ស៊ីម៉ាក់ និងអង្គការអាប៉ូប៉ូ ចាប់ដៃគ្នាលើគម្រោងបោសសម្អាតមីន ដោយប្រើកណ្តុរហិតមីន និងសុនខ

អង្គភាពស៊ីម៉ាក់កម្ពុជា និងអង្គការអាប៉ូប៉ូ បានចុះអនុស្សរណៈយោគយល់គ្នា ដើម្បីអនុវត្តលើគម្រោងបោសសម្អាតមីនរបស់ស៊ីម៉ាក់ ដោយប្រើកណ្តុរហិតរកមីន និងសុនខស្រាវជ្រាវបច្ចេកទេស។

អនុស្សរណៈយោគយល់គ្នានេះ ត្រូវបានហត្ថលេខានៅថ្ងៃទី៤ ខែធ្នូ ឆ្នាំ២០២៥នេះ ដោយលោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ និងលោក Michael Raine ប្រធានកម្មវិធីអង្គការអាប៉ូប៉ូ ប្រចាំកម្ពុជា។

បើតាមលោក ហេង រតនា គម្រោងខាងលើ មានទំហំទឹកប្រាក់ចំនួន ២៨១.៤៩០,៣៥ដុល្លារអាមេរិក ដែលនឹងអនុវត្តក្នុងរយៈពេល១ឆ្នាំ គិតចាប់ផ្តើមពីថ្ងៃទី១ ខែមករា ឆ្នាំ២០២៦ ដល់ថ្ងៃទី៣១ ខែធ្នូ ឆ្នាំ២០២៦។

តាមរយៈគម្រោងនេះ មានផែនការបោសសម្អាតផ្ទៃដីចំនួន៧.៥៦០.០០០ម៉ែត្រក្រឡា ដែលប្រតិបត្តិការនៅកងឯកភាពកំចាត់មីនទី៤ខេត្តសៀមរាប និងកងឯភភាពកំចាត់មីនទី៦ ខេត្តព្រះវិហារ។ ជាមួយជំនួយនេះ អង្គភាពស៊ីម៉ាក់នឹងពង្រាយកម្លាំងបោសសម្អាតមីន សុនខហិតមីន និងកណ្តុរហិតមីន ទៅតាមតំបន់គោលដៅក្នុងផែនការបោសសម្អាតមីនសម្រាប់ឆ្នាំ២០២៦៕