ព័ត៌មានជាតិ

អាជ្ញាធរអប្សរាហាមដាច់ខាត ទេសចរគូសវាសអក្សរផ្សេងៗលើផ្ទាំងប្រាសាទបុរាណតំបន់អង្គរ

បានផុស

១១ ខែ មុន

នៅ

ថ្ងៃសៅរ៍ ៣១ ឧសភា ២០២៥

ដោយ

បើតាមលោក ឡុង កុសល អគ្គនាយក និងជាអ្នកនាំពាក្យឲ្យអាជ្ញាធរជាតិអប្សរាបានថ្លែងថា អាជ្ញាធរអប្សរាបានចាត់វិធានការគ្រប់គ្រងលើសកម្មភាព ការគូសវាសជាស្លាកស្នាមឬចារជាអក្សរផ្សេងៗនៅលើផ្ទាំងប្រាសាទបុរាណនៅតំបន់អង្គរ ដែលមានតម្លៃជាសាកលសម្រាប់មនុស្សជាតិ។

ថ្លែងនៅចំពោះមុខក្រុមអ្នកសារព័ត៌មាន ក្នុងដំណើរទស្សនកិច្ចទៅតំបន់បេតិកភណ្ឌនៅខេត្តសៀមរាប លោក ឡុង កុសល បានបញ្ជាក់ថា កន្លងទៅមានទេសចរមួយចំនួនបានសរសេរអក្សរផ្សេងៗនៅលើផ្ទាំងថ្មប្រាសាទ ដែលនាំឲ្យខូចខាតប៉ះពាល់ដល់តម្លៃនៃប្រាសាទបុរាណ ដែលត្រូវបានការពារដោយអង្គការយូណេស្កូ។

លោកថ្លែងដោយកត់សម្គាល់ថា ការគូសវាសជាអក្សរផ្សេងៗនៅលើផ្ទាំងថ្មប្រាសាទពីភ្ញៀវទេសចរមួយចំនួន អាចមកពីពួកគេចង់បន្សល់ទុកនូវអនុស្សាវរីយ ដែលបានមកកម្សាន្តទីបុរាណដ្ឋានដ៏ល្បីល្បាញបំផុតរបស់ពិភពលោក។

រហូតមកដល់ពេលនេះ អាជ្ញាធរបានរៀបចំជាឯកសារដើម្បីសិក្សាការគូសវាសនេះ កើតឡើងតាំងពីពេលណាមក ហើយដើម្បីការពារសម្បត្តិបេតិកភណ្ឌដែលមានតម្លៃជាសាកលនេះ អាជ្ញាធរបានរឹតបន្តឹងការគ្រប់គ្រង និងហាមឃាត់ដាច់ខាតមិនឲ្យមានសកម្មភាពឆ្គាំឆ្គងនេះកើតមានទៀតទេ៕