សត្វទាព្រៃស្លាបស ដ៏កម្ររបស់ពិភពលោក មានវត្តមាននៅកម្ពុជា ចន្លោះ ២០-៣០ ក្បាល

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ ក្រសួងបរិស្ថាន បានលើកឡើងនៅថ្ងៃនេះថា បច្ចុប្បន្ននេះ កម្ពុជាមានទាព្រៃស្លាបសដែលជាប្រភេទសត្វកម្ររងគ្រោះថ្នាក់ជិតផុតពូជលើពិភពលោកស្ថិតនៅក្នុងបញ្ជីក្រហមរបស់អង្គការ IUCN ចន្លោះពី ២០ ទៅ ៣០ ក្បាល។

លោក នេត្រ ភក្ត្រា បញ្ជាក់បន្ថែមថា វត្តមានសត្វទាព្រៃស្លាបសនៅកម្ពុជាបានធ្វើឱ្យកម្ពុជា ​គឺជាប្រទេសមួយ​ក្នុងចំណោមប្រទេសចំនួន៩ ក្នុងទ្វីបអាស៊ី ដែលមានវត្តមាន​ទាព្រៃស្លាបសរស់នៅ។

លោក នេត្រ ភក្ត្រា ​រដ្ឋលេខាធិការ​ និងជាអ្នកនាំពាក្យ​ក្រសួង​បរិស្ថាន​ បានមានប្រសាសន៍ប្រាប់ “កម្ពុជាថ្មី” ថា ក្រសួង និងដៃគូការងារនឹងបន្តការថែរក្សាជីវចម្រុះ តំបន់អភិរក្ស និងសត្វព្រៃនៅក្នុងតំបន់ព្រៃទេសភាព ព្រមទាំងបន្តអប់រំ ផ្សព្វផ្សាយបន្ថែមទៀត ដើម្បីឱ្យមានការចូលរួមការពារថែរក្សា ហើយបញ្ឈប់ការដាក់អន្ទាក់ ការបរបាញ់ និងការហូបសាច់ព្រៃ។

យោងតាមរបាយការណ៍សិក្សា បង្ហាញថា ទាព្រៃស្លាបសមានចំនួនតិចជាង ១០០០ ក្បាល នៅលើពិភពលោក និងមានវត្តមានតិចតួចរស់នៅក្នុងប្រទេសកម្ពុជា។ ទាព្រៃ​ស្លាបស​​ចូលចិត្ត​ធ្វើ​សំបុក​នៅក្នុង​រន្ធ​ឈើ នៅលើ​ដើមឈើ​ចាស់ៗ៕