១០ខែ ច្រកចេញចូលតែមួយស្រុកព្រះស្ដេច ទទួលបានចំណូលជាង១៤លានរៀល

រយៈពេល១០ខែ ចាប់ពីខែមករា ដល់ខែតុលា ឆ្នាំ២០២៥ ការិយាល័យច្រកចេញចូលតែមួយស្រុកព្រះស្ដេច ខេត្តព្រៃវែង បន្តបម្រើសេវាជូនប្រជាពលរដ្ឋបានចំនួន ២២ ៣២៩សេវា។ តាមរយៈសេវានេះ រដ្ឋបាលស្រុកទទួលបានចំណូលចំនួន ១៤ ២០០ ៦០០រៀល។ នេះបើតាមរបាយការណ៍រដ្ឋបាលស្រុកព្រះស្ដេច។

របាយការណ៍ បានឱ្យដឹងថា ក្នុងចំណោមសេវាដែលបានផ្ដល់ពលរដ្ឋនោះ ការងារអត្រានុកូលដ្ឋានជាសេវាមានការស្មើសុំច្រើនជាងគេ គឺចំនួន១៣ ៨៥១សេវា បន្ទាប់មកគឺការងារនីត្យានុកូលកម្ម ផ្ដល់បាន៧ ៧៤២សេវា វិស័យសាធារណការ និងដឹកជញ្ជូន ផ្ដល់បាន៦១១សេវា និងវិស័យធម្មការ និងសាសនា ផ្ដល់បាន៦៣សេវា។

ជាការកត់សម្គាល់ ក្នុងចំណោមវិស័យទាំង១៧ ដែលមាននៅច្រកចេញចូលតែមួយស្រុក សម្រាប់រយៈពេល១០ខែនោះ វិស័យសំណង់ទទួលបានចំណូលខ្ពស់ជាងគេ ៣ ៧៧៣ ០០០រៀល បន្ទាប់មកវិស័យសុខាភិបាលទទួលបានចំណូល២ ៨៤០ ០០០រៀល វិស័យវប្បធម៌ និងវិចិត្រសិល្បៈ ទទួលបាន ២ ៤០០ ០០០រៀល វិស័យសាធារណការ និងដឹកជញ្ជូន ទទួលបាន ១​ ៩៦៩ ៦០០រៀល ការងារនីត្យានុកូលកម្ម ទទួលបាន១ ៥៦៨ ០០០រៀល ខណៈវិស័យមួយចំនួនពុំគិតថ្លៃសេវា។

លោក ភុន សម្ជស្ស អភិបាលស្រុកព្រះស្ដេច បានបញ្ជាក់ថា រដ្ឋបាលស្រុកតែងតែយកចិត្តទុកដាក់ និងបម្រើសេវាជូនប្រជាពលរដ្ឋដោយគុណភាព ប្រសិទ្ធភាព តម្លាភាព គណនេយ្យភាព និងកាន់តែឆាប់រហ័ស ស្របតាមគោលការណ៍ដឹកនាំ និងក្ដីប្រាថ្នារបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងតាមគោលនយោបាយ និងឆន្ទៈដឹកនាំរបស់រាជរដ្ឋាភិបាល៕