នាបានឬមិនបាន អាស្រ័យលើថ្លើមមាន់

ក្រុមនុស្សនៅក្នុងសហគមន៍ជនជាតិភាគតិច Daur នៃប្រទេសចិន មានជំនឿខ្លាំងលើថ្លើមមាន់ ក្នុងការកំណត់ជោគជតាគូស្នេហ៍ដែលបម្រុងនឹងរៀបការ ប្រសិនបើថ្លើមមាន់ពុំមានសុខភាពល្អ ពួកគេមិនអាចរៀបការបានឡើយ។

ប្រទេសចិនមានទំនៀមទម្លាប់ចម្លែកមួយ ដែលមានចាប់កំណើត​តាំងប្រទេសកកើតដំបូងមកម្ល៉េះ។ វាជាប្រពៃណីរបស់អ្នកស្រុក Daur ដែលពួកគេរស់នៅពឹងផ្អែកលើការបរបាញ់ កសិកម្ម និងនេសាទ។ ប្រជាជន Daur ភាគច្រើនរស់នៅតំបន់ស្វយ័តម៉ុងហ្គោលីខាងក្នុង និងខេត្ត Heilongjiang ខណៈដែលអ្នកខ្លះរស់នៅក្នុងតំបន់ស្វយ័ត Xinjiang Uygur ។

ប្រពៃណីនេះ កើតឡើងជាយូរយារមកហើយ និងនៅតែបន្តអនុវត្តចំពោះកូនកំលោះកូនក្រមុំ នាពេលបច្ចុប្បន្ន។ នៅមុនពេលពួកគេរៀបអាពាហ៍ពិពាហ៍មួយខែ គេឱ្យកូនកំលោះ-ក្រមុំ ហែកទ្រូងមាន់ ហើយយកថ្លើមវាចេញមក ដើម្បី​ទស្សន៍ទាយរាសី និងពាលារៀបការ។ ​បើ​ថ្លើម​មាន​សុខភាព​ល្អ មិនមានការខូចខាត ឬខ្ទេចខ្ទាំដោយប្រការណាមួយទេ ចំណង​អាពាហ៍ពិពាហ៍​របស់​គូស្នេហ៍​ អាចប្រព្រឹត្តទៅបាន។ ផ្ទុយទៅវិញ បើ​ថ្លើម​មាន់​មាន​ការ​ខ្វះ​ខាត ខ្ទាំខ្មៅខុសពីធម្មតា ឬ​ថ្លើម​មាន់​ខ្សោយ ​ត្រូវ​ចាត់​ទុក​ជា​ប្រផ្នូល​អាក្រក់ គេ​​មិន​អនុញ្ញាត​ឱ្យ​គូស្នេហ៍​​រៀប​ការដាច់ខាត។ ​ហើយដើម្បីអាចរៀបការបាន ចាស់ទុំឱ្យសាមីខ្លួន ហែកទ្រូងមាន់ យកថ្លើមម្ដងទៀត ប្រសិនវានៅល្អ អាពាហ៍ពិពាហ៍ នឹងត្រូវអនុញ្ញាតឱ្យរៀបចំ។

មិនខុសពីប្រពៃណីទូទៅ ក្នុងប្រទេសចិននោះទេ ប្រសិនការរៀបមង្គលការ អាចប្រារព្ធបាន ក្រោយថ្លើមមាន់មានសុខភាពល្អ កូនក្រមុំជនជាតិភាគតិច Daur នឹងមិនត្រូវបានទទួលដោយកូនកំលោះ ឬសាច់ញាតិខាងកូនប្រុសឡើយ។ កូនក្រមុំត្រូវបង្ហែពីព្រឹកព្រលឹម អមដោយសាច់ញាតិវ័យក្មេងជាច្រើននាក់មកពីគ្រួសាររបស់នាងផ្ទាល់ ទៅគ្រួសាររបស់កូនកំលោះ ដើម្បីរៀបចំពិធី។ នៅតាមផ្លូវ​ណា​ទាំងកូនក្រមុំ និង​សាច់​ញាតិ ទោះបីអាឡោះអាល័យគ្នាប៉ុនណាក៏ដោយ ហាមយំដាច់ខាត ​ម្នាក់ៗត្រូវច្រៀង​ឱ្យសប្បាយ​រីករាយ​ រហូតដល់គេហដ្ឋានខាងប្រុស៕

ប្រែសម្រួល៖ សន្យា

ចុចអាន៖ ស្ត្រីកុលសម្ព័ន្ធមួយ ពាក់ចានបបូរមាត់ឲ្យកាន់តែធំ បើចង់បានថ្លៃបណ្ណាការខ្ពស់