កសិដ្ឋានដាំបន្លែសុវត្ថិភាពមួយកន្លែងក្នុងខេត្តមណ្ឌលគិរី គ្រោងពង្រីកដាំដុះឆ្លើយតបត្រូវការក្នុងស្រុក

កសិដ្ឋានបន្លែសុវត្ថិភាពមួយកន្លែង ស្ថិតនៅភូមិពូលុង សង្កាត់រមនា ក្រុងសែនមនោរម្យ ខេត្តមណ្ឌលគីរី ដែលវិនិយោគដោយជនជាតិចិន ឈ្មោះ​ Wang lei lei កំពុងដាំដុះបន្លែលើផ្ទៃដី ១០ ហិកតា។ កសិដ្ឋាននេះដើរតួនាទីយ៉ាងសំខាន់ក្នុងការផ្គត់ផ្គង់បន្លែរាប់រយគីឡូក្រាមមកកាន់រាជធានីភ្នំពេញ ដោយចែកចាយបន្លែចំនួន ៣ តោនទៅកាន់ទីផ្សាររៀងរាល់បីថ្ងៃម្តង។​

កសិដ្ឋាននេះមានផ្ទៃដីដាំបន្លែចំនួន ១០ ហិកតា រួមទាំងដាំដុះក្នុងផ្ទះសំណាញ់ចំនួន ៤០ខ្នង ហើយថែមទាំងដាំបន្លែនៅទីវាលផងដែរ រួមមាន តាសក់វែង ម្ទេសវែង ត្រប់ សណ្ដែកកួរ ល្ពៅ ។ បន្លែទាំងអស់នេះត្រូវបាននាំចេញទៅកាន់ទីផ្សារភ្នំពេញដែលមានតម្លៃខ្ពស់ និងដំណាំចម្រុះផ្សេងៗទៀត។ ដើម្បីបំពេញតម្រូវការទីផ្សារក្នុងស្រុក ខណៈពេលដែលព្រំដែនគោកកម្ពុជា-ថៃត្រូវបានបិទ កសិករជនជាតិចិនរូបនេះក៏មានគម្រោងពង្រីកការដាំដុះ និងបង្កើនការផលិតបន្លែចម្រុះបន្ថែមទៀតដល់ ២០ តោនក្នុងមួយថ្ងៃ។

នាឱកាសដឹកនាំមន្រ្តីចុះត្រួតពិនិត្យទីតាំងកសិដ្ឋានបន្លែសុវត្ថិភាព កាលពីថ្ងៃទី ២៥​ខែវិច្ឆិកា ឆ្នាំ២០២៥ អភិបាលខេត្តមណ្ឌលគិរី លោក ថង សាវុន បានណែនាំដល់ម្ចាស់កសិដ្ឋានដាំដុះបន្លែសុវត្ថិភាពត្រូវអនុវត្ត និងប្រកាន់ខ្ជាប់នូវការថែរក្សាឱ្យបាននូវគុណភាព សុវត្ថិភាពដល់អ្នកប្រើប្រាស់ និងសហការជាមួយមន្ទីរជំនាញ ដើម្បីឈានទៅការទទួលបាននូវវិញ្ញាបនកម្មនៃការអនុវត្តតាមគោលការណ៍កសិកម្មល្អ (GAP) សមស្របទៅតាមតម្រូវការទីផ្សារនាពេលបច្ចុប្បន្ន។

លើសពីនេះ លោកអភិបាលខេត្តបានលើកទឹកចិត្តដល់កសិករទាំងអស់ ត្រូវបង្កើនការដាំដុះដំណាំបន្លែឱ្យបានច្រើន ដូចជា ស្ពៃក្តោប ស្ពៃបូកគោ ការ៉ុត ដំឡូងជ្វាជប៉ុន និងដំណាំបន្លែផ្សេងទៀត ដើម្បីបំពេញតម្រូវការទីផ្សារក្នុងស្រុក និងកាត់បន្ថយការនាំចូលបង្កើនឱកាសការងារ៕

ដោយ៖ រៀម សុខហេង