ស៊ីម៉ាក់កម្ពុជា៖ ថៃបន្លំខ្លួនជាទាហានខ្មែរសម្តែងដាក់មីន PMN-2 និងដើរតួជាជនរងគ្រោះ

មជ្ឈមណ្ឌលសកម្មភាពកំចាត់មីនកម្ពុជា-CMAC បានចេញមកបញ្ជាក់ថា​ ថៃបន្លំខ្លួនជាទាហានខ្មែរសម្តែងដាក់មីន PMN-2។ ការបញ្ជាក់នេះ បន្ទាប់ថៃបានបញ្ចេញឃ្លីបវីដេអូមួយដោយចោទថាទាហានកម្ពុជាដាក់មីនថ្មី។ ក្នុងវីដេអូ ឃើញមានទាហានពាក់ឯកសណ្ឋានកម្ពុជានិយាយភាសាខ្មែរផង និងភាសាថៃផង។

ជាការឆ្លើយតប មជ្ឈមណ្ឌលសកម្មភាពកំចាត់មីនកម្ពុជា បានធ្វើការពន្យល់នៅក្នុងវីដេអូនោះដោយលាតត្រដាងពីការពិត។ ភស្តុតាងនោះដូចជា ម៉ូតូក្នុងវីដេអូនេះមានផ្លាកលេខថៃ ហើយទាហាននោះនិយាយភាសាថៃផងដែរ។ ការបន្លំខ្លួននេះត្រូវបាន CMAC ចំអកថា ៖«បោកបានតែជនជាតិថៃគ្នាឯងដែលចង់បង្កសង្រ្គាមជាមួយប្រទេសជិតខាងបាន តែមិនអាចបំភ្លៃការពិតបានទេ។ កាន់តែប្រឹងសម្តែង កាន់តែបង្ហាញភាពអាម៉ាស់ដល់ពិភពលោក»។

ពាក់ព័ន្ធថៃខំបង្កើតព័ត៌មានប្រឌិតនេះ ត្រូវបានអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា លោក ហេង រតនា​ បកអាក្រាត្រថា ថៃកំពុងកែច្នៃក្រឡៃសត្វដំរីមកជាសត្វស្រមោច និងរីឯសត្វស្រមោចឱ្យក្លាយជាសត្វដំរី។ លោកសង្កត់​ធ្ងន់ថា បញ្ហាគ្រាប់មីន​ សៀមខិតខំបង្ហាញថា​ ខ្លួនជាជនរងគ្រោះព្រោះខែ្មរប្រើគ្រាប់មីនPMN-2ថ្មី​ ក្នុងទឹកដីថៃ​! ។ លោកចោទជាសំណួរថា តើយកទៅដាក់ក្នុងទឹកដីសៀមរបៀបម៉េច ទឹកដីស្ថិតនៅទល់មុខគ្នានោះ​ជាដីមានជម្លោះ។

បើតាមលោក ហេង រតនា ​ថៃខិតខំប្រែក្លាយខ្លួនជាជនរងគ្រោះ ហើយចោទថា​កម្ពុជាខូចរកស៊ីលាបពណ៌​ថៃ​ ដោយយកគ្រាប់បែកMK-84 សំណល់សង្គ្រាមឆ្នាំ១៩៧០-១៩៧៣​ មកដាក់តាំងបង្ហាញ។​ ប៉ុន្តែលោកថាជាក់ស្តែង​គ្រាប់បែកMK-84 ស្ថិតនៅភូមិថ្មដូន​ ឃុំគោកមននេះ​ ផលិតឆ្នាំ១៩៩៦​ ហើយគ្រាប់បែកMK-82ទម្លាក់នៅវត្តតាមន្តសែនជ័យផលិតនៅឆ្នាំ២០២៣។

តើគ្រាប់បែកផលិតនៅឆ្នាំ១៩៩៦ និង២០២៣​ អាចជាសំណល់សង្គ្រាមឆ្នាំពី១៩៧០-១៩៧៣ កើតដែរឬ? ទីតាំងគ្រាប់បែកទម្លាក់នេះនៅសល់៥គ្រាប់ទៀ​តនៅកប់ដីនៅឡើយ ហើយមនុស្សម្នាលើលោកអាចមកឃើញគ្រាប់បែកទាំងនេះបាន​ និងអាចចុះមកពិនិត្យបាននៅពេលមន្ត្រីជំនាញCMACដោះបន្សាបនាពេលខាងមុខ។ 

បើតាមអគ្គនាយកស៊ីម៉ាក់ ប្រាសាទព្រះវិហារ ក៏ត្រូវរងគ្រោះដោយសារគ្រាប់ផ្លោង១៥៥មម​ គ្រាប់បែកចង្កោម​ និងគ្រាប់ជាច្រើនប្រភេទ​ ហើយនៅពេលឃើញរណ្តៅគ្រាប់និងការបែកបាក់ប្រាសាទទាំងនោះ ពួកសៀមបែរជាចោទខ្មែរ​ថា រណ្តៅគ្រាប់ទាំងនោះ​ខែ្មររៀបចំជីករណ្តៅបង្ហាញ​ដើម្បីលាបពណ៌បង្ខូចឈ្មោះថៃ​ ហើយថៃជាជនរងគ្រោះទៅវិញ។ លោកថា៖«មនុស្សក្នុងពិភពលោកក្នុងយុគសម័យបដិវត្តន៍បច្ចេកវិទ្យាAIនេះ​ ពិតជាមិនខ្វះប្រាជ្ញាពិចារណាលើបញ្ហានេះទាំងនេះ​ ដូចជាគ្រាប់បែក​MK-82 MK-84 និងគ្រាប់បែកចង្កោម​ មានប្រភពច្បាស់លាស់ណាស់ទាំងអ្នកផលិត​ អ្នកលក់ដូរ​ អ្នកដឹកជញ្ជូន​ និងអ្នកប្រើប្រាស់»៕