ស្នងការរាជធានីភ្នំពេញ ផ្តល់ម៉ូតូជូនវីរកងទ័ពវិញ ក្រោយបញ្ចាំហើយមិនបានលោះ ព្រោះជាប់ដៃការពារទឹកដី

លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងលោកជំទាវ ហ៊ុន ស៊ីណាត នាព្រឹកថ្ងៃទី០៥ ខែមករា ឆ្នាំ២០២៦ បានទទួលជួបសំណេះសំណាល និងផ្តល់ម៉ូតូដើមជូនដល់វីរកងទ័ពជួរមុខមួយរូបវិញ ដែលបានបញ្ចាំម៉ូតូហើយមិនបានបង់រំលោះការប្រាក់ ព្រោះជាប់ដៃការពារទឹកដី ពីខ្មាំងសត្រូវរំលោភបំពានទឹកដី។

កាលពីពេលថ្មីៗនេះ មានការបង្ហោះលើបណ្តាញទំនាក់ទំនងសង្គមអំពីវីរកងទ័ពដែលមានឈ្មោះ មាស ប្រឹក្សា អាយុ៣១ឆ្នាំ ដោយភ្ជាប់ខ្លឹមសារថា « ជាប់ដៃប្រយុទ្ធការពារបូរណភាពទឹកដីកម្ពុជានៅសមរភូមិមុខហេីយបានបញ្ចាំម៉ូតូ៣ខែមិនបានមកបង់ប្រាក់ នៅហាងទទួលបញ្ចាំម៉ូតូ០១កន្លែងស្ថិតនៅសង្កាត់ទឹកល្អក់ទី៣ ខណ្ឌទួលគោក ។

ក្រោយទទួលបានពត៌មាននោះភ្លាម លោក ឧត្តមសេនីយ៍ឯក ជួន ណារិន្ទ តាមរយៈការជួយជ្រោមជ្រែងពីលោកជំទាវ ហ៊ុន ស៊ីណាត ផងដែរ លោកស្នងការ ក៏បានបញ្ជាទៅលោកវរសេនីយ៍ឯក ស៊ឹម ពិសិដ្ឋ អធិការដ្ឋាននគរបាលខណ្ឌទួលគោក ដឹកនាំកម្លាំងចុះទៅដល់ហាងបញ្ចាំម៉ូតូខាងលើ ដើម្បីសួរនាំ ហើយជួបម្ចាស់ហាងក៏បានដឹងច្បាស់ថាម៉ូតូនោះពិតជាម៉ូតូវីរកងទ័ពពិតប្រាកដនោះមែន ដោយម្ចាស់ហាងបញ្ចាំក៏បានជូនម៉ូតូនោះទៅវីរកងទ័ពវិញ និងមិនគិតទាំងការប្រាក់រួមជាមួយប្រាក់ដើមផងដែរ ។

ក្នុងគ្រាជាមួយគ្នានោះ លោកស្នងការ ក៏បានឧបត្ថម្ភថវិកា សម្ភារមួយចំនួនជូនដល់វីរកងទ័ពនិងក្រុមគ្រួសារផងដែរ៕អត្ថបទ៖ សុភា