ផ្កាយសមុទ្រជាសត្វសមុទ្រដែលមិនអាចអត់ទឹកសូម្បីមួយនាទី វាមានប្រហែល ២០០០ ប្រភេទ ហើយមានពណ៌និងរូបរាងខុសៗគ្នាសឹងទាំងអស់ ។ ក្រៅពីនេះផ្កាយសមុទ្រនៅមានចំណុចគួរឲ្យចាប់អារម្មណ៍ច្រើនទៀតដែលអ្នកគួរដឹងដូចជា ៖

១. ផ្កាយសមុទ្រមិនមែនប្រភេទត្រីទេ

ត្រីផ្កាយ ឬ ផ្កាយសមុទ្រជាសត្វឥតឆ្អឹងខ្នងដូច្នេះវាមិនរាប់ក្នុងប្រភេទត្រីទេ ។

២. ផ្កាយសមុទ្រមិនមានរូបផ្កាយទាំងអស់ទេ

ផ្កាយសមុទ្រភាគច្រើនត្រូវយើងសម្គាល់ដោយជើង ៥ ដូចផ្កាយ ប៉ុន្តែផ្កាយសមុទ្រផ្សេងទៀតដូចជា Crown-of-thorns វាមានជើងដល់ទៅ ២១ ឯណោះ ។

៣. ផ្កាយសមុទ្រមានជើងបំពង់

អ្នកអាចសង្កេតឃើញជើងបំពង់របស់វាជាប់ជើងគោល ជើងនេះហើយដែលជួយឲ្យផ្កាយសមុទ្រផ្លាស់ទីនិងបញ្ចេញសារជាតិម្យ៉ាងស្អិតដូចកាវដើម្បីភ្ជាប់ខ្លួនទៅនឹងវត្ថុណាមួយកុំឲ្យរលកបក់បោក ។

៤. ផ្កាយសមុទ្រអាចបណ្ដុះអវយវៈដែលបាត់បង់ឡើងវិញ

ក្នុងករណីគ្រោះថ្នាក់ដាច់ជើង ឬដាច់ខ្លួនទាំងស្រុង ផ្កាយសមុទ្រអាចបណ្ដុះអវយវៈឡើងវិញបានដូចឈ្លើងដែរ ទោះបីវានៅសល់តែជើងមួយក៏ដោយ ។ 

៥. ផ្កាយសមុទ្រអត់មានឈាម

ផ្កាយសមុទ្រមានប្រព័ន្ធសរសៃឈាមទឹក ប្រព័ន្ធនេះដែរមានប្រឡាយតភ្ជាប់ជើងបំពង់បូមទឹកសមុទ្រចម្រោះហើយបញ្ជូនសារធាតុចិញ្ចឹមតាមរយៈប្រព័ន្ធសរសៃប្រសាទរបស់វាទៅកាន់ពាសពេញរាងកាយ ។

៦. ផ្កាយសមុទ្រជាសត្វស៊ីសាច់ជាអាហារ

រូបរាងគួរឲ្យស្រលាញ់មែន ប៉ុន្តែវាស៊ីត្រី អយស្ទ័រ គ្រំ លៀសជាអាហារ ជួនកាលស៊ីទាំងគ្នាឯងទៀតផង អ្វីដែលកាន់តែចម្លែកគឺផ្កាយសមុទ្រស៊ីអាហារតាមជើង ។

គួរបញ្ជាក់ដែរថាផ្កាយសមុទ្រអាចរស់នៅបានរហូតទៅដល់ ៣៥ ឆ្នាំជាមធ្យម ប៉ុន្តែផ្កាយសមុទ្រដែលនៅក្នុងសួនសត្វរស់ត្រឹមតែ ៥-១០ ឆ្នាំ ប៉ុណ្ណោះ ចំណែកឯផ្កាយសមុទ្រកម្រកំពុងជិតដាច់ពូជស្ថិតក្នុងបញ្ជីក្រហម IUCN គឺ ផ្កាយសមុទ្រផ្កាឈូករ័ត្ន ៕

ប្រែសម្រួល ៖ វារី

ចុចអាន ៖ សត្វ ៥ ប្រភេទ មានជីវិតរស់នៅយូរជាងគេបំផុត លើពិភពលោក