មករំលឹកពីសត្វស្វាសមុទ្រ ក្មេងៗកាលពីជំនាន់ ៩០ ចូលចិត្តលេង

សត្វស្វាសមុទ្រមិនមែនមានរូបរាងដូចសត្វស្វាគោកហើយមានកន្ទុយត្រីទេ វាជាប្រភេទបង្គាទឹកប្រៃស្រដៀងសត្វល្អិតតូចៗ និងមានកាយវិការហែលទឹកស្រដៀងទៅនឹងទេពអប្សរសមុទ្រ។ កាន់តែពិសេសជាងសត្វចិញ្ចឹមផ្សេងៗគឺត្រង់ចំណុច សត្វស្វាសមុទ្រមិនមែនជាសត្វដែលមានពីធម្មជាតិទេ វាត្រូវបង្កើតឡើងដោយលោក Harold Nathan Braunhut នៅឆ្នាំ១៩៥៧ ក្នុងឡាបូពិសោធន៍។

កាលនោះលោក Harold Nathan Braunhut ចាប់ផ្ដើមលក់ស្វាសមុទ្រនៅឆ្នាំ១៩៦០ ដោយហៅផលិតផលនោះថា “មានជីវិតភ្លាមៗ-Instant Life” នៅក្នុងកញ្ចប់សម្រាប់លក់មាន ពងស្វាសមុទ្រ និងចំណីស្វាមួយកញ្ចប់ ចំណែកឯកែវចិញ្ចឹមអ្នកត្រូវរកទិញដោយខ្លួនឯង។ សត្វស្វាសមុទ្រគឺជាសត្វចិញ្ចឹមដ៏ល្អបំផុតសម្រាប់មនុស្សកំពូលរវល់ អ្នកមិនចាំបាច់នាំវាដើរលេងកាត់ស្ត្រេស ងាយស្រួលយកតាមខ្លួនពេលមានភារកិច្ចទៅតាមខេត្ត អាចដាក់ក្នុងការិយាល័យមួយកន្លែង មិនបង្កសម្លេងរំខាន ថែមទាំងអាចដាក់ក្នុងនាឡិកាដៃទៀតផង។ ខុសពីសត្វដទៃ ស្វាសមុទ្រដកដង្ហើមតាមជើង និងកើតមកជាមួយភ្នែកតែមួយប៉ុណ្ណោះរហូតដល់ពេញវ័យទើបដុះភ្នែក៣វិញ សូម្បីតែចំណង់ចំណូលចិត្តវាក៏ប្លែកដែរ វាចូលចិត្តពន្លឺណាស់ រាល់ពេលអ្នកឆ្លុះពិលទៅកន្លែងណាមួយវានឹងហែលតម្រង់ទៅទីនោះ។ 

សព្វថ្ងៃយើងអាចរកទិញស្វាសមុទ្រខាងលើនេះតាម Amazon បាន ផលិតផលនឹងមកជាមួយកែវចិញ្ចឹមរួចស្រេចមិនពិបាកដូចជំនាន់មុនទេ។ សូមបញ្ជាក់ដែរថា ស្វាសមុទ្រ ជាសត្វបង្កើតក្នុងឡាបូក៏ពិតមែន ប៉ុន្តែវាមិនបំពុលឬបំផ្លាញបរិស្ថានសោះឡើយ ចំណុចអន់តែមួយគត់របស់វាគឺ ឆាប់ស្លាប់និងងាយស្លាប់៕

ប្រែសម្រួលដោយ៖ វារី

ចុចអាន៖ សត្វសមុទ្រដ៏ចម្លែក មានរូបរាងស្រស់ស្អាត តែអាចបង្កគ្រោះថ្នាក់ខ្លាំង

ចុចអាន៖ សត្វល្អិតសមុទ្រមួយប្រភេទ មានរាងដូចទេពអប្សរ