យានយន្តអគ្គិសនីចែកជា ៣ ប្រភេទ មានមុខងារប្រើប្រាស់​ខុសៗគ្នា

យានយន្តអគ្គិសនី (EV) បានក្លាយជាមធ្យោបាយធ្វើ​ដំណើរ​ដ៏ពេញនិយមមួយនាពេលបច្ចុប្បន្ន​នេះ ខណៈយានយន្តនេះក្រៅពីជួយសន្សំសំចៃថវិកា ក៏​ផ្តល់អត្ថប្រយោជន៍ជាច្រើនសម្រាប់បរិស្ថាន។

មន្រ្តីអ្នកនាំពាក្យក្រសួងសាធារណការនិងដឹកជញ្ជូន បានបង្ហាញពីប្រភេទរថយន្តអគ្គិសនី និងលក្ខណៈប្រើប្រាស់នៃយានយន្តដែលកំពុង​មាននិន្នានការ​ប្រើប្រាស់ជា​សកល​នេះ។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ថា យានយន្តអគ្គិសនី (Electric Vehicle-EV) សំដៅដល់យានយន្តដើរដោយម៉ូទ័រអគ្គិសនី និងប្រើប្រាស់អាគុយសម្រាប់ស្តុកថាមពល។

ជាទូទៅយានយន្តអគ្គិសនីបែងចែកជា ៣ ប្រភេទ។ នេះបើតាមលោក ផន រឹម។

រថយន្តអគ្គិសនីមាន៖ ១/-ប្រភេទប្រើប្រាស់អគ្គិសនីសុទ្ធ (Battery Electric Vehicle-BEV ) ២/-ប្រភេទប្រើប្រាស់ប្រេងឥន្ធនៈ និងអាគុយ (Hybrid Electric Vehicle-HEV) និង ៣/-ប្រភេទប្រើប្រាស់ប្រេងឥន្ធនៈ និងអាគុយ តែអាចបញ្ចូលថាមពលដូចយានយន្តអគ្គិសនីសុទ្ធបាន (Plug-In HEV-PHEV)។

បច្ចុប្បន្នការអភិវឌ្ឍយានយន្តអគ្គិសនី គឺជានិន្នាការសកលដែលកំពុងកើនឡើងយ៉ាងលឿន។ សម្រាប់កម្ពុជា ការចុះបញ្ជីយានយន្តអគ្គិសនីចាប់ផ្តើមក្នុងអំឡុងឆ្នាំ ២០១៨ ដែលកាលណោះមានរថយន្តអគ្គីសនីតែ ១ គ្រឿងគត់ ដែលបានចុះបញ្ជីនៅក្រសួងសាធារណការ និងដឹកជញ្ជូន។ នេះបើតាមលោក ផន រឹម។

ការចុះបញ្ជីយានយន្តអគ្គិសនីមានកំណើនជារៀងរាល់ឆ្នាំ ដូចនឹងនិន្នាការកំណើនយានយន្តអគ្គិសនីលើសកលលោកដែរ។

លោក ផន រឹម បាន​បញ្ចាក់ថា គិតត្រឹមខែកញ្ញា ឆ្នាំ២០២៥ មានយានយន្តអគ្គិសនីចុះបញ្ជីសរុប ១០ ៥៦៨ គ្រឿង ក្នុងនោះរថយន្តអគ្គិសនី ៧ ១៨៧ គ្រឿង, ត្រីចក្រយានយន្តអគ្គិសនីចំនួន ៦៧១ គ្រឿង និងម៉ូតូអគ្គិសនីចំនួន ២ ៧១០ គ្រឿង៕