អាជ្ញាធរខេត្តបាត់ដំបង ដាក់គ្រឿងចក្រចុះជីកលេ​ណដ្ឋាននៅតាមសា​លា​រៀនជាប់ព្រំដែនកម្ពុជា-ថៃ ដើម្បីការពារសុវត្ថិភាព

អាជ្ញាធរខេត្តបាត់ដំបងបានចាប់ផ្ដើមដាក់គ្រឿងចក្រចុះជីកលេណដ្ឋាននៅតាមសាលារៀន និងមន្ទីរពេទ្យ ស្ថិតនៅតាមបណ្ដោយព្រំដែនកម្ពុជា-ថៃ ដើម្បីការពារសុវត្ថិភាព នៅចំពេលដែលភាពតានតឹងបន្តកើតមានឡើង។

ទីតាំងដែលចាប់ផ្ដើមជីកស្ថិតនៅ តាមសាលាវិទ្យាល័យ និងអនុវិទ្យាល័យ ព្រមទាំងមណ្ឌលសុខភាព ក្នុងស្រុកបាណន់ ស្រុកកំរៀង ស្រុកភ្នំព្រឹក ស្រុកសំពៅលូន និងស្រុកសំឡូត តាមបណ្ដោយព្រំ​ដែនកម្ពុជា-ថៃ ដែលការជីកនេះ ធ្វើឡើងតាមការណែនាំរបស់លោក សុខ លូ អភិបាលខេត្តបាត់ដំបងកាលពីពេលថ្មីៗនេះ។

កាលពីថ្ងៃទី ២៩ ខែមករា ឆ្នាំ ២០២៦ លោកស្រី សោ សុខារី នាយិកាសាលាបឋមសិក្សាលំផាត់ បានសំណូមពរដល់ថ្នាក់ដឹកនាំធ្វើយ៉ាងណាឱ្យមានលេណដ្ឋាននៅតាមសាលារៀន ដោយសារតែសង្គ្រាមនៅតាមបណ្ដោយព្រំដែនកម្ពុជាថៃមិនទាន់ស្ងប់ និងការឈ្លានរបស់ទាហានថៃ បានរំលោភបំពានមកលើដែនអធិបតេយ្យភាពកម្ពុជានៅតែបន្ត។

នៅតាមបណ្ដាសាលារៀនមួយចំនួន ស្ថិតនៅជាប់ព្រំដែនថៃ ជាកន្លែងធ្លាប់រងគ្រោះដោយសារការទំលាក់គ្រាប់បែកពីយន្តហោះ F16 និងទទួលរងគ្រាប់ផ្លោង ធុន ១៣៥ មីលីម៉ែត្រ រាប់រយគ្រាប់៕

អត្ថបទ៖ សោ និយមរ័ត្ន