ត្រាំ ប្រកាសថា ថៃ និងកម្ពុជាព្រមគ្នាឈប់បាញ់ ដោយត្រឡប់ទៅគោរពតាមកិច្ចព្រមព្រៀងសន្តិភាពក្រុងគូឡាឡំពួ

ប្រធានាធិបតីអាមេរិក លោក ដូណាល់ ត្រាំ បាន​ប្រកាសនៅពាក់កណ្ដាលយប់រំលងអធ្រាត្រចូលថ្ងៃសៅរ៍ទី ១៣ ធ្នូ នេះ (ម៉ោងនៅកម្ពុជា) ថា ថៃ និងកម្ពុជា បា​នព្រមព្រៀងគ្នាលើបទឈប់បាញ់ ដោយ​ត្រឡប់ទៅគោរពតាមកិច្ចព្រមព្រៀងសន្តិភាពក្រុងគូឡាឡំពួ ដែលសម្រេចបាន​នៅចុងខែតុលា ឡើងវិញ។

ការប្រកាសរបស់លោក ត្រាំ ធ្វើឡើងបន្ទាប់ពីមេដឹកនាំអាមេរិក​រូបនេះ បាន​សន្ទនាទូរស័ព្ទជាមួយនាយករដ្ឋមន្រ្តីថៃ លោក អានុទីន ឆានវីរៈគុណ ដែលទើបប្រកាសរំលាយសភាថ្មីៗ និងនាយករដ្ឋមន្រ្តីកម្ពុជា សម្ដេចធិបតី ហ៊ុន ម៉ាណែត នៅល្ងាចថ្ងៃសុក្រ (ពេលព្រឹកនៅទីក្រុងវ៉ាស៊ីនតោន ថ្ងៃដដែល) អំពីការផ្ទុះឡើងជាថ្មីនៃជម្លោះប្រដាប់អាវុធតាមព្រំដែនរវាងប្រទេសទាំង២​។

លោក ត្រាំ បាន​បង្ហោះសារនៅលើបណ្ដាញសង្គម Truth Social របស់លោកយ៉ាងដូច្នេះថា៖ «ពួកគេបាន​យល់ព្រមលើការឈប់បាញ់ទាំងអស់ ដោយចូលជាធរមានពីល្ងាចនេះទៅ ហើយត្រឡប់ទៅគោរពតាមកិច្ចព្រមព្រៀងសន្តិភាពដើម ដែលធ្វើឡើងជាមួយខ្ញុំ ជាមួយនឹង​ជំនួយពីនាយករដ្ឋមន្រ្តីដ៏អស្ចារ្យរបស់ម៉ាឡេស៊ី លោក អាន់វ៉ា អ៊ីប្រាហ៊ីម»។

ល្ងាចក្នុងការប្រកាសរបស់លោក ប្រហែលជាចង់សំដៅលើល្ងាចថ្ងៃសុក្រនៅសហរដ្ឋអាមេរិក ដែលស្មើនឹងព្រឹកថ្ងៃសៅរ៍ នៅកម្ពុជា។

អ្វីដែលជាការណ៍គួរឱ្យកត់សម្គាល់នោះគឺថា លោក ត្រាំ បាន​ហៅការដើរជាន់មីន ដែលធ្វើ «ឱ្យទាហានថៃស្លាប់ និងរបួសជាច្រើននាក់នោះ ជាគ្រោះថ្នាក់ដោយចៃដន្យ» ប៉ុន្តែយ៉ាងណាក៏ដោយ​ «ថៃបាន​សងសឹកយ៉ាងខ្លាំងក្លា»។

លោក ត្រាំ បានបន្តថា ប្រទេសទាំង២បានត្រៀមខ្លួនសម្រាប់សន្តិភាព និងបន្តធ្វើពាណិជ្ជកម្មជាមួយ​សហរដ្ឋអាមេរិក។ លោកបានបន្ថែមទៀតថា វាគឺកិត្តិយសមួយសម្រាប់លោកក្នុងការដោះស្រាយជម្លោះ «ដែលអាចវិវត្តក្លាយជាសង្រ្គាមទ្រង់ទ្រាយធំមួយ​» រវាងថៃ និងកម្ពុជា។ លោក ត្រាំ ក៏បាន​អរគុណដល់លោក អាន់វ៉ា សម្រាប់ការសម្របសម្រួលរបស់លោកផងដែរ។

គួរគូសបញ្ជាក់ថា ជម្លោះចុងក្រោយបាន​ផ្ទុះឡើងកាលពីថ្ងៃអាទិត្យ ដោយ​កម្ពុជាចោទប្រកាន់ថៃថាបាន​រំលោភលើកិច្ចព្រមព្រៀងសន្តិភាព បង្កហេតុ និងឈ្លានពានកម្ពុជា។ ភាពតានតឹងកាន់តែខ្លាំង ដោយ​ថៃបាន​វាយប្រហារលើទីតាំងយោធា និងស៊ីវិលកម្ពុជា ដោយប្រើទាំងយន្តហោះចម្បាំងទម្លាក់គ្រាប់បែក ការផ្លោងគ្រាប់ និងការបាញ់​កាំភ្លើងដៃ នៅខេត្តព្រំដែនចំនួន ៥ រួមមាន​ព្រះវិហារ ឧត្តរមានជ័យ បន្ទាយមានជ័យ បាត់ដំបង និងពោធិ៍សាត់។ យោធាថៃបាន​វាយប្រហារដោយមិនរើសមុខលើតំបន់ជនស៊ីវិល និងទីកន្លែង/ប្រាសាទប្រវត្តិសាស្រ្ត​ ដោយសម្លាប់ជនស៊ីវិលស្លូតត្រង់កម្ពុជាប្រមាណ ១១ នាក់ និងរបួសជាង ៧០ នាក់ គិតត្រឹមល្ងាចថ្ងៃសុក្រ (១២ ធ្នូ)។

ដោយឡែកក្នុងកិច្ចសន្ទនាទូរស័ព្ទជាមួយ​ ត្រាំ លោក អានុទីន នៅតែទទូចថា ថៃមិនដែលបំពានលក្ខខណ្ឌ និងមិនមែនជាអ្នកឈ្លានពាន ដោយសកម្មភាពយោធារបស់ខ្លួន ធ្វើឡើងដើម្បីតែការពារអធិបតេយ្យភាព ទឹកដី និងសុវត្ថិភាពពលរដ្ឋថៃ ប៉ុណ្ណោះ។ នេះបើតាមការចុះផ្សាយរបស់សារព័ត៌មាន Thai Enquirer។ ក្នុងសេចក្ដីសង្ខេបរបស់រដ្ឋាភិបាលថៃ ដែលចេញផ្សាយ​ក្រោយកិច្ចសន្ទនាតាមទូរស័ព្ទដដែល លោក អានុនីន បាន​ប្រាប់ទៅ ត្រាំ ថា កម្ពុជាត្រូវតែជាអ្នកប្រកាស និង​អនុវត្តការបញ្ឈប់គ្រប់អរិភាព​ទាំងអស់ ដោយ​ដកទ័ពចេញ និងមីនដែលកម្ពុជាបានដាក់ថ្មី។ កម្ពុជាតែងតែច្រានចោលការចោទប្រកាន់របស់ថៃជុំវិញបញ្ហាមីននេះ ដោយសំអាងថា វាបន្សល់ទុកពីសម័យដើម៕