ព័ត៌មានជាតិ

អាកាសយានដ្ឋានតារាសាគរខេត្តកោះកុង បន្តប្រតិបត្តិការធម្មតា ទទួលជើងហោះហើរ ២ ជើងក្នុងមួយសប្តាហ៍

បានផុស

៧ ខែ មុន

នៅ

ថ្ងៃពុធ ២៤ ធ្នូ ២០២៥

ដោយ

អាកាសយានដ្ឋានតារាសាគរក្នុងខេត្តកោះកុងនៅតែបន្តប្រតិបត្តិការជើងហោះហើរជាធម្មតា បើទោះបីស្ថានភាពតាមព្រំដែនកំពុងកើតមានជម្លោះដោយសារការទន្ទ្រានឈ្លានពានពីយោធាថៃ។

លោក ម៉ៅ កែវពេជ្រច័ន្ទមុន្នី នាយកអាកាសយានដ្ឋានអន្តរជាតិតារាសាគរបានប្រាប់កម្ពុជាថ្មីថា ទោះបីតាមបណ្តាខេត្តជាប់ព្រំដែនរងការគម្រាមកំហែងពីយោធាថៃដែលបើកការឈ្លានពានចូលកាន់កាប់ទឹកដីប្រទេសកម្ពុជា អាកាសយានដ្ឋានតារាសាគរនៅតែទទួលជើងហោះហើរជាធម្មតា ហើយបច្ចុប្បន្នក៏មានការពង្រីកជើងហោះហើរបន្ថែម ២ ជើងក្នុង ១ សប្តាហ៍ តាមរយៈក្រុមហ៊ុនអាកាសចរណ៍ Air Cambodia (អតីត Cambodia Angkor Airlines) ដែលមានកាលវិភាគហោះហើរនៅរៀងរាល់ថ្ងៃសុក្រ និងថ្ងៃអាទិត្យចេញពីគោលដៅទៅមករាជធានីភ្នំពេញ។

«ការហោះហើរមិនមានការផ្អាកឡើយ គ្រាន់ភ្ញៀវមិនមានសន្ទុះច្រើន ដោយសារបារម្ភពីសុវត្ថិភាព»។ លោក ម៉ៅ កែវពេជ្រច័ន្ទមុន្នី បញ្ជាក់។

លោក ម៉ៅ កែវពេជ្រច័ន្ទមុន្នី បន្តថា ក្រោយកើតមានជម្លោះតាមព្រំដែន ពលរដ្ឋហាក់មិនសូវមានអារម្មណ៍មកលំហែកាយច្រើនដូចមុននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Union Development Group (UDG) បានទទួលសិទ្ធិវិនិយោគសាងសង់អាកាសយានដ្ឋានតារាសាគរតម្លៃជាង ២០០ លានដុល្លារ នៅស្រុកបុទុមសាគរ ក្នុងខេត្តកោះកុង។ អាកាសយានដ្ឋាននេះមានផ្លូវយន្តហោះចុះប្រវែង ៣២០០ ម៉ែត្រ ទទឹង ៤៥ ម៉ែត្រ ដែលមានសមត្ថភាពអាចទទួលយន្តហោះប្រភេទ A-350-900 និង Boeing 777 ជាដើម៕