Connect with us

ព័ត៌មានជាតិ

អគារធំមន្ទីរទេសចរណ៍ខេត្តបាត់ដំបង ជាទីតាំងស្នូលបង្កប់​វប្បធម៌ចម្រុះ​សម័យ​អាណានិគម​បារាំង​

បានផុស

នៅ

អគារ​ធំ​នៃ​មន្ទីរ​ទេសចរណ៍​ខេត្ត​បាត់ដំបង ដែល​ស្ថិត​នៅ​ចំ​ពី​មុខ​សាលា​ខេត្ត​បាត់ដំបងត្រូវ​បាន​គេ​ចាត់​ទុក​ថា​ ជាទី​តាំង​ស្នូល​​នៃ​ទី​ក្រុង ដែល​មាន​លក្ខណៈ​បង្កប់​ដោយ​វប្បធម៌​ និង​ទេសចរណ៍​ចម្រុះ ស្រប​តាម​បណ្ដោយ​ផ្លូវ​លេខ​០១ ផ្នែក​ខាង​មុខ និង​រ៉ប​តាម​ដង​ស្ទឹង​សង្កែ​ផ្នែក​ខាង​ក្រោយ ក្នុង​ភូមិសាស្ត្រ ភូមិ​កម្មករ សង្កាត់​ស្វាយប៉ោ ក្រុង​បាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគារ​ធំ​នៃ​មន្ទីរ​ទេសចរណ៍​ខេត្ត​បាត់ដំបង​ ​មាន​ទី​តាំង​ស្ថិត​នៅ​ចំ​ពី​មុខ​សាលា​ខេត្ត​បាត់ដំបង។ ​អគារ​នេះ​​សាងសង់​​ឡើង​ជា​ភូមិ​គ្រឹះ​ស្នាក់​នៅ​របស់​អតីត​ចៅហ្វាយ​ខេត្ត​សម័យ​អាណានិគម​បារាំង​កំឡុង​ឆ្នាំ១៩១០-ឆ្នាំ១៩៤២ និងត្រូវ​បាន​សាងសង់​ឡើង​តាម​រចនាបថ​អាណានិគម ទាំង​ការ​ប្រើប្រាស់​ពណ៌ និង​មុខងារ​នៃ​ការ​ប្រើប្រាស់​ ហើយ​ក៏​ត្រូវ​បាន​គេ​សន្និដ្ឋាន​ថា ជា​អគារ​សម្រាប់​លំនៅ​ឋាន​អ្នក​ស្នាក់​នៅ​ដែល​គ្រប់គ្រង​ខេត្ត​នា​សម័យ​នោះ។

យ៉ាង​ណា​មិញ បាន​ជា​គេ​ចាត់​ទុក​ថា អគារ​ធំ​នៃ​មន្ទីរ​ទេសចរណ៍​ខេត្ត​បាត់ដំបង​ ជាទី​តាំង​ស្នូល​នៃ​ទី​ក្រុង ដែល​មាន​លក្ខណៈ​ប្រវត្តិ វប្បធម៌​ និង​ទេសចរណ៍​ចម្រុះ​ក៏​ព្រោះ​វា​មាន​​លក្ខណៈ​ពិសេស​នៃ​អគារ​សំខាន់​នៃ​មន្ទីរ​ទេសចរណ៍​ខេត្ត​បាត់​ដំបង​​នេះ​គឺ៖

  • ជា​ទម្រង់​ប្រអប់​​បញ្ឈរ មាន​កំពស់ ០១ជាន់
  • នៅ​ផ្នែក​ខាង​មុខ​នៃអគារ គឺ​មាន​ទ្វារ​ធំចំនួន ០១ បង្អូច​តូច​ទម្រង់​បញ្ឈរ​ចំនួន ០៤ និង​បង្អូច​ធំ​ចំនួន ០១
  • នៅ​ផ្នែក​ចំហៀង​ខាង​ជើង​អគារ​នេះ​ត្រូវ​បាន​រចនា​នូវ​ទ្វារ​​ចូល​ចំនួន០១ និង​បង្អួច​ចំនួន ០៦
  • នៅ​ផ្នែក​ខាង​ត្បូង អគារ​នេះ​បាន​រចនា​មាន​លក្ខណៈ​ប្លែក​យ៉ាង​ពិសេស​ដោយ​មាន​រាន​ហាន​ដែល​មាន​កម្ពស់​ប្រហែល​កន្លះ​ម៉ែត្រ និង​មាន​ទ្វារ​ចូល​ចំនួន០១ និង​បង្អួច​ចំនួន​០៧
  • នៅ​ផ្នែក​ជណ្ដើរ​អគារ​នេះ​ត្រូវ​បាន​គេ​រចនា​​ឡើង​មាន​លក្ខណៈ​បត់​កោង​រមួល​ឆ្ពោះ​ទៅ​ជាន់​ខាង​លើ ដោយ​​ប្រើប្រាស់​ឈើ និង​ជញ្ជាំង​​បេតុង មាន​ចោះ​រន្ធ​ពន្លឺ​​ចំនួន០៦ និង​ធ្នឹម​ភ្ជាប់​ជណ្តើរ​ខាង​លើគេ​ប្រើប្រាស់​​ប្រភេទ​ដែក​​អ៊ី
  • ការ​បើក​លំហ​ធំ​ៗ​នៃ​បង្អួច និង​ធ្វើ​ជា​លក្ខណៈ​ពិសេស​សម្រាប់​តំបន់​ត្រូពិក ដែល​អនុញ្ញាត​ឲ្យ​ខ្យល់ និង​ពន្លឺ​ចេញ​ចូល​​បាន បង្ក​លក្ខណៈ​​ងាយ​ស្រួល និង​ផាសុកភាព​ដល់​អ្នក​ប្រើប្រាស់​អគារ

នៅ​កំឡុង​ឆ្នាំ​១៩៩៧ អគារ​នេះ​​ត្រូវ​បាន​ប្រគល់​មក​ឲ្យ​ក្រសួង​ទេសចរណ៍ ដើម្បី​ប្រើប្រាស់​ជា​មន្ទីរ​ទេសចរណ៍​ខេត្ត​បាត់ដំបង មក​ដល់​បច្ចុប្បន្ន ហើយ​សព្វ​ថ្ងៃ​សំណង់​អគារ​នេះ​បាន​នឹង​កំពុង​ត្រូវ​បាន​ជួសជុល​ផង​ដែរ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម