ព័ត៌មានជាតិ

រដ្ឋមន្ត្រីការបរទេសកូរ៉េនឹងមកបំពេញទស្សនកិច្ចនៅកម្ពុជាសប្ដាហ៍ក្រោយពិភាក្សាលើការប្រឆាំងបទល្មើសអនឡាញ

បានផុស

៨ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

រដ្ឋមន្ត្រីការបរទេសកូរ៉េខាងត្បូងលោក Cho Hyun នឹងមកបំពេញទស្សនកិច្ចនៅកម្ពុជាចាប់ពីថ្ងៃអាទិត្យ ទី៩ ខែវិច្ឆិកា ខាងមុខដើម្បីពិភាក្សាលើកិច្ចសហប្រតិបត្តិការប្រឆាំងឧក្រិដ្ឋកម្មឆបោកតាមអនឡាញ។ នេះបើតាមការចុះផ្សាយរបស់សារព័ត៌មានកូរ៉េ Yonhap News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Yonhap News បានដកស្រង់ប្រសាសន៍អ្នកនាំពាក្យក្រសួងការបរទេសកូរ៉េលោក Lee Jae-woong ដែលបានថ្លែងក្នុងសន្និសីទសារព័ត៌មានយកមកចុះផ្សាយកាលពីថ្ងៃទី៦ម្សិលមិញថា គោលបំណងនៃទស្សនកិច្ចគឺនឹងពិភាក្សាលើកិច្ចសហការរវាងប្រទេសកូរ៉េ និងកម្ពុជាក្នុងការចាប់ផ្ដើមសកម្មភាពរួមគ្នាឱ្យបានឆាប់ប្រឆាំងនឹងឧក្រិដ្ឋកម្មឆបោកតាមអនឡាញនៅកម្ពុជា។

Yonhap បានដកស្រង់សំដីរបស់លោក Lee មកថា៖ «ប្រតិបត្តិការនៃក្រុមការងារបែបនេះនឹងជួយប្រជាពលរដ្ឋយើង ក្នុងការដោះស្រាយបញ្ហាទាក់ទងនឹងឧក្រិដ្ឋកម្មឆបោកនៅកម្ពុជា»។

បើតាមលោក Lee ប្រទេសកម្ពុជា និងកូរ៉េ ក៏កំពុងរៀបចំអនុស្សរណៈនៃការយោគយល់គ្នាមួយលើការងារប្រឆាំងបទល្មើសអនឡាញនេះផងដែរ។

ករណីនៃការធ្វើទារុណកម្មដោយជនជាតិចិនរហូតដល់ស្លាប់និស្សិតកូរ៉េម្នាក់នៅក្រុងបូកគោ ខេត្តកំពត កាលពីខែសីហា និងបានផ្ទុះព័ត៌មាននៅខែតុលា បានធ្វើឱ្យប្រទេសកូរ៉េខាងត្បូងប្រតិកម្មជាបន្តបន្ទាប់រហូតដល់តំបន់ខ្លះនៃកម្ពុជាជាតំបន់ហាមប្រាមកម្រិតខ្ពស់ថែមទៀតផង។ ខណៈមន្ត្រីជាន់ខ្ពស់នៃប្រទេសនេះជាបន្តបន្ទាប់បានមកកម្ពុជាពិភាក្សាជាមួយអាជ្ញាធរកម្ពុជាដើម្បីសហការប្រឆាំងបទល្មើសអនឡាញនេះផងដែរ។

ក្នុងជំនួបរវាងប្រធានាធិបតីកូរ៉េលោក Lee Jae Myung និងនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នៅគូឡាឡាំពួរកាលពីថ្ងៃទី២៧ ខែតុលា អ្នកទាំងពីរបានសម្រេចឱ្យបង្កើតក្រុមការងារចម្រុះមួយរវាងកម្ពុជា និងកូរ៉េ ដើម្បីប្រឆាំងបទល្មើសឆបោកអនឡាញនេះ។ តាមការចុះផ្សាយរបស់បណ្ដាញផ្សព្វផ្សាយកូរ៉េក្រុមការងារនេះនឹងមានមូលដ្ឋាននៅកម្ពុជាចាប់ពីខែវិច្ឆិកា៕