ព័ត៌មានជាតិ

នាយករដ្ឋមន្ត្រីសង្ឃឹមថាថៃនឹងរៀបចំសមាសភាពមកប្រជុំ JBC បានឆាប់

បានផុស

៨ ខែ មុន

នៅ

ថ្ងៃពុធ ៨ តុលា ២០២៥

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបង្ហាញក្ដីសង្ឃឹមថាថៃនឹងអាចរៀបចំសមាសភាពរបស់ខ្លួនដើម្បីចូលរួមកិច្ចប្រជុំគណៈកម្មការចម្រុះព្រំដែនប្រទេសទាំងពីរបានឆាប់ៗនាពេលខាងមុខ បន្ទាប់ពីប្រទេសថៃខកខានប្រជុំកាលពីខែកញ្ញាកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សរសេរលើហ្វេសបុកផេករបស់សម្ដេចនៅរសៀលថ្ងៃទី៨ ខែតុលា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានពន្យល់ពីតួនាទីដាច់ពីគ្នារបស់ JBC និង RBC លើកការងារដោះស្រាយបញ្ហាព្រំដែនកម្ពុជានិងថៃ។ សម្ដេចបានបញ្ជាក់ថា ក្នុងកំណត់ហេតុព្រមព្រៀងកិច្ចប្រជុំពិសេសលើកទី១ នៃគណៈកម្មាធិការព្រំដែនទូទៅកម្ពុជា-ថៃ (GBC) គឺបញ្ហានៃការវាស់វែងរួម និងខណ្ឌសីមាព្រំដែន គឺជាការងាររបស់គណៈកម្មការចម្រុះព្រំដែន (JBC) ខណៈគណៈកម្មាធិការព្រំដែនថ្នាក់យោធភូមិភាគ (RBC) គឺមានភារកិច្ចគ្រប់គ្រងបញ្ហាឱ្យស្របតាមលទ្ធផលនៃកិច្ចពិភាក្សារបស់គណៈកម្មការចម្រុះព្រំដែន (JBC)។

សម្ដេចបានបញ្ជាក់ថា៖ «ការខកខានប្រជុំគណៈកម្មការចម្រុះព្រំដែន (JBC) ចាប់តាំងពីខែកញ្ញា ឆ្នាំ ២០២៥ កន្លងទៅនេះ ដោយមូលហេតុរង់ចាំការរៀបចំសមាសភាពថ្មីរបស់ JBC ខាងភាគីថៃ។ កម្ពុជាសង្ឃឹមថានឹងមានកិច្ចប្រជុំ JBC ក្នុងពេលឆាប់ៗខាងមុខដើម្បីដោះស្រាយបញ្ហានេះ»។

ការបញ្ជាក់របស់សម្ដេចធិបតី ហ៊ុន ម៉ាណែត នៅពេលនេះគឺបន្ទាប់ពីយោធភូមិភាគ១របស់ថ្ងៃបានដាក់លក្ខខណ្ឌមកកម្ពុជាឱ្យធ្វើផែនការជម្លៀសពលរដ្ឋចេញពីភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ មុនកិច្ចប្រជុំ GBC នៅថ្ងៃទី១០ ខែតុលាខាងមុខ។

ស្របពេលនេះដែរកាលពីថ្ងៃទី៧ ខែតុលា ទាហានថៃបានសម្រេចពីគម្រោងប្រើច្បាប់អាជ្ញាសឹកបណ្ដេញពលរដ្ឋខ្មែរចេញពីលំនៅឋានផងដែរ។ នេះបើតាមការចុះផ្សាយរបស់សារព័ត៌មានថៃ The Nation។

សកម្មភាពដែលជាការបំពានដល់សមត្ថកិច្ចរបស់គណៈកម្មការចម្រុះព្រំដែន (JBC) នេះត្រូវបានអ្នកតាមដានភូមិសាស្ត្រនយោបាយ លោកបណ្ឌិត ជ័យ តិច បានលើកឡើងថាវាជារឿងដែលអាម៉ាស់មួយដែលថៃកំពុងធ្វើឱ្យពិភពលោកបានឃើញពីភាពគ្មានច្បាប់ទម្លាប់របស់ប្រទេសនេះ។

លោកថា៖ «ការរំលោភទាំងនេះបានបង្ហាញអង្គការក្នុងតំបន់ អន្តរជាតិក៏ដូចជាអង្គការសហប្រជាជាតិក៏ដូចជាតុលាការយុត្តិធម៌និងស្ថាប័នអន្តរជាតិផ្សេងៗទៀតឱ្យបានយល់ច្បាស់ពីចិត្តគំនិតតែងតែងមាក់ងាយមកលើអ្នកជិតខាងតែងតែចិញ្ចឹមចិត្តក្នុងការរំលោភបំពានឈ្លានពានដែនអធិបតេយ្យភាព ការមិនគោរពសិទ្ធិមនុស្ស កិច្ចព្រមព្រៀងផ្សេងៗសន្ធិសញ្ញាផ្សេងៗដែលខ្លួនបានចុះហត្ថលេខានេះ»។

ទាហានថៃបានចាប់ផ្ដើមចូលមករាយបន្លាលួសដេញពលរដ្ឋខ្មែរចេញពីផ្ទះសំបែងនៅភូមិជោគជ័យ និងភូមិព្រៃចាន់ចាប់តាំងពីថ្ងៃទី១២ ខែសីហា មក ដែលធ្វើឱ្យប៉ះពាល់ពលរដ្ឋចំនួន១២គ្រួសារ និងគំរាមជម្លៀសពលរដ្ឋខ្មែរចេញបន្ថែមទៀត ដោយអះអាងថាទឹកដីដែលចូលមករាយបន្លាលួសនោះគឺជាទឹកដីថៃ។

ក្នុងកិច្ចប្រជុំពិសេសរបស់គណៈកម្មាធិការព្រំដែនទូទៅ GBC កាលពីថ្ងៃទី១០ ខែកញ្ញា កន្លងទៅ ក្នុងចំណុចទី៨ បានបញ្ជាក់យ៉ាងច្បាស់ថា ករណីនៅភូមិជោគជ័យ និងព្រៃចាន់ គឺជាភារកិច្ចរបស់ JBC ក្នុងការប្រជុំដោះស្រាយ ខណៈ RBC គឺត្រឹមតែសម្រួលបញ្ហានៅនឹងកន្លែង បន្ធូរភាពតានតឹង និងដោះស្រាយបញ្ហាដោយសន្តិវិធី ប៉ុន្តែមិនមានសមត្ថកិច្ចកំណត់អំពីខ្សែព្រំដែននោះទេ។

អត្ថបទដោយ ហ៊ុន សិរីវឌ្ឍន៍