គ.ជ.អ.ប ចុះទស្សនកិច្ចដកស្រង់បទពិសោធន៍ពាក់ព័ន្ធការងារគណនេយ្យភាពសង្គម ក្នុងខេត្តកណ្ដាល

នៅថ្ងៃទី២០ ខែវិច្ឆិកា ឆ្នាំ២០២៥ លេខាធិការដ្ឋាននៃគណៈ​កម្មាធិការ​ជាតិ​សម្រាប់​ការ​អភិវឌ្ឍ​តាម​បែប​ប្រជា​ធិបតេយ្យ​នៅ​ថ្នាក់​ក្រោម​ជាតិ​ ​(គ.ជ.​អ.ប.)​ សហការជាមួយនឹងរដ្ឋបាលខេត្តកណ្តាល បានរៀបចំកម្មវិធីដំណើរទស្សនកិច្ចសិក្សាស្វែងយល់អំពីការអនុវត្តការងារគណនេយ្យភាពសង្គម និងការវិភាជន៍ថវិកាគាំទ្រ ក្នុងភូមិសាស្ត្រខេត្តកណ្តាល។ 

កម្មវិធីនេះរៀបចំឡើងក្នុងគោលបំណងផ្តល់ឱកាសឱ្យក្រសួង ស្ថាប័ន សមាជិក សមាជិកានៃក្រុមការងារគណនេយ្យភាពសង្គមថ្នាក់ខេត្តរាជធានី និងអ្នកពាក់ព័ន្ធ បានសិក្សាស្វែង​យល់អំពីការអនុវត្តល្អៗ និងចែករំលែកបទពិសោធន៍គ្នាទៅវិញទៅមកជុំវិញការងារគណនេយ្យភាពសង្គម និងដំណើរការនៃការ​វិភាជន៍ថវិការបស់រដ្ឋបាលថ្នាក់ក្រោមជាតិ។​

បើតាមលេខាធិការដ្ឋាន គ.ជ.​អ.ប កម្មវិធីដំណើរទស្សនកិច្ចនេះ ជាគំនិតផ្តួចផ្តើមថ្មីមួយក្នុងការគិតគូរអំពីការធានានូវនិរន្តរភាពនៃការអនុវត្តការងារគណនេយ្យភាពសង្គមនៅថ្នាក់ឃុំសង្កាត់ ក្រោយពេលដែលការដកថយរបស់ដៃគូអភិវឌ្ឍន៍ និងអង្គការសង្គមស៊ីវិល តាមរយៈការបញ្រ្ជាបការងារគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ។

លោក ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. និងជានាយកគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ ដំណាក់កាលទី២ (ISAF II) បានលើកឡើងថាគំនិតផ្តួចផ្តើមនៃកម្មវិធីទស្សនកិច្ចសិក្សានេះ ឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់រដ្ឋាភិបាលក្នុងការពង្រឹងការចូលរួមរបស់ប្រជាពលរដ្ឋ និងធ្វើឱ្យប្រសើរឡើងនូវគុណភាពនៃការផ្តល់សេវាសាធារណៈនៅមូលដ្ឋានឱ្យកាន់តែប្រសើរឡើង។

លោក ប្រាក់ សារ៉ាត់ អភិបាលរងខេត្តកណ្តាល និងជាប្រធានក្រុមការងារគណនេយ្យភាពសង្គមថ្នាក់ខេត្ត ​លើកឡើងថា «តាមរយៈការផ្លាស់ប្ដូរនេះ គឺយើងរៀនពីបទពិសោធន៍ពីគ្នាទៅវិញទៅមក ដើម្បីបម្រើប្រជាពលរដ្ឋរបស់យើងឱ្យកាន់តែប្រសើរឡើង និងធានាបាននូវអភិបាលកិច្ចដែលមានតម្លាភាព ​គណនេយ្យភាព និងប្រសិទ្ធភាពនៃការផ្តល់សេវាកាន់តែប្រសើរឡើង»។

គិតត្រឹមឆ្នាំ២០២៥ ការអនុវត្តការងារគណនេយ្យភាពសង្គម បាននិងកំពុងអនុវត្តក្នុងក្រុងស្រុកខណ្ឌគោលដៅចំនួន១៩០ នៃរាជធានីខេត្តចំនួន២៥ ដោយគ្របដណ្តប់លើការផ្តល់សេវារបស់រដ្ឋបាលឃុំសង្កាត់ចំនួន១ ៥៥០ ស្មើនឹង៩៤% នៃឃុំសង្កាត់ទូទាំងប្រទេស។ នេះបើតាមលេខាធិការដ្ឋាន គ.ជ.​អ.ប ដែលក្នុងនោះ មានសាលាបឋមសិក្សាចំនួន៦ ៩២២ ស្មើនឹង៩៤% នៃសាលាបឋមសិក្សាទូទាំងប្រទេស មណ្ឌលសុខភាពចំនួន១ ២៥៦ ស្មើនឹង៩៦% នៃមណ្ឌលសុខភាពទូទាំងប្រទេស និងការផ្តល់សេវារបស់រដ្ឋបាលក្រុងស្រុកខណ្ឌចំនួន៥៤ ស្មើនឹង២៦% នៃក្រុងស្រុកខណ្ឌទូទាំងប្រទេស៕