កម្ពុជា និងវៀតណាម បន្តអះអាងពីការផ្ដល់តម្លៃលើភាពជាអ្នកជិតខាងល្អ និងមិត្តភាពជាប្រពៃណី

នៅឯប្រទេសហ្វីលីពីន រដ្ឋមន្ត្រីការបរទេសកម្ពុជា បានជួបជាទ្វេភាគីជាមួយរដ្ឋមន្ត្រីការបរទេសវៀតណាម ខណៈដែលថ្នាក់ដឹកនាំទាំងពីរទៅចូលរួមកិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាន។ ក្នុងជំនួបដែលធ្វើឡើងនៅលើកោះសេប៊ូ រដ្ឋមន្ត្រីទាំងពីរ បានអះអាងជាថ្មីនូវភាពជាអ្នកជិតខាងល្អ និងចំណងមិត្តភាពជាប្រពៃណីរវាងកម្ពុជា និងវៀតណាម។

តាមសម្រង់សម្ដី ដោយយោងខ្លឹមសារក្នុងសេចក្ដីប្រកាសព័ត៌មានរបស់ក្រសួងការបរទេសកម្ពុជា ក្នុងជំនួបពិភាក្សានោះ លោក ប្រាក់ សុខុន និងលោក ឡេ ហ័យជុង បានលើកឡើងពីសារៈសំខាន់យ៉ាងខ្លាំងទៅលើចំណងមិត្តភាពយូរអង្វែងរវាងកម្ពុជា និងវៀតណាម ដោយផ្អែកលើមូលដ្ឋាន “ភាពជាអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង”។

ភាគីទាំងពីរ ក៏បានរំលឹកពីលទ្ធផលប្រកបដោយផ្លែផ្កានៃកិច្ចប្រជុំលើកទី២១ របស់គណៈកម្មការចម្រុះកម្ពុជា-វៀតណាម ស្តីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្ត្រ និងបច្ចេកវិទ្យា ដែលបានធ្វើឡើងនៅខេត្តសៀមរាប កាលពីខែធ្នូ ឆ្នាំ២០២៥កន្លងទៅ ដែលជាផែនទីបង្ហាញផ្លូវសម្រាប់ការបន្តពង្រឹងទំនាក់ទំនងទ្វេភាគីរវាងកម្ពុជា និងវៀតណាម។

បើតាមសេចក្ដីប្រកាសដដែលនោះ ភាគីទាំងពីរ ក៏បានជជែកគ្នាពីការត្រៀមរៀបចំនូវទស្សនកិច្ចផ្លូវរដ្ឋរបស់លោក តូ ឡឹម អគ្គលេខាធិការបក្សកុម្មុយនីស្តវៀតណាម មកកាន់ប្រទេសកម្ពុជា នាដើមខែកុម្ភៈ ឆ្នាំ២០២៦ ខាងមុខផងដែរ៕