អ្នកជំនាញប្រាប់ពីមូលហេតុ ឧស្សាហ៍ជ្រុះរោមភ្នែក

រោមភ្នែកជ្រុះដោយធម្មជាតិហើយដុះវិញរៀងរាល់ ៦ ទៅ ១០ សប្តាហ៍ ដូច្នេះវាជារឿងធម្មតាក្នុងការជ្រុះរោមភ្នែកពី ១ ទៅ ៥ សរសៃក្នុងមួយថ្ងៃ។ ​ប៉ុន្តែកត្តាខ្លះក៏ធ្វើឲ្យរោមភ្នែកជ្រុះខុសពីធម្មជាតិដែរមានដូចជា៖

១. ការត្រដុសនិងការកកិតខ្លាំងពេក

ការសម្អាតគ្រឿងសម្អាងមុនចូលគេង ត្រូវជូតនៅបរិវេណភ្នែកថ្នមៗជៀសវាងការកកិតខ្លាំងធ្វើឲ្យជ្រុះរោមភ្នែក។

២. ម៉ាស់បិទភ្នែកគេង

ម៉ាស់ប្រភេទនេះសង្កត់និងកកិតភ្នែក ធ្វើឲ្យរោមភ្នែកជ្រុះដោយសារសម្ពាធពីម៉ាស់។

៣. ឆ្លងបាក់តេរី

ភាគច្រើនបណ្ដាលមកពីគ្រឿងសម្អាងហួសកំណត់។

៤. ប្រតិកម្មអាឡ័កស៉ី

ក្នុងករណីសង្ស័យថាប្រតិកម្មនឹងផលិតផល អ្នកត្រូវបញ្ឈប់ការប្រើប្រាស់និងស្វែងរកមូលហេតុពិតប្រាកដ។

៥. រោមភ្នែកសប្បនិម្មិត

មានមនុស្សភាគច្រើនប្រតិកម្មជាមួយកាវតរោមភ្នែក ពេលខ្លះបកមកដោយទាំងរោមភ្នែកមែនទែនទៀតផង។ អ្នកជំនាញណែនាំឲ្យប្រើប្រេងលាងសម្អាតជំនួសការយកកាវចេញទាំងឆៅវិញ។

ក្នុងករណីអ្នកកំពុងជួបប្រទះបញ្ហាដូចខាងក្រោម ត្រូវទៅពិគ្រោះជាមួយគ្រូពេទ្យជាបន្ទាន់៖

៦. ជំងឺក្រពេញទីរ៉ូអ៊ីត

ក្រពេញទីរ៉ូអ៉ីតមាននាទីគ្រប់គ្រងអរម៉ូនក្នុងរាងកាយ បញ្ហាក្រពេញអាចធ្វើឲ្យជ្រុះរោមភ្នែក។

៧. ជំងឺ Blepharitis

ជំងឺនេះគឺជាជំងឺដែលស្ទះក្រពេញ វាកើតឡើងដោយសារបាក់តេរីដែលរស់នៅតាមបន្ទាត់រោមភ្នែក ត្របកភ្នែកមានសភាពក្រហាយ រលាក ក្រហម មានទឹកភ្នែក និងជ្រុះរោមភ្នែក។

៨. ជំងឺ Trichotillomania

Trichotillomania គឺជាជំងឺអាកប្បកិរិយាដែលអ្នកជំងឺដករោមភ្នែកចេញដោយសារតែភាពតានតឹង វាក៏អាចជាជំងឺហ្សែនផងដែរ។

៩. ជំងឺមហារីក

មហារីក​ស្បែក​ត្របកភ្នែក​អាច​នាំឱ្យ​បាត់បង់​រោមភ្នែក ព្រោះ​មហារីក​ប៉ះពាល់​ដល់​ឫសសក់។

ខណៈរោមភ្នែកជ្រុះ មានមនុស្សភាគច្រើនកំពុងស្វែងរកផលិតផលបណ្ដុះរោមភ្នែកដូចគ្នា ដូច្នេះសូមប្រុងប្រយ័ត្ននិងជៀសវាងប្រើផលិតផលគ្មានស្តង់ដារមកលើភ្នែក៕

ប្រែសម្រួលដោយ៖ វារី

ចុចអាន៖ ស្រីៗនិយមតរោមភ្នែក ត្រូវដឹងពីផលប៉ះពាល់ និងការបង្កគ្រោះថ្នាក់

ចុចអាន៖ គ្រោះថ្នាក់ទាំង ៥ នៃការប្រើប្រាស់ រោមភ្នែកក្លែងក្លាយ