សម្ដេចធិបតីប្រាប់លោក អាន់វ៉ា ពីជំហរកម្ពុជាបន្តដោះស្រាយបញ្ហាព្រំដែនជាមួយថៃដោយសន្តិវិធី

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានគូសបញ្ជាក់ទៅកាន់នាយករដ្ឋមន្រ្តីម៉ាឡេស៊ី លោក អាន់វ៉ា ពីជំហររបស់កម្ពុជាដែលនៅបន្តរក្សាជំហរដោះស្រាយបញ្ហាព្រំដែនជាមួយប្រទេសថៃដោយសន្តិវិធី ស្របតាមកិច្ចព្រមព្រៀងសន្តិភាពដែលប្រទេសទាំងពីរបានឯកភាពគ្នា។

សម្ដេចធិបតីគូសបញ្ជាក់នេះក្នុងជំនួបសន្ទនាតាមប្រព័ន្ធទូរសព្ទជាមួយលោក អាន់វ៉ា អ៊ីប្រាហ៊ីម (Anwar Ibrahim) នារសៀលថ្ងៃនេះ ដែលជំនួបសន្ទនានេះ គឺបានពិភាក្សាអំពីការបន្តស្វែងរកដំណោះស្រាយជម្លោះព្រំដែនកម្ពុជា និងថៃដោយសន្តិវិធី បន្ទាប់ពីតាមតំបន់ព្រំដែនកម្ពុជា-ថៃ ហាក់មានភាពតានតឹងបានកើតឡើងជាថ្មីម្ដងទៀត។

សំណេរលើបណ្ដាញសង្គម សម្ដេចធិបតី ហ៊ុន ម៉ាណែត បានថ្លែងអំណរគុណដល់លោកនាយករដ្ឋមន្ត្រី អាន់វ៉ា ដែលបានបន្តដើរតួនាទីយ៉ាងសំខាន់ និងសកម្មក្នុងការសម្របសម្រួលស្វែងរកដំណោះស្រាយដោយសន្តិវីធីរវាងភាគីកម្ពុជា និងភាគីថៃ។

សម្រាប់កម្ពុជា សម្ដេចធិបតីនាយករដ្ឋមន្រ្តី បានបន្តអះអាងជាថ្មីថា «កម្ពុជាបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី និងដោយប្រើប្រាស់យន្តការដែលមានស្រាប់ និងបានឯកភាពគ្នាកន្លងមក ជាពិសេសស្របតាមស្មារតីនៃសេចក្តីថ្លែងការណ៍រួមទីក្រុងគូឡាឡាំពួ នៅថ្ងៃទី ២៦ ខែតុលា ឆ្នាំ២០២៥ ដើម្បីឈានទៅដល់ការបញ្ចប់ជម្លោះព្រំដែន និងកសាងសន្តិភាពរវាងប្រទេសទាំងពីរ»។

គួររំលឹកថា ពីទីក្រុងគូឡាឡាំពួ កម្ពុជា និងថៃ បានឈានដល់ការចុះហត្ថលេខាជាផ្លូវការដោយនាយករដ្ឋមន្ត្រីនៃប្រទេសទាំងពីរលើសេចក្ដីថ្លែងការណ៍រួម ដែលជាកិច្ចព្រមព្រៀងសន្តិភាពមួយក្នុងដំណោះស្រាយបញ្ហាជម្លោះព្រំដែន ដែលកិច្ចព្រមព្រៀងសន្តិភាពនេះ បានធ្វើឡើងចំពោះមុខប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានអាស៊ានប្ដូរវេន ជាសាក្សី។ ប៉ុន្តែប្រមាណជាងពីរសប្ដាហ៍បន្ទាប់ពីការចុះហត្ថលេខា ភាគីថៃបានប្រកាសផ្អាកការអនុវត្តនូវកិច្ចព្រមព្រៀងសន្តិភាពនេះ រហូតយោធាថៃបានបើកការបាញ់ប្រហារមួយកាលពីរសៀលថ្ងៃទី១២ ខែវិច្ឆិកា មកលើប្រជាពលរដ្ឋកម្ពុជា ដែលបានបង្កឱ្យពលរដ្ឋស្លាប់ និងរងរបួស។

ចំពោះសកម្មភាពបាញ់ប្រហាររបស់យោធាថៃលើពលរដ្ឋស៊ីវិលនោះ កម្ពុជាបានអំពាវនាវដល់សហគមន៍អន្តរជាតិចូលរួមតាមដាន និងធ្វើសកម្មភាពដោយសច្ចធម៌ ដើម្បីផ្តល់យុត្តិធម៌ដល់កម្ពុជា ជាភាគីរងគ្រោះ និងលើកតម្កើងតម្លៃសន្តិភាព ហើយជាពិសេសនោះ គឺជំរុញឱ្យភាគីថៃវិលមកគោរពឱ្យបានខ្ជាប់ខ្ជួនតាមសេចក្តីថ្លែងការណ៍រួមទីក្រុងគូឡាឡាំពួរ ដើម្បីនាំមកនូវការផ្សះផ្សារ និងការដោះស្រាយបញ្ហាឈរលើគោលការណ៍សន្តិវិធី និងច្បាប់អន្តរជាតិ៕

ដោយ៖ ធឿន វ៉ាន់សុង