CMAC ដាក់ពង្រាយកម្លាំងប្រមាណ ៨០ កងអនុសេនា នៅតំបន់រងផលប៉ះពាល់ដោយសារគ្រាប់បែក

មជ្ឈមណ្ឌលសកម្មភាពកំចាត់មីនកម្ពុជា CMAC ដាក់ពង្រាយកម្លាំងប្រមាណ ៨០ កងអនុសេនាតូច​ឬក្រុម នៅតំបន់ដែលរងគ្រោះគ្រាប់បែកដែលបន្សល់ទុកដោយសារយោធាថៃឈ្លានពាន ដើម្បីអន្តរាគមន៍ឱ្យបានទាន់ពេល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់ពង្រាយកម្លាំងបោសសម្អាត និងប្រចាំការនេះ បន្ទាប់ពីអំឡុងសង្គ្រាមកម្ពុជា-ថៃ ចំនួន២លើកក្នុងឆ្នាំ២០២៥នេះ ទាហានថៃបានប្រើប្រាស់គ្រាប់យុទ្ធភណ្ឌជាច្រើនប្រភេទដូចជា គ្រាប់បែកទម្លាក់ពីយន្តហោះ គ្រាប់បែកចង្កោម គ្រាប់​ផ្សែងពុល (សារធាតុគីមី) គ្រាប់កាំភ្លើងធំគ្រប់ប្រភេទ គ្រាប់អាវុធធុនមធ្យមនិងស្រាលយ៉ាងច្រើនឥតគណនាមកលើទឹកដីកម្ពុជា ទាំងតំបន់សមរភូមិ តំបន់មូលដ្ឋានកងទ័ពកម្ពុជា និងគោលដៅស៊ីវិលដូចជា សាលារៀន មន្ទីរពេទ្យ វត្តអារាម ភូមិករ និងដីស្រែចម្ការប្រជាពលរដ្ឋជាដើម។ ការប្រើប្រាស់គ្រាប់ដែលច្បាប់អន្តរជាតិហាមឃាត់នេះ បានបន្សល់ទុកសំណល់គ្រាប់ជាច្រើនដែលកំពុងគំរាមកំហែងដល់ការរស់នៅប្រចាំថ្ងៃរបស់ប្រជាពលរដ្ឋ។

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC បានគូសបញ្ជាក់ថា​ កម្លាំងអង្គភាពCMAC បាននិងកំពុងបំពេញប្រតិបត្តិការក្នុងការធានាសុវត្ថិភាពដល់ប្រជាពលរដ្ឋដែលត្រូវវិលត្រឡប់ទៅភូមិឋាននិងផ្ទះសម្បែងវិញ​ ដោយបានពង្រាយកម្លាំងនៅតំបន់រងផលប៉ះពាល់ដោយសារសង្គ្រាមឈ្លានពានរបស់សៀមចាប់ពីខេត្តកោះកុង​ដល់ខេត្តព្រះវិហារ​។ លោកបន្តថា៖«កម្លាំងអង្គភាពCMAC ប្រមាណជិត៨០កងអនុសេនាតូច​ឬក្រុម​ ត្រូវបានដាក់ពង្រាយដើម្បីឆ្លើយតបសំណូមពរដ៏ចាំបាច់ និងបន្ទាន់បំផុតនេះ»​។

លើសពីនេះ មន្រ្តីជំនាញ CMAC រួមជាមួយមន្រ្តីនគរបាលខេត្តគោលដៅដែលរងផលប៉ះពាល់ដោយសារសង្គ្រាមឈ្លានពានរបស់ប្រទេសថៃ បានបន្តការងារចុះទៅកាន់តំបន់ជនភៀសសឹកដើម្បីផ្សព្វផ្សាយបន្ថែមពីការប្រុងប្រយ័ត្នឱ្យខ្ពស់ចំពោះគ្រោះថ្នាក់ដែលអាចបង្កឡើងដោយសំណល់យុទ្ធសង្រ្គាមក្រោយពេលត្រឡប់ទៅលំនៅដ្ឋានវិញ។

សូមជម្រាបត្រួសៗថា អំឡុងសង្គ្រាម យោធាថៃបានប្រើប្រាស់គ្រាប់បែកចង្កោមយ៉ាងសន្ធឹកសន្ធាប់ដែលច្បាប់អន្តរជាតិហាមឃាត់មកទឹកដីកម្ពុជា។ ជាក់ស្តែង នៅថ្ងៃទី២២-២៣​ ខែធ្នូ​ ឆ្នាំ២០២៥នេះ​ ទាហានថៃបន្តបាញ់គ្រាប់បែកចង្កោមប្រភេទ M46 តាមរយៈគ្រាប់កាំភ្លើងធំ ១៥៥ មម ​ចូលបូរណភាពទឹកដីកម្ពុជា​ ជាទង្វើការរំលោភច្បាប់អនុសញ្ញាអន្តរជាតិអូស្លូ​ ហាមឃាត់ការប្រើប្រាស់គ្រាប់បែកចង្កោមយ៉ាងធ្ងន់ធ្ងរ។

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC បានសម្តែងការព្រួយបារម្ភថា ​សំណល់យុទ្ធភណ្ឌសង្គ្រាមថៃឈ្លានពានដែលបាន​ប្រើប្រាស់គ្រាប់មកលើកម្ពុជា​ នឹងបន្តគំរាមកំហែងសុខសុវត្ថិភាពជនស៊ីវិលក្នុងរយៈពេលវែងទៅមុខបន្ថែមទៀត៕