ត្រីគល់រាំងពីរក្បាលជាត្រីជិតផុតពូជ ត្រូវបានលែងចូលទឹកវិញ ក្រោយអ្នកនេសាទចាប់បាន

ត្រីគល់រាំងចំនួន២ក្បាល ដែលមានទម្ងន់ចន្លោះពី ១២ ទៅ១៦គីឡូក្រាមក្នុងមួយក្បាល ព្រមទាំងត្រីត្រសក់មួយក្បាលទម្ងន់ ២គីឡូក្រាម ត្រូវបានក្រុមការងារនៃ គម្រោងអច្ឆរិយភាពនៃទន្លេមេគង្គ លែងចូលទឹកសាបវិញ បន្ទាប់អ្នកនេសាទចាប់បាន។ 

ការលែងត្រីកម្រង និងជិតផុតពូជនេះ ត្រូវបានធ្វើឡើងកាលពីថ្ងៃទី ១៨ ខែ វិច្ឆិកា ឆ្នាំ ២០២៥​ ដោយមានការចូលរួមពីក្រុមការងារនៃ គម្រោងអច្ឆរិយភាពនៃទន្លេមេគង្គ សហការជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល។ មុនព្រលែងត្រីនេះ ក្រុមការងារជំនាញ ក៏បានចូលរួមបំពាក់ស្លាកសញ្ញាលើត្រីផងដែរ។ ការលែងត្រីនេះ គឺផ្នែកមួយដែលទទួលបានការឆ្លើយតបជាវិជ្ជមានពីប្រជានេសាទ បន្ទាប់ពីក្រុមការងារចុះផ្សព្វផ្សាយតាមមូលដ្ឋានដល់ប្រជានេសាទ ឱ្យចូលរួមអភិរក្សត្រីជិតផុតពូជ។

យោងតាមការចុះផ្សាយនៅលើហ្វេសប៊ុករបស់ គម្រោងអច្ឆរិយភាពនៃទន្លេមេគង្គ ក៏បានថ្លែងអំណរគុណដល់ម្ចាស់ឧបករណ៍នេសាទ «ដាយត្រី ២ដេ» ព្រមទាំងបងប្អូនកម្មករនៅលើបែរទាំងអស់ ដែលបានទំនាក់ទំនងមកកាន់រដ្ឋបាលជលផល ដើម្បីចុះទៅលែងត្រីទឹកសាប ដែលកំពុងរងគ្រោះថ្នាក់ជិតផុតពូជទាំងនេះ ដើម្បីឱ្យវាបានទៅដល់ទីជម្រកដើមដោយសុវត្ថិភាព។

គម្រោងអច្ឆរិយភាពនៃទន្លេមេគង្គ បានអំពាវនាវថា៖«សូមចូលរួមការពារប្រភេទត្រីកម្រ «ត្រីរាជ ត្រីគល់រាំង ត្រីបបែលយក្ស ត្រីត្រសក់ ត្រីប៉ាសាណាក និងធននធានជលផលដែលកំពុងរងគ្រោះថ្នាក់ឱ្យបានគ្រប់ៗគ្នា»។ ការពារត្រីកម្រនៅថ្ងៃនេះ គឺជាការការពារប្រព័ន្ធអេកូឡូស៊ីទន្លេមេគង្គសម្រាប់ពេលអនាគត៕