អ្នករៀបចំ អំពាវនាវសាធារណជនកុំរិះគន់កុមារអាយុ ៥ឆ្នាំចូលរួមប្រកួតសំណេរអង្គរ

លោក លីម ប៊ុនហុក សហស្ថាបនិក និងជាអ្នករៀបចំកម្មវិធីសំណេរអង្គរ អំពាវនាវដល់សាធារណជនកុំរិះគន់កុមារអាយុ ៥ ឆ្នាំដែលសម្រេចចិត្តចុះឈ្មោះចូលប្រកួតសំណេរអង្គរ លើកទី ៣ ដោយបញ្ជាក់មូលហេតុថា ការចូលរួមរបស់កុមារកើតចេញពីបេះដូង និងជាការបណ្តុះស្មារតីស្រឡាញ់អក្សរសាស្រ្តជាតិ។ ការអំពាវនាវនេះ ធ្វើឡើងនៅក្នុងសន្និសីទសារព័ត៌មានស្តីពី សំណេរអង្គរលើកទី ៣ នៅថ្ងៃទី ៣១ ខែតុលា ឆ្នាំ ២០២៥ ដើម្បីជម្រាបជូនបេក្ខជនពីបច្ចេកទេសនៃការសរសេរតាមអាន (ការអាន​ របៀបសរសេរវចនានុក្រម ផ្លូវការ)។

លោក លីម ប៊ុនហុក មានប្រសាសន៍ថា សំណេរអង្គរលើកទី៣ មានបេក្ខជន បេក្ខនារី ព្រះសង្ឃ ចុះឈ្មោះចូលរួមសរុបចំនួន ១ ៨៦០ អង្គ/នាក់ ដែលចំនួននេះមានការកើនឡើង។ ក្នុងចំណោមនោះបេក្ខជនទាំងអស់មានគ្រប់វ័យ អាយុចាប់ពី ៥ឆ្នាំ រហូតដល់ អាយុ ៨២ ឆ្នាំ ក្នុងនោះមានជនបរទេសចូលរួមប្រកួតសំណេរចំនួន ២នាក់។ ដើម្បីបង្កាទុកការរិះគន់ជាយថាហេតុណាមួយ លោកសូមអំពាវនាវដល់សាធារណជនកុំរិះគន់កុមារដែលមានអាយុ ៥ ឆ្នាំ ចុះឈ្មោះចូលរួមប្រកួត។ លោកបញ្ជាក់មូលហេតុយ៉ាងដូច្នេះថា៖« អ្នកខ្លះថាអាយុ ៥ឆ្នាំគាត់មិនទាន់ចេះសរសេរផង គាត់ទៅមានប្រយោជន៍អី! អ៊ីចឹង ដូចកម្មវិធីកន្លងមក យើងចង់បង្កើតចលនាឱ្យចូលរួម។ ឪពុកម្តាយ បងប្អូននឹងជូនគាត់ទៅចូលរួម នេះជាចលនាចូលរួមដោយបេះដូង ជាការស្រឡាញ់របស់គាត់ ហើយយើងសូមអរគុណគាត់ដែលចូលរួម»។

លោកអំពាវនាវថា ៖«ខ្ញុំដែលជាអ្នករៀបចំនេះ សូមអំពាវនាវកុំឱ្យមានការរិះគន់ថា យកកុមារ៥ឆ្នាំ ចូលរួមប្រកួតមិនឈ្នះគេទេ។ នេះគឺបេះដូង បណ្តុះគាត់ឱ្យស្រឡាញ់ភាសាជាតិតាំងពីក្មេង។ ហេតុអីបានភាសាសំខាន់ គឺសំខាន់ជាងអ្វីដែលយើងគិត។ អ្វីដែលកាន់តែពិសេសឆ្នាំនេះ មានបេក្ខជនចូលរួមប្រកួតសំណេរ មកពីគ្រប់រាជធានី-ខេត្ត ក្រុង ក្នុងនោះបេក្ខជនខេត្តសៀមរាបមានច្រើនជាងគេ»។

សូមជម្រាបថា សំណេរអង្គរលើកទី៣ នេះ ក្រុមការងារបានសម្រេចរួមគ្នានិមន្តព្រះសង្ឃ ហាក់ សៀងហៃ ចូលរួមអានអត្ថបទសំណេរ។ លោក លីម ប៊ុនហុក បញ្ជាក់មូលហេតុថា ដោយសារព្រះតេជគុណ ជាបញ្ញវន្តមួយរូបលេខធ្លោ ធ្លាប់ចូលរួមប្រកួតច្រើន និងល្បីល្បាញផ្នែកអក្សរសាស្រ្ត។ លើសពីនេះ ព្រះសង្ឃបានដើរតួនាទីសំខាន់ក្នុងការអភិរក្សអក្សរសាស្រ្តខ្មែរតាំងពីបុរាណមក។

សំណេរអង្គរលើកទី៣ នឹងរៀបចំឡើងនៅថ្ងៃទី១៨ មករា ឆ្នាំ២០២៦ នៅមុខស្ពានហាល ប្រាសាទអង្គរវត្ត ដោយមានបេក្ខជនចុះឈ្មោះចូលរួមចំនួន ១ ៨៦០ អង្គ/នាក់  ខណៈលោកអំពាវនាវដល់អ្នកចុះឈ្មោះរួចហើយ សូមចូលរួមប្រឡងឱ្យបានទៀងទាត់ ចៀសវាងអវត្តមាន៕