ព័ត៌មានជាតិ

អភិបាលខណ្ឌឫស្សីកែវ ៖ «ផ្លូវក្នុងមូលដ្ឋានខណ្ឌឫស្សីកែវ ត្រូវតែស្អាតជានិច្ច»

បានផុស

៧ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

លោក ជិន ប៊ុនធឿន អភិបាលខណ្ឌឫស្សីកែវ សង្កត់ធ្ងន់ថា «ផ្លូវក្នុងមូលដ្ឋានខណ្ឌឫស្សីកែវ ត្រូវតែស្អាតជានិច្ច»។ លោកថា រដ្ឋបាលខណ្ឌ តែងតែចុះរៀបចំសណ្ដាប់ធ្នាប់ និងសម្អាតផ្លូវជាប្រចាំ ដើម្បីឲ្យប្រជាពលរដ្ឋរស់នៅក្នុងបរិយាកាសស្អាត មានអនាម័យ និងសុវត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសង្កត់ធ្ងន់នេះ ក្នុងឱកាស លោក ជិន ប៊ុនធឿន ដឹកនាំកម្លាំង និងមន្ត្រីជាប់ពាក់ព័ន្ធ ចុះប្រតិបត្តិការសម្អាតបរិស្ថានតាមបណ្ដោយកំណាត់ផ្លូវជាតិលេខ ៥ ដោយប្រើគ្រឿងចក្រឈូសសម្អាតដី និងរថយន្តលាងសម្អាតផ្លូវ កាលពីថ្ងៃទី ០៦ ខែវិច្ឆិកា ឆ្នាំ ២០២៥ ម្សិលមិញ។

នាឱកាសនោះ លោកអភិបាលខណ្ឌឫស្សីកែវ បានបន្តថា ការរក្សាអនាម័យ និងសោភ័ណភាពក្នុងតំបន់ជាមុខងារសំខាន់មួយដែលរដ្ឋបាលខណ្ឌអនុវត្តជាប្រចាំ ដើម្បីអភិវឌ្ឍន៍ទីក្រុងឲ្យមានភាពស្អាត សណ្ដាប់ធ្នាប់ និងរបៀបរៀបរយកាន់តែប្រសើរឡើង។

លោកបន្តទៀតថា រដ្ឋបាលខណ្ឌ កំពុងរៀបចំបន្ថែមរថយន្តអន្តរាគមន៍ពន្លត់អគ្គិភ័យ និងលាងសម្អាតផ្លូវថ្នល់ ដើម្បីបំពេញការងារផ្នែកសង្គ្រោះពេលមានគ្រោះអគ្គិភ័យកើតឡើង និងជួយបន្តការលាងសម្អាតផ្លូវជាប្រចាំ។ ចំពោះការដាក់បញ្ចូលសម្ភារៈបន្ថែមនេះ គឺជាការងារសំខាន់មួយផ្នែកក្នុងការអភិវឌ្ឍមូលដ្ឋានឲ្យកាន់តែមានសោភ័ណភាព។

លោក សុន សាវឿន ប្រជាពលរដ្ឋរស់នៅតាមបណ្ដោយផ្លូវជាតិលេខ ៥ គីឡូម៉ែត្រលេខ ៩ បានឲ្យដឹងថា លោកសប្បាយចិត្តណាស់ដែលមើលឃើញផ្លូវស្អាត និងគ្មានកាកសំណល់ដាក់ចោលដូចមុនទៀត។ ការចុះសម្អាតបែបនេះធ្វើឲ្យក្រុមគ្រួសារលោករស់នៅមានសុខភាពល្អ និងអារម្មណ៍សប្បាយចិត្ត។

ក្នុងនាមជាអភិបាលខណ្ឌ លោក ជិន ប៊ុនធឿន ក៏បានអំពាវនាវឲ្យប្រជាពលរដ្ឋគ្រប់រូប រួមចំណែកថែរក្សាអនាម័យ និងកុំចោលសំណល់តាមបណ្ដោយផ្លូវ ដើម្បីជួយឲ្យតំបន់ឫស្សីកែវកាន់តែស្អាត មានរបៀបរៀបរយ ក្លាយជាគំរូដ៏ល្អដល់ក្មេងជំនាន់ក្រោយ៕

អត្ថបទ ៖ សំណាង

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា