នគរបាលខេត្តព្រះសីហនុ៖ ករណីបុរសជនជាតិកូរ៉េម្នាក់ស្លាប់ក្នុងសណ្ឋាគារ ជាការធ្វើអត្តឃាត

ស្នងការដ្ឋាននគរបាលខេត្តព្រះសីហនុ បានបញ្ជាក់ឱ្យដឹងថា ការស្លាប់របស់បុរសជនជាតិកូរ៉េម្នាក់ក្នុងបន្ទប់សណ្ឋាគារមួយ នៅក្រុងព្រះសីហនុ គឺជាករណីធ្វើអត្តឃាត ដោយចងកសម្លាប់ខ្លួន។

ស្នងការដ្ឋាននគរបាលខេត្តព្រះសីហនុ បានឱ្យដឹងតាមរយៈសេចក្ដីប្រកាសព័ត៌មានកាលពីថ្ងៃទី២១ ខែតុលាម្សិលមិញ ថា បន្ទាប់ពីទទួលបានព័ត៌មានថាមានករណីបុរសជាជនជាតិកូរ៉េម្នាក់បានប្រទះឃើញស្លាប់ក្នុងបន្ទប់ទឹក ដោយមិនដឹងមូលហេតុ នៅចំណុចសណ្ឋាគារQueen Co ស្ថិតនៅភូមិ៣ សង្កាត់លេខ៣ ក្រុងព្រះសីហនុ កម្លាំងសមត្ថកិច្ចជំនាញបានចុះទៅកន្លែងកើតហេតុភ្លាមៗ ដើម្បីពិនិត្យស្រាវជ្រាវ។

យោងតាមលទ្ធផលស្រាវជ្រាវ និងពិនិត្យសាកសព សមត្ថកិច្ចជំនាញសន្និដ្ឋានជាបឋមថា ជនរងគ្រោះស្លាប់ដោយសារការធ្វើអត្តឃាត គឺការចងកសម្លាប់ខ្លួន។ ស្នងការដ្ឋាននគរបាលខេត្តព្រះសីហនុ ក៏បានបង្ហាញឱ្យដឹងពីអត្តសញ្ញាណសាកសពជន មានឈ្មោះ KIM SANGYONG ជនជាតិកូរ៉េ ជាអ្នកទេសចរណ៍ ដែលបានស្នាក់នៅក្នុងសណ្ឋាគារខាងលើ រយៈពេល១១ថ្ងៃមកហើយ។

បច្ចុប្បន្នសព ត្រូវបានប្រគល់ជូននាយកដ្ឋាននគរបាលបច្ចេកទេស និងវិទ្យាសាស្ត្រ ដើម្បីបន្តនីតិវិធីជូនក្រុមគ្រួសារនៃសព៕