លោកជំទាវ ពេជ ចន្ទមុន្នី ឱ្យសាខាកាយឬទ្ធិនារីកម្ពុជាបំផុសការដាំបន្លែទុកផ្គត់ផ្គង់ និងគាំទ្រជនភៀសសឹក

ដេីម្បីបង្កេីនទឹកចិត្តនិងកំលាំងខ្មែរជួយខ្មែរ! លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត  អគ្គស្នងការសមាគមកាយប្ញទ្ធិនារីកម្ពុជា  បានឱ្យសាខាកាយឬទ្ធិនារីកម្ពុជាទាំងអស់ ដាំបន្លែបង្កណាដែលងាយទទួលផលលឿន  ទុកផ្គត់ផ្គង់ជូនជនភៀសសឹកដែលរងគ្រោះ ព្រោះតែការឈ្លានពានពីសំណាក់យោធាថៃ បើកការវាយប្រហារ ទម្លាក់គ្រាប់បែកចូលទីតាំងស៊ីវិល មិនរើសគោលដៅ។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត លើកឡើងតាមរយៈគណនីហ្វេសប៊ុកផ្លូវការដូច្នេះ ៖«ដេីម្បីបង្កេីនទឹកចិត្ត និងកំលាំងខ្មែរជួយខ្មែរនាងខ្ញុំបានរៀបចំឱ្យសាខារបស់កាយឫទ្ធិនារីកម្ពុជាទាំងអស់បំផុសបំផុលសមាជិកាសកម្មភាពធ្វេីការចាប់ផ្តេីមដាំ បន្លែនៅតាមសាលារៀនរបស់ខ្លួន ឬនៅដីរបស់សហគមន៍ ទុកសំរាប់ផ្គត់ផ្គង់ និងជួយគាំទ្រដល់ជនភៀសសឹករបស់យេីងបានមួយចំនួន។ សូមដាំបន្លែណាដែលឆាប់បានទទួលផល។ ចាប់ផ្តេីមពីតូចតែនាងខ្ញុំចង់អោយសិស្សសាលារបស់យេីងមានការចូលរួមក្នុងគ្រាដ៏លំបាកជាមួយបងប្អូនវីរៈកងទ័ពយេីង។ »។

ការឈ្លានពានបាញ់ប្រហារឈ្លានពានទ្រង់ទ្រាយធំមកលើខេត្តរបស់កម្ពុជាចំនួន៦ តាមបន្ទាត់ព្រំដែនពីសំណាក់យោធាថៃ វាយប្រហារមិនរើសគោលដៅ ទម្លាក់គ្រាប់បែកលើទីតាំងស៊ីវិល ហេដ្ឋរចនាសម្ព័ន្ធស៊ីវិលពីសំណាក់យោធាថៃ  បណ្ដាលឱ្យពលរដ្ឋខ្មែរស្លូតត្រង់យ៉ាងហោច១៣នាក់ ស្លាប់បាត់ជីវិត​ ,រងរបួសជាង៧០នាក់, ពលរដ្ឋជិត៤១ម៉ឺននាក់រត់ភៀសសឹក។ នេះបើតាមក្រសួងមហាផ្ទៃគិតត្រឹមម៉ោង៧ព្រឹក ថ្ងៃទី១៥ ខែធ្នូ ឆ្នាំ២០២៥។

គួរឱ្យដឹងដែរថា សមាគមកាយឬទ្ធិនារីកម្ពុជា បានបង្កើតឡើងវិញក្រោយពីសង្គ្រាម គឺនៅក្នុងឆ្នាំ១៩៩៦ ដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយសសមាគមកាយប្ញទ្ធិនារីកម្ពុជា រហូតមកដល់បច្ចុប្បន្ន។

សមាគមកាយឬទ្ធិកម្ពុជា មានកាតព្វកិច្ចរបស់ខ្លួនក្នុងការជួយអភិវឌ្ឍថាមពលកុមារី និងយុវតី ឱ្យក្លាយជាពលរដ្ឋល្អ មានទំនួលខុសត្រូវចំពោះខ្លួនឯង គ្រួសារ សហគមន៍ និងប្រទេសជាតិ។ គិតត្រឹមឆ្នាំ២០២៥នេះ សមាគមកាយឬទ្ធិនារីកម្ពុជា មានចំនួន ៧សាខា ដែលមានសមាជិក សមាជិកាសរុប ជាង៨ពាន់នាក់ ហើយនឹងបន្តពង្រីកឲ្យមានសាខាទូទាំង ២៥ រាជធានី-ខេត្ត។ នេះបើតាមការបញ្ជាក់បន្ថែមរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕

ដោយ៖ ង៉ិល ណារ៉ាត់​