សត្វល្អិតសមុទ្រមួយប្រភេទ មានរាងដូចទេពអប្សរ

កន្លងមកអ្នកធ្វើការនៅសមុទ្រឧស្សាហ៍ជួបប្រទះនឹងពួកសត្វល្អិតនេះក្រោមផ្ទៃទឹកណាស់ គេហៅវាថា “ទេពអប្សរសមុទ្រ (Sea-Angel)” ។ សត្វទេពអប្សរសមុទ្រគឺជាសត្វល្អិតតូចៗមានប្រវែងធំអស់ត្រឹម ៧សង់ទីម៉ែត្រ ពួកវាបានឈ្មោះនេះមកពីស្លាបដ៏គួរឲ្យទាក់ទាញលើខ្លួនរបស់វា រាល់ពេលវាហែលម្ដងៗគួរឲ្យគយគន់ណាស់ ជាពិសេសរាងកាយថ្លាអាចមើលធ្លុះដល់គ្រឿងក្នុងនឹងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Sea-Angel មិនត្រឹមតែមានរូបរាងគួរឲ្យចាប់អារម្មណ៍នោះទេ វាថែមទាំងអាចផ្លាស់ប្ដូរភេទទៀតផង ចំណែកឯការបន្តពូជរបស់វាវិញរឹតតែល្អមើលមិនអាក្រក់ដូចសត្វដទៃ បែរជាដូចគូស្នេហ៍រាំលេងទៅវិញ។ ការពិតទៅពីកំណើតមកវាមានសំបកដូចខ្យង ប៉ុន្តែដល់ធំពេញវ័យវាមិននៅក្នុងសំបកទៀតទេប្រៀបដូចមេអំបៅដែរ យ៉ាងណាក្ដីអ្នកកុំយល់ច្រឡំថាវាជាមិត្តភក្តិនឹងមេអំបៅសមុទ្រឲ្យសោះ​ ព្រោះថាមេអំបៅសមុទ្រជាចំណីរបស់ទេពអប្សរសមុទ្រនេះទេ។ ឈ្មោះជាទេពអប្សរមែនតែស៉ីសាច់ បើនិយាយពីតិចនិកសម្លាប់វិញគឺមានខុសៗគ្នាទោះបីជាសត្វប្រភេទតែមួយក៏ដោយ ពួកវាហែលទឹកលឿនជាងចំណីរបស់វាដល់ទៅពីរដងឯណោះ។ 

ជាក់ស្ដែងទេពអប្សរសមុទ្រមានអាយុកាលប្រហែល ១៣០លានឆ្នាំមកហើយមានន័យថា ពួកគេបានរួចផុតពីព្រឹត្តិការណ៍នៃការផុតពូជដ៏ធំមួយ ហើយអ្នកវិទ្យាសាស្ត្រកំពុងសិក្សាពួកវាដើម្បីមើលថាតើពួកគេមានគន្លឹះបង្រៀនយើងអំពីភាពធន់ដែរឬអត់។ ក្រៅពីនេះអ្នកគួរដឹងថា សំបករបស់មេអំបៅសមុទ្រមានលក្ខណៈស្តើងងាយរលាយក្នុងទឹកសមុទ្រដែលមានជាតិអាស៊ីតខ្លាំងពេក ដូច្នេះជាតិអាស៊ីតក្នុងសមុទ្រដែលបណ្ដាលមកពីមនុស្សកំពុងបំផ្លាញចំណីរបស់ទេពអប្សរសមុទ្របណ្ដើរៗហើយ៕

ប្រែសម្រួលដោយ៖ វារី

ចុចអាន៖ សត្វសមុទ្រដ៏ចម្លែក មានរូបរាងស្រស់ស្អាត តែអាចបង្កគ្រោះថ្នាក់ខ្លាំង