បវរកញ្ញាចក្រវាល ២០២២ ចេះដល់ទៅ ៦ភាសា ថែមទាំងមានប្រវត្តិការអប់រំខ្ពស់ទៀត

R’Bonney Gabriel គឺជាម្ចាស់មកុដបវរកញ្ញាចក្រវាល ឆ្នាំ២០២២ និងជាបវរកញ្ញាមានអាយុចាស់ជាងគេ (២៨ឆ្នាំ) ​ក្នុងប្រវត្តិសាស្ត្រមកុដ Miss Universe ជាង ៧០ជំនាន់មកនេះ។ នាងបានក្លាយជាបេក្ខនារីទី៩ មកពីសហរដ្ឋអាមេរិកដែលបានឈ្នះពានរង្វាន់ Miss Universe ខណៈសាវតារបស់បវរកញ្ញា USA រូបនេះ មហាជនបានដឹងហើយ ពិតជាស្ងើចសរសើរគ្រប់គ្នា។

R’Bonney Gabriel ជាកូនកាត់ហ្វីលីពីន-អាមេរិក មានឈ្មោះពេញថា R’Bonney Nola Gabriel កើតថ្ងៃទី២០ ខែមីនា ឆ្នាំ១៩៩៤ នៅទីក្រុង Houston រដ្ឋតិចសាស់ ដែលមានឪពុកជនជាតិហ្វីលីពីន និងម្តាយជនជាតិអាមេរិក ។ នាងជាកូនពៅក្នុងគ្រួសារ ដែលមានបងប្រុស ៣នាក់។

បវរកញ្ញា Gabriel បានបញ្ចប់ការសិក្សាបរិញ្ញាបត្រផ្នែករចនាម៉ូដ ( Fashion Designer ) ពីសាកលវិទ្យាល័យ North Texas ។ អ្វីដែលកាន់តែគួឱ្យចាប់អារម្មណ៍ពី Gabriel គឺនាងអាចនិយាយបាន ៦ភាសាឯណោះរួមមាន ភាសាហ្វីលីពីន អង់គ្លេស វៀតណាម ឥណ្ឌូនេស៊ី អេស្ប៉ាញ និងបាំរាំង។

បច្ចុប្បន្ននាងជាតារាបង្ហាញម៉ូដល្បីល្បាញមួយរូបនៅរដ្ឋតិចសាស់ និងជាសាស្រ្តាចារ្យផ្នែកកាត់ដេរផងដែរ។ មិនតែប៉ុណ្ណោះ Gabriel ជាអ្នករចនាម៉ូដផ្នែកសរសៃសូត្រ និងវត្ថុធាតុដែលមិនប៉ះពាល់ដល់បរិស្ថាន និងផលិតសម្លៀកបំពាក់ដោយដៃផ្ទាល់ (Home made) ។

នៅដើមឆ្នាំ២០២៣នេះ ក្នុងនាមជាម្ចាស់តំណែង Miss Universe USA ឆ្នាំ២០២២ បវរកញ្ញាវ័យ ២៨ឆ្នាំរូបនេះបានតំណាងឱ្យសហរដ្ឋអាមេរិកចូលរួមនៅក្នុងកម្មវិធី Miss Universe 2022 និងដណ្ដើមបានជយលាភីឯក ក្លាយម្ចាស់​​មកុដ​ MU ឆ្នាំ២០២២៕

ប្រែសម្រួល៖ សន្យា

ចុចអាន៖ ថ្ងៃផ្ទេរមកុដ បវរកញ្ញាចក្រវាល ២០២១ រងពាក្យរិះគន់លើរូបរាង ទោះដឹងថានាងមានជំងឺធ្វើឱ្យលើសទម្ងន់