ក្រសួងអប់រំ ប្រគល់រថយន្តជូនបេក្ខជននិទ្ទេស A លំដាប់ពិន្ទុ ១០០ ខ្ពស់ជាងគេទូទាំងប្រទេស

ក្រសួងអប់រំ យុវជន និងកីឡា បានប្រគល់រថយន្តអគ្គិសនី Leapmotor TO3 ជូនដល់បេក្ខជននិទ្ទេស A លំដាប់ពិន្ទុ ១០០ ខ្ពស់ជាងគេទូទាំងប្រទេស ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ថ្ងៃទី២៨ ខែ សីហា ឆ្នាំ២០២៥។

ថ្លែងក្នុងពិធីប្រគល់រថយន្តអជូនដល់បេក្ខជននិទ្ទេស A កាលពីថ្ងៃទី ២១ ខែតុលាកន្លងទៅ លោក ហួ ឈុនគ្រី អគ្គាធិការ និងជាប្រធានគណៈគ្រប់គ្រងនាយកដ្ឋានកិច្ចការប្រឡង តំណាងលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ក្រោយបញ្ចប់ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៥នេះ គឺបានរកឃើញ យុវតី ឃុន ដាលីណា ជាសិស្សដែលទទួលបាននិទ្ទេស A កម្រិតពិន្ទុខ្ពស់ជាងគេប្រចាំប្រទេស មកពីសាលារៀនសុវណ្ណភូមិ ក្រុងប៉ោយប៉ែត ខេត្តបន្ទាយមានជ័យ។

លោកបន្តថា ដើម្បីអបអរសាទរជាមួយនឹងភាពជោគជ័យដ៏ត្រចះត្រចង់របស់បេក្ខជនដែលបានខិតខំប្រឹងប្រែងរហូតទទួលបានលទ្ធផលល្អ ក្រសួងអប់រំ យុវជន និងកីឡា សហការជាមួយក្រុមហ៊ុន TF Motors បានចុះមកកាន់​គេហដ្ឋានរបស់បេក្ខជនផ្ទាល់ដើម្បីប្រគល់ជូនរថយន្តអគ្គិសនី Leapmotor TO3។

លោកគូសបញ្ជាក់ថា ការផ្តល់ជូនរថយន្តអគ្គិសនី Leapmotor TO3 ជូនដល់បេក្ខជនដែលទទួលបាននិទ្ទេស A កម្រិតពិន្ទុខ្ពស់ជាងគេប្រចាំប្រទេស គឺដើម្បីចូលរួមចំណែកជាមួយក្រសួងអប់រំ ក្នុងការលើកស្ទួយវិស័យអប់រំឱ្យកាន់តែរីកចម្រើន និងស្របតាមការលើកទឹកចិត្តពីរាជរដ្ឋាភិបាលក្នុងការគាំទ្រឱ្យប្រជាពលរដ្ឋខ្មែរងាកមកប្រើប្រាស់រថយន្តអគ្គិសនី ដើម្បីថែទាំដល់បរិស្ថាន និងកាត់បន្ថយនៅឧស្ម័នពុលដែលប៉ះពាល់ដល់បរិយាកាស។

យុវតី ឃុន ដាលីណា បានលើកឡើងថា សមិទ្ធផលមួយនេះគឺកើតចេញពីការចូលរួមរបស់លោកគ្រូ អ្នកគ្រូ ដែលបានបណ្តុះបណ្តាលតាំងពីថ្នាក់មត្តេយ្យសិក្សាមក ជាពិសេសកើតចេញពីការជំរុញ និងលើកទឹកចិត្តពីឪពុកម្តាយ។
កត្តាសំខាន់មួយទៀតដែលធ្វើឱ្យយុវតីធ្វើបានល្អពេលប្រឡងនោះ ​ដោយសាលាបានផ្តល់ឱកាសជាច្រើនក្នុងការអភិវឌ្ឍខ្លួនពីកម្រិតមួយទៅកម្រិតមួយទៀត ជាពិសេសសាលារៀន​បានរៀបចំការប្រឡងតេស្តសមត្ថភាពពីរដងរួចទៅហើយ។
កត្តាលើកចិត្ត និងការខិតខំប្រឹងប្រែងរៀនសូត្រទាំងនេះ ធ្វើឱ្យយុវតីដែលរស់នៅខេត្តបន្ទាយមានជ័យ បានត្រៀមខ្លួនយ៉ាងល្អសម្រាប់ការប្រឡង៕

អត្ថបទ៖ សំអឿន