ព័ត៌មានជាតិ

ចក្ខុវិស័យសុខាភិបាលឆ្នាំ ២០២៦ គឺការកសាងសុខាភិបាលឱ្យទំនើប ប្រកបដោយគុណភាព សមធម៌ និងគុណធម៌

បានផុស

៤ ខែ មុន

នៅ

ថ្ងៃអង្គារ ៦ មករា ២០២៦

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអះអាងថា សម្រាប់ឆ្នាំ ២០២៦ នេះ ចក្ខុវិស័យសុខាភិបាល គឺការកសាងសុខាភិបាលតាមក្បួនខ្នាត សំដៅស្តង់ដារសកល ទំនើបកម្មឱ្យទាន់សម័យកាល ប្រកបដោយគុណភាព សមធម៌ និងគុណធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសដឹកនាំកិច្ចប្រជុំកម្រិតថ្នាក់ដឹកនាំលើកទី ១ នៃខែមករា ឆ្នាំ ២០២៦ ដើម្បីលើកទិសដៅការងារ ឱ្យកាន់តែមានគុណភាព និងប្រសិទ្ធភាព កាលពីរសៀលថ្ងៃទី ៥ មករា លោករដ្ឋមន្ត្រី បានបន្តថា ក្នុងឱកាសឆ្នាំថ្មីនេះ គោលការណ៍សំខាន់ៗ មួយចំនួនដែលជាចក្ខុវិស័យក្នុងការកសាងសុខាភិបាល ទៅតាមក្បួនខ្នាត ស្តង់ដារ សមធម៌ ទំនើបកម្មទាន់សម័យ ហើយផ្តោតលើអ្នកជំងឺ និងអ្នកងាយរងគ្រោះខ្លាំង ប្រកបដោយគុណភាព ដែលទុកចិត្តបាន ទទួលយកបាន ដោយមិនមានការរងគ្រោះ ចំណាយលើសពីការចាំបាច់ និងលើសលប់។

ទន្ទឹមនឹងនេះ លោករដ្ឋមន្ត្រី បានណែនាំដល់ថ្នាក់ដឹកនាំគ្រប់កម្រិត ត្រូវបន្តពង្រឹងការបម្រើសេវាសុខាភិបាលនៅអង្គភាពរបស់ខ្លួន រាប់ចាប់ពីការទទួលបដិសណ្ឋារកិច្ច អនាម័យ ក្រមសីលធម៌វិជ្ជាជីវៈ ជាពិសេសផ្តោតសំខាន់ៗ លើគុណភាពប្រសិទ្ធភាព សុវត្ថិភាព នៃការព្យាបាល ប្រកបដោយសមធម៌។

លោករដ្ឋមន្ត្រី បានលើកឡើងទៀតថា «គ្រូពេទ្យត្រូវដឹងពីសុខទុក្ខរបស់អ្នកជំងឺ។ បន្ថែមពីនេះ ថ្នាក់ដឹកនាំមន្ទីរពេទ្យ ត្រូវមានផែនការច្បាស់លាស់ និងការត្រៀមទុកជាមុនគ្រប់ជំហាន ហើយត្រូវពង្រឹងគុណភាព នៃការថែទាំ ព្យាបាល ពង្រឹងសមត្ថភាពមន្ត្រីសុខាភិបាលតាមរយៈការបណ្តុះបណ្តាល ការពង្រីកនូវហេដ្ឋារចនាសម្ព័ន្ធរបស់ខ្លួនស្របតាមតម្រូវការ និងសុខាភិបាលឌីជីថល ស្របតាមយុទ្ធសាស្ត្រ នៃវិធានការគន្លឹះក្នុងវិស័យសុខាភិបាល (គ.វ.ស)»។

លោករដ្ឋមន្ត្រី បានណែនាំដល់ថ្នាក់ដឹកនាំ និងមន្ត្រីសុខាភិបាល ត្រូវចេះពីវិធីសាស្ត្រក្នុងការគ្រប់គ្រងអង្គភាពឱ្យកាន់តែរីកចម្រើន ត្រូវផ្តោតសំខាន់លើការដោះស្រាយបញ្ហា ការចៀសវាងការកើតមានបញ្ហា ហើយបម្រើសេវាសុខាភិបាលដល់អ្នកជំងឺដោយក្តីអាណិត ក្តីករុណា គុណធម៌ សមធម៌ ដែលជាស្ពានឈានទៅការបង្កើនទំនុកចិត្តដល់ពីប្រជាពលរដ្ឋ។

យ៉ាងណាក៏ដោយ លោករដ្ឋមន្ត្រី បានថ្លែងនូវកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងដល់ថ្នាក់ដឹកនាំ មន្ត្រីរាជការ បុគ្គលិកសុខាភិបាលទាំងអស់ ដែលបានបំពេញភារការងារដោយស្មារតីទទួលខុសត្រូវខ្ពស់ ក្នុងពេលកន្លងមកនេះ ជាពិសេសការបម្រើសេវាសុខាភិបាល ជូនប្រជាពលរដ្ឋ ជនភៀសសឹក និងវីរកងទ័ព នៅគ្រប់កាលៈទេសៈ ប្រកបដោយប្រសិទ្ធភាព៕

អត្ថបទ ៖ សំអឿន