អ្នកឧកញ៉ា គិត ម៉េង ប្រាប់ថា មានឥរិយាបថ​១២ចំណុចនេះ អ្នកនឹងមិនខ្វះឡើយអ្នករាប់រក!

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាអ្នកជំនួញដ៏ល្បីល្បាញមួយរូប បានសរសេរណែនាំមនុស្ស ១២ចំណុច ពីឥរិយាបថល្អៗដែត្រូវប្រកាន់ខ្ជាប់ខ្លួនជានិច្ចក្នុងការធ្វើទំនាក់ទំនងជាមួយមនុស្សជុំវិញខ្លួន ដើម្បីបង្ហាញពីក្តីគោរពរបស់ខ្លួនចំពោះអ្នកដទៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិតណាស់ សេចក្តីគោរព ឱ្យតម្លៃ ឱនលំទោន ចំពោះមនុស្សដែលនៅជុំវិញខ្លួន គឺជារឿងមួយដែលមនុស្សគ្រប់រូបត្រូវតែប្រកាន់ខ្ជាប់ក្នុងខ្លួន ដើម្បីបង្ហាញពីតម្លៃរបស់ខ្លួនផង និងមនុស្សដែលបានធ្វើទំនាក់ទំនងជាមួយផង។ ជាពិសេស គឺការឱ្យតម្លៃ ការគោរពនេះហើយ នឹងធ្វើឱ្យកាន់តែមានទំនាក់ទំនងច្រើន និងគង់វង្ស ព្រោះមនុស្សម្នាក់ៗមិនអាចគ្មានការប្រាស្រ័យទាក់ទងគ្នានៅក្នុងសង្គមបាននោះទេ។

តាមរយៈទំព័រហ្វេសប៊ុកកាលពីថ្ងៃទី ១៩ ខែធ្នូ ឆ្នាំ២០២៣ អ្នកឯកញ៉ា គិត ម៉េង បានសរសេររៀបរាប់ថា មនុស្សយើងប្រាស្រ័យទាក់ទងគ្នាគ្រប់ពេលវេលា ហើយនៅពេលដែលយើងជួបអ្នកដទៃ យើងត្រូវបង្ហាញខ្លួនយើងប្រកបដោយភាពវិជ្ជមាន និងប្រកាន់យកអាកប្បកិរិយាដែលសង្គមអាចទទួលយកបាន។ ជាទូទៅ អាកប្បកិរិយាទាំងនេះ គឺជាជំនឿ និងឥរិយាបថដែលមិនត្រូវបានកត់ត្រាជាក្បួនច្បាប់អ្វីទេ ហើយត្រូវបានចាត់ទុកថាអាចទទួលយកបាននៅក្នុងវប្បធម៌ជាច្រើន។

អ្នកជំនួញរូបនេះ បានលើកឡើងពី១២ចំណុចនៃឥរិយាបថបុគ្គលទូទៅដែលគួរតែមាន នោះ គឺទី១.ត្រូវរក្សាស្នាមញញឹមជានិច្ចនៅគ្រប់ទីកន្លែងដែលអ្នកបានទៅ ព្រោះស្នាមញញឹមផ្តល់ភាពវិជ្ជមានដល់មនុស្សដែលអ្នកបានជួប និងខ្លួនឯងផ្ទាល់។ ទី២. និយាយថា សូមអធ្យាស្រ័យ និងអរគុណ ដើម្បីរក្សាឥរិយាបថល្អ និងត្រូវបានគេកោតសរសើរគ្រប់ទីកន្លែង។ ទី៣.ស្តាប់ដោយយកចិត្តទុកដាក់នៅពេលដែលនរណាម្នាក់និយាយផ្ទាល់ទៅកាន់អ្នក។ ទី៤. កុំនិយាយកាត់សម្តីគេ អ្នកអាចនិយាយ ឬ បញ្ជាក់បន្ថែមបាននៅពេលដែលគេនិយាយចប់ ហើយទី៥. រឿង២ ដែលអ្នកមិនគួរផ្តល់ឱ្យ លុះត្រាតែមានការស្នើសុំ នោះគឺ យោបល់ និងដំបូន្មាន។

ទី៦. កុំក្បត់នឹងពាក្យសន្យារបស់អ្នក ឬកុំសន្យា ប្រសិនជាអ្នកមិនប្រាកដថាអ្នកអាចរក្សាការសន្យានោះបាន ឯទី៧. កុំវាយតម្លៃនរណាម្នាក់ដោយគ្រាន់តែឃើញសម្បកក្រៅរបស់គេ និងទី៨. និយាយពាក្យសុំទោសនៅពេលដែលអ្នកធ្វើខុស ។ ទី៩. កុំទៅជិតរហូតប៉ះអ្នកដទៃ និងគោរពឯកជនភាពរបស់ពួកគេ ខណៈទី១០. នៅពេលមាននរណាម្នាក់អញ្ជើញអ្នកចូលរួមកម្មវិធីអ្វីមួយ សូមឆ្លើយតបទៅកាន់គេ ដើម្បីឱ្យបានដឹងថា អុ្នកបានចូលរួម ឬអត់។ ទី១១.ពេលវេលាសំខាន់ណាស់ ដូចនេះ ត្រូវគោរពពេលវេលាឱ្យបានល្អ ហើយចំណុចចុងក្រោយ គឺត្រូវចេះឈរតម្រង់ជួរនៅពេលទៅកន្លែងណាដែលតម្រូវឱ្យមានមនុស្សតម្រង់ជួររង់ចាំ៕