ព័ត៌មានជាតិ

ជង្ហុកលើកំណាត់ផ្លូវ ២៥៤ ប្រវែង ៤០ ម៉ែត្រ បង្កផលលំបាកដល់ពលរដ្ឋធ្វើដំណើរ

បានផុស

៨ ខែ មុន

នៅ

ថ្ងៃអង្គារ ២៨ តុលា ២០២៥

ដោយ

ប្រជាពលរដ្ឋ ស្នើសុំអាជ្ញាធរចុះមកពិនិត្យកំណាត់ផ្លូវ ២៥៤ កែងផ្លូវលេខ ៥១ ដែលមានជង្ហុកធំៗ ដក់ទឹក កំពុងបង្កផលលំបាកដល់អ្នកឆ្លងកាត់ និង អ្នករស់នៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកំណាត់ផ្លូវកំពុងរងការខូចខាតនេះនៅតាមបណ្ដោយផ្លូវលេខ ២៥៤ កែងផ្លូវលេខ ៥១ ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។

លោក ដានី ជាប្រជាពលរដ្ឋ បានឲ្យដឹងថា ផ្លូវខូចខាតនេះបានបង្កការលំបាកខ្លាំង ពេលឆ្លងកាត់ម្តងៗ ជិះធ្លាក់ជង្ហុកស្ទើរតែដួលទៅហើយ ដោយសារតែជង្ហុកច្រើនគួរសមដែរ គឺមានតូច-ធំ នៅចំណុចនោះ។

លោក ដានី បន្តថា ចំពោះជង្ហុកនេះ រាល់ពេលគាត់ឆ្លងកាត់ទៅធ្វើការម្តងៗ ពិបាកខ្លាំង ព្រោះត្រូវគេចជង្ហុកទឹកដក់នេះផង ខ្លាចពេលជិះធ្លាក់ប្រឡាក់ខោអាវធ្វើការផង។

អ្នកស្រី វណ្ណាក់ ពលរដ្ឋក្បែរទីតាំងខាងលើ បានឲ្យដឹងដែរថា ផ្លូវលេខ ២៥៤ កន្លងមក គ្រាន់តែខូចតិចតួចតែប៉ុណ្ណោះ ប៉ុន្តែយូរៗ ទៅ មានរថយន្តម៉ូតូឆ្លងកាត់ច្រើន ក៏កើតទៅជាជង្ហុកធំៗ ទឹកដក់តែម្តង។ ប្រជាពលរដ្ឋសំណូមពរទៅកាន់អាជ្ញាធរពាក់ព័ន្ធ សូមមេត្តាចុះត្រួតពិនិត្យផ្លូវជង្ហុកខាងលើនេះជួសជុលឡើងវិញផង ព្រោះថា ទោះបីផ្លូវនេះជាផ្លូវតូច ប៉ុន្តែមានអ្នកធ្វើដំណើរឆ្លងកាត់ច្រើន ដើម្បីកាត់បន្ថយផលលំបាក នារដូវធ្លាក់ភ្លៀងនេះ។

ពាក់ព័ន្ធបញ្ហានេះ លោក នី សាមិត្ត ប្រធានការិយាល័យសាធារណការខណ្ឌដូនពេញ បានប្រាប់ឲ្យកម្ពុជាថ្មីដឹងថា កំណាត់ផ្លូវលេខ ២៥៤ ប្រវែង ៤០ ម៉ែត្រ នេះ នឹងជួសជុលនៅក្នុងឆ្នាំ ២០២៦ ដោយសារតែកញ្ចប់ថវិកាការអភិវឌ្ឍឆ្នាំ ២០២៥ ត្រូវបានប្រើប្រាស់អស់ទៅហើយ។ ចំពោះបញ្ហានេះ លោកបានលើកសំណើដាក់ក្នុងគម្រោងអភិវឌ្ឍន៍ភូមិ-ឃុំ-សង្កាត់ ៣ ឆ្នាំរំកិល ឆ្នាំ ២០២៦ រួចរាល់ហើយ ដើម្បីជួសជុលផ្លូវខាងលើនេះជូនប្រជាពលរដ្ឋ។

លោកប្រធានការិយាល័យសាធារណការខណ្ឌដូនពេញ ក៏បានសំណូមពរ និងសូមការយោគយល់ពីប្រជាពលរដ្ឋក្នុងមូលដ្ឋានចំពោះបញ្ហាទាំងអស់នេះផង។ លោក នឹងព្យាយាមជួសជុលរាល់ផ្លូវដែលខូចឡើងវិញជូនប្រជាពលរដ្ឋ ដើម្បីសម្រួលការលំបាកកន្លងមក៕

អត្ថបទ ៖ រដ្ឋា

វីដេអូជង្ហុកលើកំណាត់ផ្លូវ ២៥៤