ឱកាសបុណ្យឯករាជ្យជាតិ មេយោធាខេត្តកំពង់ធំចុះសួរសុខទុក្ខយោធិនដែលកំពុងសម្រាកព្យាបាលជំងឺ

យកឱកាសបុណ្យឯករាជ្យជាតិ និងកំណើតកងយោធពលខេមរភូមិន្ទ មេបញ្ជាការតំបន់ប្រតិបត្តិការសឹករងកំពង់ធំ លោកឧត្តមសេនីយ៍ទោ សោម ស៊ុន នៅព្រឹកថ្ងៃទី៧ ខែវិច្ឆិកា ឆ្នាំ២០២៥ បានចុះសាកសួរសុខទុក្ខយោធិន និងអតីតយុទ្ធជន ដែលកំពុងសម្រាកព្យាបាលជំងឺ។  

លោកវរសេនីយ៍ត្រី លី ស៊ីណា នាយផ្នែកគិលានដ្ឋាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានរាយការណ៍អំពីស្ថានភាពនៃការព្យាបាលជំងឺជូនយោធិន និងអតីតយុទ្ធជន ដែលបានមកសម្រាកព្យាបាលជំងឺនាពេលកន្លងទៅ ក្នុងមួយខែមួយខែ មានប្រមាណពី៥ ទៅ ៨នាក់។ ដោយឡែក យោធិន អតីតយុទ្ធជន និងក្រុមគ្រួសារមួយចំនួន ដែលមានជំងឺ ត្រូវបានពិនិត្យ និងផ្ដល់ថ្នាំពេទ្យទៅសម្រាកព្យាបាលនៅតាមគេហដ្ឋាន និងអង្គភាពរៀងៗខ្លួនផងដែរ។

សម្រាប់នៅថ្ងៃនេះ មានយោធិននិងអតីតយុទ្ធជនមានជំងឺកំពុងសម្រាកព្យាបាលនៅគិលានដ្ឋានមានចំនួន៥នាក់ដែលជាប្រភេទជំងឺគ្រុនឈាម រលាកក្រពះពោះវៀន និងជំងឺផ្ដាសាយធំ ហើយនឹងត្រូវជាសះស្បើយវិលត្រឡប់ទៅអង្គភាព និងគេហដ្ឋានវិញនៅពេលដ៏ខ្លីខាងមុខនេះ។

ឧត្តមសេនីយ៍ទោ សោម ស៊ុន បានថ្លែងអំណរគុណចំពោះនាយទាហានផ្នែកសុខាភិបាល និងលោកគ្រូ អ្នកគ្រូ ជាក្រុមគ្រូពេទ្យ នៃគិលានដ្ឋាន របស់បញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានខិតខំប្រឹងប្រែងបំពេញភារកិច្ចក្នុងការព្យាបាលជំងឺប្រកបដោយស្មារតីទទួលខុសត្រូវខ្ពស់ជូនយោធិន និងអតីតយុទ្ធជន។

ជាមួយនឹងការអរគុណ លោកឧត្តមសេនីយ៍ទោ បានសំណូមពរដល់ក្រុមគ្រូពេទ្យទាំងអស់ត្រូវបន្តយកចិត្តទុកដាក់ក្នុងការថែទាំព្យាបាលជំងឺជូនដល់យោធិន គ្រួសារយោធិន និងអតីតយុទ្ធជន ដែលមានជំងឺមកសម្រាកព្យាបាលនៅគិលានដ្ឋាន ប្រកបដោយគុណធម៌ និងវិជ្ជាជីវៈ ដើម្បីឆាប់បានជាសះស្បើយ បានវិលត្រឡប់ទៅបំពេញភារកិច្ចនៅតាមបណ្ដាកងឯកភាពវិញ៕