មូលហេតុអាវនាគស្ដេចចិនភាគច្រើនពណ៌លឿងមាស តែអធិរាជផ្ដាច់ការ ឈិនស៊ី​ មានពណ៌ខ្មៅ

នៅក្នុងខ្សែភាពយន្តប្រវត្តិសាស្ត្រចិន​ យើងតែងតែឃើញអាវ​នាគ​របស់​អធិរាជ​បុរាណ​ភាគច្រើន​មាន​ពណ៌​លឿងឆ្អិនឆ្អៅបែកមាស។ ប៉ុន្តែ​មាន​ចំណុច​ចម្លែក​ខ្លាំង​មួយ​គឺ​ក្នុង​ចំណោម​អធិរាជ​ចិនគ្រប់អង្គ មាន​តែស្ដេចឈិនស៊ី​ (Qin Shi Huang) តែអង្គឯងគត់ដែលមាន​ពណ៌​ខ្មៅ​ខុសគេ។ តើនេះបណ្ដាលមកពីមូលហេតុអ្វីឲ្យពិតប្រាកដកើតលើទ្រង់?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឆ្នាំ ២២១ មុនគ្រឹស្តសករាជ ស្ដេចឈិនស៊ី​ បានបង្រួបបង្រួមតំបន់ទំនាបកណ្តាលទាំងមូល។ បន្ទាប់មក ព្រះអង្គបានចាប់ផ្តើមធ្វើកំណែទម្រង់ប្រទេសលើគ្រប់វិស័យ ទាំងការបង្រួបបង្រួម ឯកតារង្វាស់ ព្រមទាំងការសរសេរ ។ ក្នុងពេលដំណាលគ្នា​ ទ្រង់ក៏បានកែទម្រង់នូវសម្លៀកបំពាក់ឲ្យត្រូវនឹងអាកប្បកិរិយានិងចរិតលក្ខណៈរបស់មនុស្ស (សំលៀកបំពាក់បុរសដែលមានឋានៈខ្ពង់ខ្ពស់បំផុតក្នុងសម័យបុរាណ) និងប្រើប្រាស់ខ្មៅជាពណ៌ចម្បង។ ចាប់តាំងពីពេលនោះមក ពណ៌ខ្មៅបានក្លាយទៅជាពណ៌ដែលតំណាងឲ្យភាពថ្លៃថ្នូរ ប្រណីតភាព និងកត្តិនាមរបស់អ្នកស្លៀកពាក់។

មិនត្រឹមប៉ុណ្ណឹងទេ សូម្បីតែទស្សនវិទូចិន Zou Yan និងជាអ្នកនិពន្ធខាងវិញ្ញាណនៃសម័យសង្គ្រាម​​បានស្នើនៅក្នុងទ្រឹស្តីនៃគុណធម៌ទាំងប្រាំនិងភាពស្មោះត្រង់ដោយប្រើ “លោហៈ, ឈើ, ទឹក, ភ្លើង, ផែនដី” ដើម្បីពន្យល់ពីប្រភពដើមនៃអ្វីៗទាំងអស់របស់ពណ៌ខ្មៅ។ ​នៅក្នុង ទ្រឹស្តី​ Yin និង Yang ខ្មៅតំណាងឲ្យទឹក លឿងតំណាងឲ្យផែនដី។ ស្ដេចឈិនស៊ី​បានមានបន្ទូលថា រាជវង្ស Zhou គឺភ្លើង ឯរាជវង្ស Qin គឺជាទឹកនៅក្នុងធាតុទាំងប្រាំ ហើយពណ៌ខ្មៅក៏ក្លាយជាពណ៌របស់រាជវង្សឈិនពីពេលនោះមក។

ក្រោយមក នៅឆ្នាំ ២០២ មុនគ្រឹស្តសករាជ រាជវង្សហានត្រូវបានបង្កើតឡើង សំលៀកបំពាក់ក៏ចាប់ផ្តើមផ្លាស់ប្តូរផងដែរ។ ទីមួយ រាជវង្សហាន គោរពបូជាពណ៌ក្រហម ព្រោះក្រហមតំណាងឲ្យភ្លើង ដែលចៃដន្យមិនស៊ីគ្នានឹងទឹកនៃរាជវង្សឈិន។ តាមនោះទៀត ស្ដេច Gaozu នៃរាជវង្ស Han តែងតែចង់ប្រឆាំងស្ដេចឈិនជារឿយៗ ទោះបីជាស្ដេ​ចឈិនទ្រង់សុគតយូរហើយក៏ដោយ។ ចំពេលនោះ រដ្ឋមន្ត្រីមួយរូបនៅក្រោមការគ្រប់គ្រងស្ដេច Gaozu ក៏ស្អប់ស្ដេចឈិនស៊ីមិនណយដែរ ព្រោះខ្លួនគិតថា​ ស្ដេចអង្គនេះជាជនផ្តាច់ការដ៏ឃោរឃៅបំផុតក្នុងប្រវត្តិសាស្រ្ត។ ដូច្នេះហើយ ទើបរូបគាត់បានស្នើឲ្យប្រើពណ៌ក្រហម ផ្ទុយនឹងពណ៌ខ្មៅតំណាងទឹករបស់រាជវង្សឈិន។

ចំណេរ ត មក​ នៅឆ្នាំ ១៥៦ មុនគ.ស បន្ទាប់ពីអធិរាជ Wu នៃរាជវង្ស Han ឡើងសោយរាជ្យ នោះលែងមានមនោគមវិជ្ជាប្រឈមមុខដាក់គ្នាទៀតហើយ។ ដូច្នេះ ទ្រង់​បាន​ប្តូរ​ពណ៌​នៃ​អាវ​នាគ​ទៅ​ជា​ពណ៌​លឿង​មាស។ ចាប់ពីពេលនោះមក ពណ៌លឿងក៏ក្លាយជាពណ៌ដែលតំណាងឲ្យអធិរាជគ្រប់អង្គ។

ដ្បិតថាយ៉ាងណាក៏ដោយ ក្នុងសម័យរាជវង្សស៊ុយឯណោះវិញ អធិរាជ Wen បានកំណត់ថា ពណ៌នៃអាវនាគមានពណ៌លឿងសម្រាប់ហេតុផលមួយទៀត។ នេះគឺទាក់ទងទៅនឹងអធិរាជ Yan និងអធិរាជ Huangdi ដែលជាប្រភពដើមនៃអរិយធម៌ Huaxia​​ ហើយជោគវាសនារបស់អធិរាជទាំងពីរអង្គ​ គឺផែនដី ហើយពណ៌នៃផែនដីគឺពណ៌លឿងឆ្អិនឆ្អៅ។

លើសពីនេះទៀត ក្នុង​រាជវង្ស​ថាង ស្ដេច Li Wan បាន​កំណត់​ថា មាន​តែ​រាជវង្ស​ទេ​ ដែល​អាច​ប្រើប្រាស់​ពណ៌​លឿង​បាន ទើបលឿងមាសបានក្លាយជាពណ៌របស់សែរាជវង្សចិនជានិរន្តរ៍។

ប៉ុន្តែហេតុអ្វី បានជាអធិរាជបន្ទាប់ពីស្ដេចឈិនស៊ី ប្រែជាលែងប្រើពណ៌ខ្មៅ?

យោងតាមការសិក្សាពីអ្នកបុរាណវិទ្យាជាច្រើនសុទ្ធតែបកស្រាយយ៉ាងលម្អិតថា ទីមួយនៅសម័យបុរាណ ពណ៌ខ្មៅមានអត្ថន័យមិនល្អគាប់ប្រសើរដល់ជីវិតឡើយ។ ក្រៅពីនេះស្ដេចឈិនគឺជាអធិរាជទីមួយនៃប្រទេសចិនហើយ គេនៅគិតថារាជវង្សឈិនមានរយៈពេលតែពីរជំនាន់ប៉ុណ្ណោះ។ ដូច្នេះ អត្ថិភាពដ៏ខ្លីនៃរាជវង្សមួយនេះ មិនមែនជាអ្វីដែលអធិរាជក្រោយៗមកចង់បាននោះទេ។

បើទោះបីជាពណ៌ខ្មៅតំណាងឲ្យឋានៈ និងអំណាចក៏ដោយ សំខាន់បំផុត វាមិនមែនជាសំណាងទេ ជាពិសេសសម្រាប់អធិរាជនាពេលអនាគត​ដែលឡើងគ្រងរាជ្យសម្បត្តិបន្តមិនចង់ប្រើពណ៌ស្រអាប់មួយនេះជាពណ៌តំណាងរបស់ពួកទ្រង់ទេ ដោយគ្រប់អង្គគិតថា មិនចង់ឲ្យរជ្ជកាលរបស់ពួកទ្រង់មានរយៈពេលខ្លីដូចស្ដេចផ្ដាច់ការឈិនស៊ីឡើយ៕

អត្ថបទ៖ សាង ស្រីល័ក្ខ

ចុចអាន៖មូលហេតុដែលពិធី​បញ្ចុះ​សព​ស្រីស្នំ​បុរាណ ចិន ដាច់ខាតត្រូវតែដាក់អង្កាំគុជខ្យងចូលក្នុងខ្លួន