ព័ត៌មានជាតិ

លោក វិទីត មុនតាប៊ន ទើបចេញសេចក្ដីថ្លែងការណ៍រឿងព្រំដែនកម្ពុជា-ថៃ ក្រោយទូតខ្មែរនៅ UN រាយការណ៍ពីភាពអសកម្ម

បានផុស

៨ ខែ មុន

នៅ

ថ្ងៃអង្គារ ២៥ វិច្ឆិកា ២០២៥

ដោយ

អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជាលោក វិទីត មុនតាប៊ន ទើបតែចេញសេចក្ដីថ្លែងការណ៍ទាក់ទងនឹងជម្លោះព្រំដែនកម្ពុជា-ថៃ បន្ទាប់ពីឯកអគ្គរាជទូតខ្មែរប្រចាំអង្គការសហប្រជាជាតិលោក អ៊ិន តារា បានរាយការណ៍ពីភាពអសកម្មរបស់លោក វីទិត ទៅកាន់ឧត្តមស្នងការសិទ្ធិមនុស្សអង្គការសហប្រជាជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីថ្លែងការណ៍នៅថ្ងៃទី២៤ ខែវិច្ឆិកា ឆ្នាំ២០២៥ លោក វិទីត មុនតាប៊ន បានថ្លែងស្វាគមន៍សេចក្ដីថ្លែងការណ៍សន្ដិភាពកម្ពុជាថៃ និងថាការអនុវត្តន៍មនុស្សធម៌គឺជាកត្តាចាំបាច់ ដែលត្រូវកាត់បន្ថយនូវភាពតានតឹង និងដោះស្រាយជម្លោះដោយសន្ដិវិធីស្របតាមច្បាប់អន្តជាតិ។

លោកបន្ថែមថា៖ «ជនស៊ីវិលដែលរងផលប៉ះពាល់ដោយស្ថានការណ៍នៅព្រំដែនគួរតែត្រូវបានជួយតាមស្ដង់ដារសិទ្ធិមនុស្ស»។

ការលើកឡើងរបស់អ្នករាយការណ៍ពិសេសសិទ្ធិមនុស្សនៅកម្ពុជា ដែលជាជនជាតិថៃរួបនេះធ្វើឡើង៥ថ្ងៃបន្ទាប់ពីទូតខ្មែរនៅអង្គការសហប្រជាជាតិរាយការណ៍ភាពអសកម្មទៅកាន់ឧត្តមស្នងការសិទ្ធិមនុស្សអង្គការសហប្រជាជាតិលោក Volker Türk កាលពីថ្ងៃទី១៩ ខែវិច្ឆិកា នៅទីក្រុងហ្សឺណែវ។

ក្នុងជំនួបនោះឯកអគ្គរាជទូតកម្ពុជាលោក អ៊ិន តារា បានបង្ហាញការសោកស្ដាយផងដែរដែលលោក វិទីត មុនតាប៊ន ដែលជាអ្នករាយការណ៍ពិសេសស្ដីពីសិទ្ធិមនុស្សនៅកម្ពុជា ដែលអសកម្មក្នុងការឆ្លើយតបពីការបំពានតាមព្រំដែនដោយថៃនេះ។ លោកក៏ព្រមានថាកម្ពុជានឹងចាត់វិធានការសមស្របផងដែរចំពោះភាពអសកម្មនេះ។

លោកថា៖ «អាណត្តិរបស់អ្នករាយការណ៍ពិសេសមិនមែនគ្របដណ្តប់ត្រឹមតែការអភិវឌ្ឍសិទ្ធិមនុស្សក្នុងស្រុកប៉ុណ្ណោះទេ ប៉ុន្តែថែមទាំងការបំពានសិទ្ធិដែលកើតចេញពី ឬជាប់ទាក់ទងនឹងជម្លោះប្រដាប់អាវុធដែលកំពុងបន្តផងដែរ»។

គួរឱ្យដឹងផងដែរថាលោក វិទីត មុនតាប៊ន គឺជាអ្នករាយការណ៍ពិសេសស្តីពីសិទ្ធិមនុស្សនៅកម្ពុជាបន្តការងារពីលោកស្រី Rhona Smith នៅឆ្នាំ២០២១។ លោកកើតនៅខែវិច្ឆិកា ឆ្នាំ១៩៥២ គឺជាជនជាតិថៃ ដែលទទួលការអប់រំនៅចក្រភពអង់គ្លេស ជាអ្នកដែលធ្វើការច្រើនក្នុងស្ថាប័នសិទ្ធិមនុស្សសហប្រជាជាតិ និងជាសាស្ត្រាចារ្យផ្នែច្បាប់នៅប្រទេសថៃផងដែរ៕

អត្ថបទដោយ ហ៊ុន សិរីវឌ្ឍន៍