ព័ត៌មានជាតិ

មន្ត្រីជាន់ខ្ពស់ ៖ បុគ្គលិកសុខាភិបាល ត្រូវរួមគ្នាបម្រើសេវា និងទប់ទល់សង្គ្រាមចិត្តសាស្ត្រគ្រប់រូបភាពក្នុងន័យបំបែកបំបាក់ស្មារតីប្រជាជន

បានផុស

៧ ខែ មុន

នៅ

ថ្ងៃចន្ទ ២២ ធ្នូ ២០២៥

ដោយ

លោកសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានអះអាងថា នៅក្នុងស្ថានភាពដូចពេលនេះ បុគ្គលិកសុខាភិបាលទាំងអស់ ត្រូវតែរួបរួមគ្នាទាំងកម្លាំងកាយ និងកម្លាំងចិត្ត ដើម្បីបម្រើសេវា និងដើម្បីទប់ទល់ជាមួយនឹងសង្គ្រាមចិត្តសាស្ត្រដែលសត្រូវបានប្រើប្រាស់ក្នុងគ្រប់រូបភាពដើម្បីបំបែកបំបាក់ស្មារតីរបស់ប្រជាជនយើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសដឹកនាំវគ្គភាពអ្នកដឹកនាំ និងនវានុវត្តន៍ ដែលមានមន្ត្រីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាល ចូលរួមតាមប្រព័ន្ធវីដេអូសន្និសីទជាង ២ ៨០០ នាក់ នៅទីស្តីការក្រសួង លោកសាស្ត្រាចារ្យ បានចែករំលែកពីរបៀបដឹកនាំ និងគ្រប់គ្រងការងារថែទាំ និងព្យាបាលជំងឺ នៅក្នុងពេលដែលមានចម្បាំងឈ្លានពាន។ ដោយលោកសាស្ត្រាចារ្យ បានបន្តថា «ពេលនេះជាងពេលណាៗ ទាំងអស់ ដែលមន្ត្រីសុខាភិបាលយើងគ្រប់លំដាប់ថ្នាក់ កាន់តែរួបរួមគ្នាឱ្យក្លាយទៅជាព្រលឹងសុខាភិបាលតែមួយ សម្រាប់ជាតិកម្ពុជាយើង»។

លោកសាស្ត្រាចារ្យ បានបន្ថែមថា នៅចំពោះមុខ ឧបសគ្គបែបនេះ បុគ្គលិកសុខាភិបាលទាំងអស់ ត្រូវផ្តោតលើតួនាទីសំខាន់ៗ ចំនួន ៤ គឺ (១) បំពេញឱ្យបាននូវមុខងារសំខាន់របស់វិស័យសុខាភិបាល គឺជាការបម្រើសេវាថែទាំ និងព្យាបាលដល់ប្រជាជនដោយមិនរើសមុខ (២) តម្កល់ភាពខ្ពស់បំផុត នៃជីវិតអ្នកជំងឺដែលត្រូវសង្គ្រោះ (៣) រក្សាការពារសុវត្ថិភាពបុគ្គលិកសុខាភិបាលឱ្យអស់លទ្ធភាព ដើម្បីផ្តល់ឱកាសជូនបុគ្គលិកសុខាភិបាលអាចជួយអ្នកជំងឺ និងអ្នករបួស និង (៤) ការដឹកនាំការងារសុខាភិបាល ត្រូវធ្វើឡើងតាមខ្សែបន្ទាត់គណនេយ្យភាពតែមួយ និងច្បាស់លាស់។

លោកសាស្ត្រាចារ្យ បានណែនាំពីគន្លឹះ នៃការដឹកនាំអង្គភាព ក្នុងពេលមានសង្គ្រាម ដែលតម្រូវឱ្យអ្នកដឹកនាំម្នាក់ៗ ត្រូវយកចិត្តទុកដាក់លើការងារសម្របសម្រួលជាមួយភាគីផ្សេងៗ ការរក្សាសាមគ្គីភាពជាមួយអាជ្ញាធរគ្រប់លំដាប់ថ្នាក់ ការគ្រប់គ្រង និងការប្រើប្រាស់ធនធានឱ្យចំគោលដៅ និងដោយសន្សំសំចៃ និងផ្តល់របាយការណ៍ដែលច្បាស់ជូនថ្នាក់ដឹកនាំខាងលើបានដឹង និងផ្តល់ធាតុចូលបន្ថែម។

លោកសាស្ត្រាចារ្យ ក៏បានផ្តល់ការណែនាំជូនមន្ទីរពេទ្យសាធារណៈទាំងអស់ ធានាឱ្យបាននូវគុណភាព នៃសេវាសម្រាប់ប្រជាជនគ្រប់រូប និងបានផ្ដាំផ្ញើថ្នាក់ដឹកនាំអង្គភាពទាំងអស់ ដឹកនាំបុគ្គលិកសុខាភិបាល ដោយឈរលើគោលគំនិត នៃការផ្តល់តម្លៃខ្ពស់បំផុតលើក្រមសីលធម៌ ដែលប្រការនេះ នឹងទាក់ទាញផ្តល់ជាលទ្ធភាព ផលប្រយោជន៍អភិវឌ្ឍន៍ផ្សេងៗ ទៀត យ៉ាងច្រើន ជូនដល់សង្គម អង្គភាព និង បុគ្គលិកសុខាភិបាល នាពេលអនាគត៕

អត្ថបទ ៖ សំអឿន