ព័ត៌មានជាតិ

អភិបាលរងខណ្ឌពោធិ៍សែនជ័យ ៖ អាជ្ញាធរពុំដែលមានចេតនាវាយកម្ទេច ឬរើបំផ្លាញទ្រព្យសម្បត្តិពលរដ្ឋណាម្នាក់ឡើយ តែជាវិធានការចំពោះមុខ

បានផុស

៧ ខែ មុន

នៅ

ថ្ងៃពុធ ២៦ វិច្ឆិកា ២០២៥

ដោយ

លោកអភិបាលរងខណ្ឌពោធិ៍សែនជ័យ លើកឡើងថា «អាជ្ញាធរ នៃរដ្ឋបាលខណ្ឌ ពុំដែលមានចេតនាណាមួយទៅវាយកម្ទេច ឬទៅរើបំផ្លាញទ្រព្យសម្បត្តិរបស់ប្រជាពលរដ្ឋណាម្នាក់នោះឡើយ ប៉ុន្តែជាវិធានការចំពោះមុខ និង ដើម្បីធានាប្រសិទ្ធភាពការងារឲ្យទទួលបានផល គឺក្រុមការងារចាំបាច់ត្រូវតែអនុវត្តវិធានការក្តៅចំពោះទីតាំងមួយចំនួនតូចដែលនៅតែបន្តការរំលោភបំពានមិនស្តាប់ការជូនដំណឹងណែនាំរបស់អាជ្ញាធរ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ាង លីដា អភិបាលរងខណ្ឌពោធិ៍សែនជ័យ ទទួលបន្ទុកកិច្ចការងារសណ្ដាប់ធ្នាប់សាធារណៈ តំណាងលោក សក់ ចន្ទកញ្ញារិទ្ធ អភិបាលខណ្ឌ លើកឡើងបន្តថា កិច្ចការងាររៀបចំសណ្ដាប់ធ្នាប់លើដងផ្លូវ ដើម្បីសោភ័ណភាព ពិសេសការរំដោះចិញ្ចើមផ្លូវទុកសម្រាប់ឲ្យពលរដ្ឋថ្មើរជើងបាន គឺ ទាមទារការចូលរួមខ្ពស់ណាស់ពីបណ្ដាអ្នកពាក់ព័ន្ធ ពិសេសនោះប្រជាពលរដ្ឋក្នុងមូលដ្ឋានតែម្ដង។

លោក ជា ហាក់ ជាប្រជាពលរដ្ឋ បានសម្ដែងក្ដីរីករាយក្នុងការចូលរួមសហការជាមួយអាជ្ញាធរក្នុងការរៀបចំសណ្ដាប់ធ្នាប់ចិញ្ចើមផ្លូវ និងដងផ្លូវសាធារណៈ ព្រោះពួកគាត់ក៏ចង់បានផ្លូវធំទូលាយស្អាតល្អ បង្កលក្ខណៈងាយស្រួលដល់ការរស់នៅ ការធ្វើដំណើរ និងការប្រកបមុខរបររកស៊ីទទួលទានជាដើម ពិសេសចង់បានទីក្រុងមានសោភ័ណភាព និងរបៀបរៀបរយខ្ពស់ផងដែរ។

គួររំលឹកថា បញ្ហាសណ្ដាប់ធ្នាប់លើដងផ្លូវសាធារណៈនេះដែរ កាលពីពេលថ្មីៗ នេះ លោក ឃួង ស្រេង អភិបាលរាជធានីភ្នំពេញ បានបន្តការក្រើនរំលឹកខ្ពស់ទៅកាន់អាជ្ញាធរទាំង ១៤ ខណ្ឌ និងផ្សាររដ្ឋទាំង ២៥ ឲ្យបន្តការយកចិត្តទុកដាក់រៀបចំឲ្យបានស្អាតល្អ ធានាភាពល្អប្រសើរ ពិសេសការងាររំដោះចិញ្ចើមផ្លូវសាធារណៈក្នុងរាជធានីភ្នំពេញ ទុកសម្រាប់ការថ្មើរជើង គឺត្រូវតែអនុវត្តឲ្យមានប្រសិទ្ធភាព៕

អត្ថបទ ៖ សុភា