កម្ពុជា​នាំ​ចេញ​ទំនិញ​៤០០តោន ​ទៅ​ប្រទេស​វៀតណាម ​តាម​ច្រក​ឡាប៉ាខេ ​ក្នុង​ខេត្ត​មណ្ឌលគិរី​ ​រៀង​រាល់​សប្ដាហ៍

យោងតាមរបាយការណ៍ប្រចាំសប្តាហ៍របស់មន្ទីរពាណិជ្ជកម្មខេត្តមណ្ឌលគិរី បានឱ្យដឹងថា បច្ចុប្បន្នកម្ពុជាបាននាំចេញទំនិញជាង ៤០០ តោនក្នុងមួយសប្តាហ៍ តាមច្រកព្រំដែនទ្វេភាគីកម្ពុជា-វៀតណាម នៅចំណុចឡាប៉ាខេ ស្រុកកែវសីមា ខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំនិញដែលត្រូវបាននាំចេញទាំងអស់នោះភាគច្រើន ជាប្រភេទកសិផលកសិកម្មដូចជា ជ័រកៅស៊ូ គ្រាប់ស្វាយចន្ទីស្ងួត និងទំនិញផ្សេងផ្សេងទៀត។ លោក លឹម ស្រេង ប្រធានមន្ទីរពាណិជ្ជកម្មខេត្តមណ្ឌលគិរី បានប្រាប់កម្ពុជាថ្មី នៅថ្ងៃទី៨ខែ តុលានេះថា ទំនិញកសិផលដែលកម្ពុជានាំចេញទៅប្រទេសវៀតណាមសុទ្ធសឹងជាកសិផលក្នុងខេត្តមណ្ឌលគិរីផ្ទាល់។

ដោយឡែកសម្រាប់ ទំនិញដែលភាគីវៀតណាមនាំចូលមកកម្ពុជាវិញ មានក្នុងបរិមាណនាំចូលបន្តិចបន្តួចតែប៉ុណ្ណោះដែលភាគច្រើនជា បន្លែ និងផ្លែឈើ ដឹកតាមមធ្យោបាយម៉ូតូយកមកចែកចាយដោះដូរនៅតំបន់នោះតែប៉ុណ្ណោះ។
បន្ថែមពីនេះ សម្រាប់នៅច្រកព្រំដែនទ្វេភាគគីតាមស្រុកផ្សេងវិញ អាចមានដឹកបន្លែ ផ្លែឈើ តាមរថយន្តចូលមកក្នុងខេត្តមណ្ឌលគិរីផងដែរ។

លោក​បន្ត​ថា បន្ទាប់​ពី​មាន​ការ​ប៉ះ​ទង្គិច​គ្នា​ដែល​បង្ក​ឡើង​ដោយ​ភាគី​ថៃ និង​ព្រំដែន​ត្រូវ​បាន​ថៃ​បិទ​ជា​ឯកតោភាគី ប្រជាជន​កម្ពុជា​ធ្វើ​ពហិការ​ទំនិញ​ថៃ។ ជាមួយនឹងការធ្វើពហិការនេះ សម្រាប់ច្រកព្រំដែនទ្វេភាគីកម្ពុជា-វៀតណាម ក្នុងខេត្តមណ្ឌលគិរី ការដោះដូរទំនិញមានការកើនឡើងបន្តិច ពោលគឺមិនខុសគ្នាច្រើនទេបើធៀបនឹងពេលមុនៗ។

អត្ថបទ៖ រៀម សុខហេង