ប្រមុខការទូតកម្ពុជា និងឡាវ ជួបគ្នានិយាយពីភាពជាអ្នកជិតខាងល្អ ដើម្បីប្រយោជន៍ប្រទេសទាំងពីរ

នៅថ្ងៃទី២៧ ខែវិច្ឆិកា ២០២៥ លោក ប្រាក់ សុខុន រដ្ឋមន្ត្រីការបរទេសកម្ពុជា ធ្វើជាសហប្រធានជាមួយសមភាគីឡាវ លោក ថងសាវណ្ណ ភុមិវិហាន ក្នុងកិច្ចប្រជុំលើកទី១៥ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី នៅទីក្រុងវៀងចន្ទន៍។ កិច្ចប្រជុំនេះ ប្រមុខការទូតទាំងពីរបានជជែកគ្នាពីភាពជាអ្នកជិតខាងល្អដើម្បីពង្រឹងទំនាក់ទំនង និងកិច្ចសហប្រតិបត្តិការកម្ពុជា និងឡាវ។

លោក ប្រាក់ សុខុន និងលោក ថងសាវណ្ណ ភុមិវិហាន បានវាយតម្លៃខ្ពស់ពីសារៈសំខាន់នៃការរីកចម្រើនទំនាក់ទំនងទ្វេភាគីកម្ពុជា និងឡាវ ដែលត្រូវបានផ្សារភ្ជាប់តាមរយៈសាមគ្គីភាព និងកិច្ចសហប្រតិបត្តិការយ៉ាងជិតស្និទ្ធជាច្រើនឆ្នាំ។ ភាគីទាំងពីរ ក៏បានគូសបញ្ជាក់ជាថ្មីនូវការប្តេជ្ញាចិត្តរួមក្នុងការបន្តពង្រឹងភាពជាដៃគូដ៏សំខាន់នេះ ដើម្បីផលប្រយោជន៍ប្រទេសទាំងពីរ។

កិច្ចប្រជុំនៅថ្ងៃនេះ សមភាគីទាំងពីរ ក៏បានត្រួតពិនិត្យវឌ្ឍនភាពនៃកិច្ចប្រជុំ កាលពីលើកទី១៤ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីកម្ពុជា-ឡាវ និងស្វែងរកវិស័យថ្មីៗដើម្បីបន្តពង្រឹង និងពង្រីកកិច្ចសហប្រតិបត្តិការរបស់ប្រទេសទាំងពីរបន្ថែមទៀត។ បន្ទាប់ពីបញ្ចប់កិច្ចប្រជុំ ភាគីទាំងពីរ បានចុះហត្ថលេខាលើកំណត់ហេតុ កិច្ចប្រជុំ លើកទី១៥នេះ៕