ព័ត៌មានជាតិ

ឧប. វង្សី វិស្សុត ជំរុញដល់អាជ្ញាធរយកចិត្តទុកដាក់លើពលរដ្ឋដើម្បីរក្សាភាពជឿជាក់ និងសាមគ្គីភាព

បានផុស

៣ ខែ មុន

នៅ

ថ្ងៃសៅរ៍ ២៤ មករា ២០២៦

ដោយ

រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ឧបនាយករដ្ឋមន្ត្រី វង្សី វិស្សុត បានជំរុញដល់កងកម្លាំងប្រដាប់អាវុធ និងមន្ត្រីរាជការគ្រប់លំដាប់ថ្នាក់ឱ្យបន្តខិតខំបម្រើប្រជាជនដោយភាពស្មោះត្រង់ គោរពច្បាប់ ធ្វើអំពើល្អ ត្រឹមត្រូវ ពិសេសពង្រឹងគុណភាព និងប្រសិទ្ធភាពនៃការផ្ដល់សេវាសាធារណៈ ដូចជាការពង្រឹងការអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ព្រមទាំងការដោះស្រាយទំនាស់ផ្សេងៗជូនប្រជាពលរដ្ឋដើម្បីឱ្យពលរដ្ឋមានសន្ដិសុខផ្លូវចិត្ត និងភាពជឿជាក់កាន់តែខ្លាំងមកលើរាជរដ្ឋាភិបាល។

ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ខេត្តកំពង់ធំ កាលពីថ្ងៃទី២៣ ខែមករា ឆ្នាំ២០២៦ លោកឧបនាយករដ្ឋមន្ត្រី វង្សី វិស្សុត បានលើកឡើងថា ការយកចិត្តទុកដាក់លើប្រជាជនពិតប្រាកដ រក្សាបាននូវសន្ដិសុខផ្លូវចិត្ត និងភាពជឿជាក់ពីពលរដ្ឋកាន់តែខ្លាំងវានឹងធានាដល់មូលដ្ឋានគ្រឹះសាមគ្គីភាព និងឯកភាពជាតិដែលគ្មានកម្លាំងណាមកបំបែកបានទេ។

លោកឧបនាយករដ្ឋមន្ត្រីបន្ថែមថាក្នុងស្ថានការណ៍ដែលពិភពលោកកំពុងបាត់បង់សណ្ដាប់ធ្នាប់ ហើយអ្នកខ្លាំងប្រើកម្លាំង កម្ពុជាត្រូវពង្រឹងខ្លួនឱ្យខ្លាំងក្លាលើគ្រប់វិស័យទាំងសេដ្ឋកិច្ច សង្គមកិច្ច និងការពារជាតិ ដោយត្រូវពង្រឹងគោលជំហរស្មារតី សាមគ្គីភាព ឯកភាពជាតិ និងត្រូវមានវិន័យ ហើយរួមសហការគ្នាជាកម្លាំងតែមួយ ទាំងរដ្ឋាភិបាល កងទ័ព និងប្រជាជន ជាមួយនឹងការប្តេជ្ញាចិត្តឱ្យលើសពីធម្មតា ចេះហ៊ានឈឺឆ្អាល ចែករំលែក និងលះបង់ឱ្យលើសពីធម្មតាព្រមទាំងតម្កល់ផលប្រយោជន៍ជាតិ និងប្រជាជនជាធំ៕